Ku kia ndo viꞌi kaa doko ii ntseꞌe
3
Xanii, ma kada ndidaa nika ni nchu ku kuu tsa dakuaꞌa ñaꞌan s-toꞌon Ndios sa io ni ndidaa ni xan, kuan sa xini ni sa ndidaa tsa dakuaꞌa ñaꞌan s-toꞌon Ndios, kuaꞌa ntseꞌe ka kuidokuachi tsa. 2 Kuan kuaꞌa guelta kaꞌan kuiꞌia ndo ndidaa ndo, san tu io en ñayii ti kaꞌan kuiꞌia, ñayii yaꞌa ku en ñayii io ndaa, xiꞌin en ñayii tastuni xikikoño xi. 3 Kuan chiꞌi ndo frenu xuꞌu en kiti ndasa na kuntsaka ñaꞌan ndo ste ami nchoj mee ndo sa kiꞌin te. 4 Duꞌua ni ndidaa barku kuan tuku: Kuani duꞌua naꞌnu doko viꞌi kaa en timón yiki dakani ñaꞌan xi, san duꞌua saꞌan ami ichi nchoxi tsa dakaka ñaꞌan xi. 5 Duꞌua ni kuu xaa ñayii tuku, viꞌi kaa en koño kuu, doko kunaꞌnu ntseꞌe xiꞌin sa kida. Ntsaꞌa ni sa kida en tindiki, dakayu en yuku kaꞌnu san kuani kuu en tindiki. 6 San xaa ñayii kuu na en tindiki; kuan kuu kuenta en ñuyii chitu sa kuiꞌia. Yaa ya kuu en sa io xi ku kikikoño ndo san jaꞌa kida kuiꞌia ñaꞌan ku ndo san dakuiko ñaꞌan xi ñuyii yaꞌa, san xiko kida sa uꞌu sa ndaꞌvi. 7 Kuan ndidaa ntso ñayii kida masu ndo kuaꞌa ntseꞌe kititata, tantu kiti ndagua san duꞌua kiti vii ndiñuꞌu mee, san duꞌuani kiti vii io xiti ndutsa, ndidaa kitiaꞌa kida masu ndo. 8 Doko ti en ndo kachi kada masu xaa xi, sa kuu en sa kuiꞌia ti kachi naten ndo, sa chitu venenu sa saꞌni ñaꞌan. 9 Xiꞌin ku kiaa ndo ya kidakaꞌnu ndo Ndios ia kuu ku Tata ndo san dini xiꞌin yaa yaꞌa kaꞌan kuiꞌia ndo xi ñayii kuguaꞌa san ndee ñaꞌan xi ia.a 10 San xiꞌin yuꞌu yaꞌa kaꞌan guaꞌa ndo xiꞌin kaꞌan kuiꞌia ndo. Xanii ti guaꞌa sa duꞌua ku kuu ndo. 11 Kuan sa kana ndutsa ti kana ndutsa bidi xiꞌin ndutsa ugua. 12 Xanii, ma kachi kee aceituna tu tichikaꞌakuxi san nisa tichikaꞌakuxi tu tinchiꞌo. San duꞌua tuku ti kana ndutsa bidi xiꞌin ndutsa ada en xichi ni.Nasa kuu sa kutuni nchisa
13 Andu kuu sa kutuni xi xiꞌin sakuituni xanaa xi sa io ni ndidaa ni xan, na dadana ñaꞌan modo io xiꞌin sa guaꞌa kida san kadi ni na kada. 14 Doko tu meni sa kuiño xiꞌin sa nandodo ñoꞌon xanaa ni ma ku iꞌni ni san nisa ma kada naꞌntsa ni xi sa ndaa. 15 Sa kutuni xi yaꞌa adii nino yukua kee, kuan ñuyii yaꞌa kee, kuu xaꞌan ñayii ti xininchisa ñaꞌan xi Ndios xiꞌin xaꞌan sakakuiꞌia kuu. 16 Kuan ami io sa kuiño xiꞌin sa nandodo taꞌan, juan io sa dadana taꞌan xiꞌin ndidaa ndituꞌu sa kuiꞌia. 17 Doko sa kutuni kee nino yukua kuu menina ni, san kida sa kadi ni nakoo ñayii, kida sa na ku kuu guaꞌa ñayii, sa guaꞌa, sa kunda-ini ñaꞌan ntseꞌe xiꞌin kida sa guaꞌa, san ti ndekaxi ñayii xiꞌin ti dandaa ñaꞌan. 18 San ndidaa ñayii io kadi, ñayii yaꞌa kida sa na koo sa koo kadi, san juan kida sa sakoo justicia.