Tu nchoj ni ndidaa sa io ñuyii
4
Náku naa ni xiꞌin nandodo taꞌan ni ndidaa ni? Adii xanaa ni ndidaa ni kana sa duꞌua kida ni ya ña? Kuan ndidaa sa kuiꞌia ñoꞌo xanaa ni nandodo taꞌan. 2 Nchoj ntsaa ni sa ti io jni; saꞌni ni san oni kanandaꞌa sa kuadu xanaa ni, san ti kachi niꞌi ni, naa ntseꞌe ni xiꞌin ndukuntsee ni, doko ti niꞌi ni sa nchoj ni, kuan ti xika ni. 3 San xika ni san ti niꞌi kuan ti xika ndaa ni, kuan xika ni sa kuxi sa nchoj mee ni. 4 Ndidaa dini ñayii ndee ñadeꞌe chitaꞌan enka tsie, ti xini ni sa tu io mani ni xiꞌin sa io ñuyii yaꞌa, nduu ni ñayii ti mani xiꞌin Ndios ña? Juandiku tu dakaa ni nchu koo mani xiꞌin sa io ñuyii yaꞌa ndu ni ñayii ti mani xiꞌin Ndios. 5 Ña sani-ini ni sa kaꞌan duꞌua s-toꞌon Ndios sa kachi: “Espíritu kída ia sa nakoo kundo kuiño ntseꞌe, kuan ti nchoxi ia sa na dandaa ñaꞌan ndo xi ia.” 6 Doko Ndios tax ka ia gracia kuan duꞌua yodotuni s-toꞌon ia sa kachi: “Ndios ti taꞌa-ini ñaꞌan ia xi ñayii iꞌni, doko sañaꞌa ia j-gracia ia xi ñayii ti iꞌni.”a 7 Nachiꞌi ni mee ni ndaꞌa Ndios; ma kada ni sa nchoxi sakakuiꞌia, san sakakuiꞌia kono sa io ni. 8 Natuꞌua ni Ndios, san Ndios natuꞌu ñaꞌan ia jni tuku. Ndidaa dini ñayii kuáchi, ndada ndoo ni ndaꞌa ni, san ndida dini ñayii uu stoꞌon xi ndada ndaa ni xanaa ni. 9 Ndu ndaꞌvi xanaa ni, nata-uꞌu ni san ndaꞌyu ni. San ma kuaku ka ni, guaꞌa ka ndaꞌyu ni. San ma ku-iꞌni ni guaꞌa ka ndundaꞌvi xanaa ni. 10 Nata-uꞌu ni jnu Ndios san Ndios kadakaꞌnu ñaꞌan ia jni.Ma kaꞌan kuiꞌia ni xi xanii ni
11 Ma kodo ndaꞌa taꞌan ni ndidaa mee ni, kuan andu yodo ndaꞌa ñaꞌan xi xanii xi xiꞌin ndakakuachi xi xani xi, yodo ndaꞌa j-ley Ndios xiꞌin ndakakuachi xi j-ley Ndios; san tu dini ndakakuachi ni xi j-ley Ndios, tu duꞌua kida ni san ti kuu ni ñayii xininchisa j-ley Ndios, maska sa nduu ni en juez. 12 Doko meni Ndios kuu ia táxi ley, ia guaꞌa ni kada sa nanitaꞌvi adi kuita ñayii; doko dini, nasa kuu ni juandiku ndakakuachi ni xi enka ñayii?
Ndidaa ñayii ti io seguru nasa taꞌan yutsa
13 San vita, ndidaa dini tsa duꞌua kaꞌan: “Vita adi yutsa kiꞌin ndo ñuu yaꞌa adi ñuu yukua, san koo ndo juan en kuia, san kueen ndo san diko ndo san niꞌi ntseꞌe ndo tuini”, 14 san nisa ti xini ni nasa kuu yutsa,b kuan xuyii ni kuu kuenta en viko yaa sa nakagua san danduu saꞌan. 15 Lugar sa na kachi ni: “Tu Ndios na kachi sa nakoo ndo yutsa san kada ndo chiion yaꞌa chiion yukua.” 16 Doko dini ndidaa ni kaꞌan iꞌni ni kuenta ndidaa ñayii iꞌni, san ndidaa sa iꞌni yaꞌa sa kuiꞌia kuu. 17 San ñayii xini kada sa guaꞌa san ti kida, kuachi kuu xi ñayii yaꞌa.