Kuu ndo eni ka xiꞌin ia
2
Daa, tsaa da ndidaa toꞌon yaꞌa jni ndidaa ni, ndasa ma kada ni kuachi. Doko tu dakaa ni kída kuachi, io en ia ndaka niꞌno ñaꞌan ku ndo jnu ku Tata ndo, ia kuu Jesucristu ia kida sa ndaa. 2 San ia yaꞌa doko xuyii xi sa na ndoo ku kuachi ndo; san adi ni sa saꞌa ku kuachi ni mee ndo, sa saꞌa x-kuachi ndidaa ka ñayii tuku.3 San modo yaꞌa xinituni ndo sa xinitaꞌan ndo xiꞌin ia, tu kida ndo sa táꞌvichiion ia. 4 Doko tu andu kachi: “Dan xinitaꞌan da xiꞌin ia”, san ti kida sa táꞌvichiion ia tsa yaꞌa kuu en tsa naꞌntsa, san ti kaꞌan ndaa tsa. 5 Doko ñayii kida sa kachi s-toꞌon ia, sa xinimani Ndios chítu xanaa ñayii yaꞌa, san duꞌua danaꞌan sa kuu ndo eni xiꞌin ia. 6 Tsa kaꞌan sa nduu eni ka xiꞌin ia, nchoxi sa koo tsa kuenta ío ia.
En sa taꞌvichiion saa
7 Xanii, ndidaa sa tsaa da ya adi enka sa taꞌvichiion saa da kuu, maska sa sa duꞌua ni io kuu; san ndidaa toꞌon yaꞌa kuu sa tsaku jni diꞌna nu. 8 Doko na tsaa saa da sa taꞌvichiion jni guaꞌa ka, sa kuu sa ndaa xi Jesucristu xiꞌin dini ndidaa ni, kuan sa naa sa yaꞌia kuaꞌan san sa kuu luz nchisa sa dayeꞌe.
9 Tu andu kaꞌan sa io sa io luz, san xini uꞌu xani xi, san io naa daa. 10 Andu kida-ini xani xi, io sa io luz, san ma dana sa kada sa nchoxi Ndios. 11 Doko tsa xini uꞌu xani xi, io tsa sa naa xiꞌin io naa tsa, san ti xini tsa ami ndinoo tsa, kuan sa naa da kuaa ñaꞌan s-tsa.
12 Tsaa da d̶ini ndidaa ni vi daa, kuan ndidaa x-kuachi ni sa ndoo sa saꞌa Jesucristu. 13 Tsaa da xi ndidaa dini tsa kuu tadeꞌe, kuan xinitaꞌan ni xiꞌin ia duꞌua ni io.
Tsaa ntsu xoꞌo nu kuachi, kuan kídanar ñaꞌan yo xi sakakuiꞌia. Tsaa ntsu xoꞌo ndidaa yo vi daa, kuan xíni yo ia kuu ku Tata ndo. 14 Chídotuni da d̶ini tadeꞌe ndidaa ni, kuan sa xíni ni Jesucristu ia duꞌua ni io. Chídotuni ntsu xi ndidaa yoꞌo nu kuachi, kuan yakui yo san xininchisa yo s-toꞌon Ndios san kídanar ñaꞌan yo xi sakakuiꞌia.
15 Ma nchoj xo ñuyii yaꞌa nisa sa io ñuyii yaꞌa kuan andu nchoxi ñuyii yaꞌa ti xinimani ñaꞌan xi Ndios. 16 Kuan ndidaa sa io ñuyii yaꞌa kuu jaꞌa: Ndidaa sa nchoxi yikikoño, sa nchoj ntsaa sa xini nduchinuu xiꞌin ndidaa sa kida sa ku iꞌni ñayii sa io ntseꞌe xi ñayii. Adi Ndios kida ndidaa jaꞌa maska sa ñuyii yaꞌa kaku. 17 San ñuyii yaꞌa ndeꞌe, xiꞌin ndidaa sa nchoxi ñayii; doko tsa kida sa nchoxi Ndios koo ndikii.
Guaꞌa ni xiꞌin anticristu
18 Daa, sa kuyachi kii sa ndeꞌe; san dini ndidaa ni sa xini ni sa kixi anticristua, san vita sa ketuu kuaꞌa ntseꞌe anticristu. Juandiku xini ndo sa sa kuyachi kii ndeꞌe. 19 Kée tsa sa io ndo ya doko ti kuu ndo eni xiꞌin tsa; kuan tu kuu ndo eni xiꞌin tsa san koo tsa sa io ndo ya naku. Doko kée tsa ndasa na kini sa ti kuu ndo eni xiꞌin tsa.
20 Doko dini ndidaa ni ti kuu ni kuenta tsa yaꞌa ndidaa tsa, kuan ia ii taxi ia x-espíritu ia jni ndidaa ni, juandiku xini ni sa ndaa. 21 Adi tsaa da jni kuan ti xini ni sa ndaa, kuan sa xini ni, kuan sa xini ni nasa kuu sa ndaa xiꞌin sa naꞌntsa.
22 Doko tsa naꞌntsa kuu tsa kaꞌan sa Jesús ti kuu ia Cristu, san tsa duꞌua sani toꞌon kuu anticristu, kuadi nakininchisa tsa ia kuu Tata xiꞌin ia kuu Daꞌa. 23 Ndidaa ñayii ti nakininchisa ñaꞌan xi D̶aꞌa Ndios san ti io ia kuu Tata kuan xiꞌin ñayii yukua. Doko ñayii nakininchisa ñaꞌan xi Daꞌa Ndios san ñayii yukua io ia kuu Tata kuan xiꞌin.
24 Kunaꞌa vii ni ndidaa toꞌon tsaku jni. Kuan tu ndidaa toꞌon tsaku jni naꞌa vii ni ndidaa ni, san duꞌua koo ni ndidaa ni xiꞌin ia kuu Tata xiꞌin D̶aꞌa ia. 25 San jaꞌa kuu sa kachi ia sa taxi ia ku ndo ndidaa ndo: Sa kuu vida ma ndeꞌe.
26 Tsáa da toꞌon yaꞌa ndasa na kini ni sa io ñayii nchu dadana ñaꞌan jni ndidaa ni. 27 Doko dini ndidaa ni io Espíritu Santu táxi ia jni, san nisa ti nandeꞌe sa dakuaꞌa ñaꞌan jni. Kuan dini mee Espíritu dakuaꞌa ñaꞌan ndidaa jaꞌa, sa kuu sa ndakuiti, san ti kuu sa naꞌntsa, kuan sa ndakuiti dadana ñaꞌan jni sa na kininchisa ni on ni ia.
28 San vita vi daa, nduu ni enika xiꞌin ia, kuan ora na ndixi ia, ma yuꞌu ndo sa kiꞌin ndo jnu ia adi kukaꞌan ku nuu ndo.
29 Tu xini ni sa kida ia sa ndaa, san duꞌua kini ni sa ndidaa ñayii kida sa ndaa kuu d̶aꞌa Ndios.