Ma d̶ana ni ndidaa sa ndaa tsaku jni
2
Juandiku nandeꞌe sa nduku ntsee ndo xiꞌin ndidaa sa tsaku ku ndo, kuan na kada dana ndo sa ndaa. 2 Kuan tu ndidaa toꞌon kaꞌan ndidaa ángel kuu sa ndaa, san ndidaa ñayii ti xininchisa xiꞌin xido ndagua sa nandeꞌe sa kada, kída ñaꞌan xi san duꞌua cháꞌvi sa saꞌa sa kída, 3 Kuiꞌia ka taꞌan ntsoo ndidaa ndo tu ma kuneꞌe kuenta ndo salvacion taxi Ndios ku ndo. Kuan mee ku Toꞌo ndo kuu ia káꞌan toꞌon guaꞌa yaꞌa, san danduu kaꞌan ndidaa ñayii tsaku xi, 4 san duꞌua ni Ndios dadana ñaꞌan ia kuaꞌa señal xiꞌin milagru xiꞌin sa danaꞌa sa tastuni ia sa nchu kachi sa ndidaa jaꞌa kuu sa ndaa, xiꞌin sañaꞌan ia don xi ndidaa ñayii nchu kuaꞌa ia sa saꞌa Espíritu Santu.Ia kuu yiki xiꞌin koño
5 Kuan Ndios ti sañaꞌan ia sa tastuni ndidaa ángel ñuyii vaxi sa ndaa ndo s-toꞌon xi. 6 Kuan duꞌua yodotuni S-toꞌon Ndios:
Andu kuu ñayii, kuan nakaꞌan ñaꞌan ni,
ña nasa kuu d̶aꞌa tsayeea juandiku kunda-ini ñaꞌan ni
7 Saku ni kida luchi ñaꞌan ni sa kuxi ndidaa ángel; choꞌon ni d̶iki tsa en corona gloria xiꞌin sa kunaꞌnu tsa
san na en rey kidakaꞌnu ñaꞌan ni;
san sañaꞌan ni ndidaa sa kídaguaꞌa ni xiꞌin ndaꞌa ni sa na tastuni tsa;
8 Ndidaa sa io sañaꞌan ni sa na tastuni tsa.
San nachiꞌi ni ndaꞌa d̶aꞌa tsayee sa na tastuni tsa ndidaa ndituꞌu sa io. San atuu dana sa kendoo duꞌua sa ti yeꞌe ndaꞌa ia. Doko vita kini ka ndo sa tastuni tsa ndidaa sa io. 9 Doko vita ntsaꞌa ndo tsayee kida luchi ñaꞌan xi taꞌa dini ka sa kuxi ndidaa ángel ia kuu Jesús, ia ñoꞌon diki xi en corona gloria xiꞌin sa kunaꞌnu kuan taꞌan ntseꞌe ia sa xiꞌi ia, san sa saꞌa j-gracia Ndios kida sa xiꞌi ia sa saꞌa ndo ndidaa ndo.
10 Kuan duꞌua nataꞌan xanaa ia kída guaꞌa ndidaa sa io, kuan sa saꞌa ia yaꞌa io. Nataꞌan xanaa ia sa ndada ndaa ñaꞌan ia, xi ia na kada sa kuaꞌa ntseꞌe ñayii na kiꞌin sa tastuni ia, juandiku taꞌan ntseꞌe ia sañaꞌan sa nanitaꞌvi ma ndeꞌe xi ñayii ya. 11 Juandiku Jesús ia ndada ii xiꞌin ndidaa ñayii ndada ii ñaꞌan xi kuu xaꞌan endini Tata, juandiku ti kukaꞌan jnu ia sa danani ñaꞌan ia xani ia. 12 San kachi ia:
Kii na nataka da xiꞌin ndidaa xani da,
kata da san kadakaꞌnu ñaꞌan da ni xiꞌin kaꞌan da sa kuu ni ñayii kuu xaꞌan ni.
13 San duꞌua yodotuni tuku:
Koꞌon xanaa da Ndios.b
San danduu kachi:
Ntsaꞌa ni ka adi da yaꞌa xiꞌin ndidaa daꞌa taxi Ndios da.c
14 Ndidaa daꞌa yaꞌa kuu yiki xiꞌin koño, juandiku Jesús kúu ia yiki xiꞌin koño tuku. Ndasa na kuu ia san sa saꞌa sa xíꞌi ia, kída sa datani ia sakakuiꞌia sa neꞌe sa tastuni muerte, 15 sa xíꞌi ia kída sa díta ia sa yuꞌu ndidaa ñayii sa kuu ñayii, kuan xu keꞌe ñayii ndaꞌa muerte kuenta en esclavu. 16 San duꞌua ti kíxi ia sa chintsee ia ndidaa ángel, kíxi ia ki chintsee ia ndidaa ñayii kuu raza Abraham. 17 San nandeꞌe sa ku kuu ia duꞌua kuenta kuu ndidaa xani ia, ndasa na kunda-ini ñaꞌan ia, na chintsee ñaꞌan ia xiꞌin na kuinokuachi ndaa ia kuenta en dutu kunaꞌnu ntseꞌe jnu Ndios, ndasa na koo sa kaꞌnu-ini sa saꞌa x-kuachi ñuu. 18 Kuan táꞌan ia xiꞌin xítotuni ñaꞌan xi ia, juandiku guaꞌa ni chintsee ia ñayii xitotuni ñaꞌan xi tuku.