Jesús kuu ia kuenta kuu Melquisedec
7
Kuan Melquisedec kuaan kuu rey ñuu Salem xiꞌin d̶utu Ndios Kaꞌnu Ntseꞌe. Kee tsa sanatan ñaꞌan tsa xi Abraham kuaan, kuenta nasaa tsa sa saꞌan tsa sa naa tsa xiꞌin sa kadanar tsa ndidaa rey, san sadaa tsa sa Ndios kada ia sa guaꞌa xi Abraham. 2 San Abraham sañaꞌan tsa en ndiden uxi ndidaa sa niꞌi tsa, sa saꞌan tsa sa naa tsa;a san Melquisedec nchu kachi: “Rey kida sa ndaa”, xiꞌin nchu kachi tuku, rey Salem, san rey Salem nchukachi, “Rey neꞌe sa kookadi ñayii”. 3 Ti en xíni andu kuu raza tsa; san nisa ti káꞌan na ora káku tsa nisa na ora xíꞌi tsa; san kuu tsa kuenta D̶aꞌa Ndios, kuu tsa dutu ndidaa tiempu.4 Ntsaꞌa ni ndidaa ni, naku ntseꞌe da kaꞌnu kuu Melquisedec, kuan ntsandeꞌe ku tadeꞌe ndo Abraham sañaꞌan tsa, en ndiden uxi ndidaa sa teen tsa xi ndidaa rey kidanar tsa, tsa náa xiꞌin tsa. 5 Sa ley chidotuni Moisés kachi, sa ndidaa dutu tsa ku raza Leví táꞌvichiion s-tsa sa na teen tsa en ndiden uxi sa niꞌi ndidaa ñayii ñuu,b san kuani ndidaa tsa yaꞌa kuu j-raza Abraham, kuenta kuu Leví kuaan tuku. 6 Doko Melquisedec kuani ti kuu tsa j-raza Leví, teen tsa en ndiden uxi xi Abraham, san xikataꞌvi tsa sa saꞌa Abraham, tsa kuu tsa niꞌi toꞌon sadaa Ndios sa kuañaꞌan ia. 7 San ndidaa ndo xini sa tsa kunaꞌnu xika tsa sa guaꞌa jnu Ndios sa kuxi tsa ku luchi. 8 San ndidaa dutu teen en ndiden uxi sa niꞌi ndidaa ñayii ñuu, kuu ñayii xiꞌi; doko tsa nakeꞌen en ndiden uxi io juan kaꞌan sa nchito tsa. 9 San guaꞌani kachi ndo sa Leví tsa teen en ndiden uxi, sa cháꞌvi tsa xi Melquisedec sa saꞌa Abraham; 10 kuan io daa tsa j-niñi Abraham kuenta kee Melquisedec sa natan ñaꞌa tsa xi Abraham.
11 Tu sa ndu ñayii modo sani-íni Ndios niꞌi sa saꞌa ndidaa dutu levita (kuan sa saꞌa ndidaa tsa yaꞌa niꞌi ndidaa ñayii ñuu kuaan ley) ti io ka nisidaa sa ndukoo enka dutu kuenta kuu Melquisidec, tsa ti kúu en dutu levita kuenta kúu dutu Aarónc. 12 Kuan tu na nadama na ñayii ku kuu dutu, nandeꞌe sa nadama ley kuaan tuku. 13 Doko tsa ndaa ndo s-toꞌon xi jaꞌa kuu en tsa io enka tribu, san ti en tsa xínokuachi jnu altar. 14 Kuan xiniguaꞌa ndo sa ku toꞌo ndo kee ia tribu judá, san tribu yaꞌa ti káꞌan Moisés nisa dana sa kee dutu.
15 San duꞌua danaꞌa ndaa ka sa ndukoo enka dutu kaa kuenta kaa̱ Melquisedec, 16 nduu ia dutu kuani ti kuu ia tribu taꞌvichiion ley na modo na kukoo ndidaa dutu kuaan chiion, maska sa neꞌe ia sa tastuni en ñuyii ti en datani. 17 Kuan s-toꞌon Ndios duꞌua yodotuni:
Yoꞌo kuu dutu ndidaa tiempu
kuenta kúu Melquisedec.d
18 San duꞌua sa táꞌvichiion diꞌna na modo na ku koo ndidaa dutu kuan chiion, ti xaꞌvi ka xi kuan ti nandeꞌe, 19 kuan ley ti ndada ñaꞌan xi ñayii modo sani-íni Ndios. Doko saa enka sa guaꞌa ka ñoꞌon ku kuanaa ndo, san sa saꞌa xi sa guaꞌa yaꞌa tuꞌua ndo Ndios.
20 San dutu yaꞌa sáni Ndios san chonaꞌa ia. Kuan ndidaa ka dutu sani ia ti chonaꞌa ia, 21 doko ia yaꞌa kida ñaꞌan ia dutu, san duꞌua chonaꞌa ia, kuenta yodotuni:
Duꞌua chonaꞌa ia san ma nayuꞌu ia:
“Yoꞌo kuu yo dutu ndidaa tiempu,
kuenta kúu Melquisedec.”e
22 San duꞌua juandiku mee Jesús kuu yunuu tratu guaꞌa ka. 23 San ndidaa ka dutu yukua kuaꞌa ntseꞌe tsa kaya, xu kuu tsa san ti xu kachi ka kada tsa x-chiion tsa. 24 Doko Jesús io ia ndidaa tiempu san x-chiion ia ti dama sa kuu ia dutu. 25 San juandiku guaꞌani kuañaꞌan ia sa nanitaꞌvi oni oni ndidaa ñayii na tuꞌua jnu Ndios, sa saꞌa ia san io ia ndikii sa kaka ia xi Ndios sa saꞌa ndidaa ñayii yaꞌa.
26 Jesús kuu dutu kunaꞌnu nandeꞌe ku ndo: Kuan kuu ia, ia xu taꞌa-ini ñaꞌan Ndios xi, ti xidokuachi ia, ti ku kuiꞌia ia, ti xu kada ia sa kida ndidaa ñayii io x-kuachi xi, san niꞌi ia sa kukaꞌnu ntseꞌe ia ndidaa andivi. 27 Jesús ti kuu ia kuenta ndidaa ka dutu kunaꞌnu, tsa nandeꞌe sa doko ndikii, kuan saꞌni tsa kiti tata san diꞌna ka sa kuxi x-kuachi tsa saꞌni tsa te, san danduu sa saꞌa x-kuachi ñayii ñuu.f Doko Jesús ti duꞌua kída ia, kuan na kuañaꞌan ia xuyii ia endini guelta, sa ma kada ka ia jaꞌa noni noni. 28 Kuan ley kida ñaꞌan dutu kunaꞌnu xi ñayii ti yakui, doko toꞌon chonaꞌa Ndios sa kaꞌan ia danduu kuenta sa io ley, kída ñaꞌan ia dutu xi D̶aꞌa ia, ia nduu sa sani-íni Ndios sa ku kuu.