Sa ndixi ia kuu ku Toꞌo ndo
3
Xani, jaꞌa ku carta ku uu chidotuni da jni ndidaa ni. San nduu carta yaꞌa chidotuni da sa na keꞌe d̶iki ni xiꞌin na kani-ini ndaa ni ndidaa ni, 2 ndasa na nakaꞌan ni ndidaa toꞌon xu kaꞌan ndidaa x-profeta Ndios ío diꞌna, xiꞌin sa taꞌvichiion ia kuu ku Toꞌo ndo xiꞌin ia kida sa nanitaꞌvi ndo, sa dádana ñaꞌan ndidaa tsa tsandaꞌa Jesús jni ndidaa ni.3 Nandeꞌe sa keꞌe d̶iki ni ndidaa ni jaꞌa díꞌna ka: Sa kixi kii, sa koo kuaꞌa ntseꞌe ñayii kuakuntsaa sa ndaa xininchisa ndo, san ndidaa ñayii yukua kada tsa sa kuiꞌia nchoj mee tsa, 4 san nduku toꞌon tsa: “Ami io tsa kachi ni sa ndixi kuaan tan? Kuan ntsa kii xiꞌi ndidaa tsa io diꞌna, ñuyii ya kuenta ni ka kaa, ti nadama.” 5 Ndidaa ñayii yaꞌa ti nchu na kininchisa tsa, san ntsa diꞌna ndidaa andivi ya xiꞌin nuꞌu ya kuguaꞌa xiꞌin sa kaꞌan ni Ndios, san nuꞌu ya kée xiti ndutsa san sa saꞌa ndutsa ya io. 6 Juandiku ñuyii yukua ndeꞌé, daꞌvi xiꞌin ndutsa. 7 Doko andivi yaꞌa xiꞌin nuꞌu ya, sa saꞌa S-toꞌon Ndios io, san dini xiꞌin toꞌon yaꞌa ntsatu sa kayu kii ndaka Ndios kuachi xi ndidaa ñayii kuiꞌia.
8 San duꞌua vi xani, ma dana ni ndidaa jaꞌa: Kuan en kii kuu kuenta en mil kuia san en mil kuia kuu kuenta en kii xi ia kuu ku Toꞌo ndo. 9 Adi sa ku kuee ia sa kada ia ndidaa sa kachi ia; kuenta sani-ini dagua ñayii, maska sa ntsatu ia ku ndo ndidaa ndo, kuan ti nchoxi ia sa kuita nisa en ñayii, maska sa na nata-uꞌu ñayii.
10 Doko x-kii ia kuu ku Toꞌo ndo ndixi kuenta en ñaduꞌu niñu. Danduu ndidaa andivi ya ndeꞌe san kuiꞌia ntseꞌe tsaku, san ndidaa sa io kayu san ndeꞌe, san nuꞌu ya xiꞌin ndidaa ndituꞌu sa io nandutsa.
11 Tu ndidaa sa io ya duꞌua na ndeꞌe, nandeꞌe sa kadavii ni xiꞌin nachi nachi nandeꞌe sa koo ni ndidaa ni. 12 Kuntsatu ni kii na ndixi Ndios, kuan kii yukua andivi ya kana ndaꞌa, san ndeꞌe, san ndidaa sa io ya nandutsa duꞌua ni xiti ñuꞌu. 13 Doko ntsoo ntsatu ndo, sa niꞌi ndo sa kachi ia sa taxi ia ku ndo, Andivi saa xiꞌin ñuꞌu saa sa io sa ndaa.
14 Juandiku vi xani, neni ntsatu ni ndidaa jaꞌa, nduku ntsee ni sa na naniꞌi ñaꞌan ia ni san io ndoo xanaa ni xiꞌin sa ti xidokuachi ni, xiꞌin sa io kadi ni. 15 Kunaꞌa ni sa sa ntsatu Ndios nchukachi sa nanitaꞌvi ndo; kuenta sa chídotuni ku kiani ndo Pablo, kuenta guaꞌa sañaꞌan Ndios sa na kutuni s-tsa. 16 Ndidaa carta tsáa tsa kaꞌan tsa ndidaa jaꞌa tuku; san io kuaꞌa sa vixi sa tediki ndo, san ndidaa tsa ti kutuni xi xiꞌin ndidaa tsa ti nduku ntsee sa kada sa ndaa nadama tsa, san duꞌua ni kida tsa xiꞌin ndidaa ka sa yodotuni s-toꞌon Ndios, ndasa dini mee tsa na kuidokuachi.
17 Juandiku dini ndidaa ni vi xani, sa kachi toꞌon da ni ndidaa ni, guaꞌa ni ndidaa ni, kuan na kada dadana ñaꞌan ndidaa tsa kuiꞌia yaꞌa ni, san dana ni sa xininchisa ni. 18 Guaꞌa ka, kuaꞌnu ni xiꞌin j-gracia Ndios xiꞌin sa xininchisa ni ku Toꞌo ndo Jesucristu ia kida sa nanitaꞌvi ndo. ¡San ia yaꞌa na kukaꞌnu vita xiꞌin ndidaa kii! Duꞌua na kuu.