Ndidaa sa guaꞌa na dakuaꞌa ñaꞌan
2
Doko yoꞌo dakuaꞌa ñaꞌan sa kachi sa ndaa, sa ku toꞌon guaꞌa kutuꞌua yo. 2 Ndidaa tsa savaꞌa nchoxi sa na ku kuu tsa en ñayii sani-ini ndaa, ñayii xininchisa ñaꞌan xi, ñayii sani-ini guaꞌa nasa kida, ñayii xininchisa ndaa, ñayii xinimani xiꞌin nee xanaa xi, ñayii kuyakui ndidaa sa taꞌan.3 Duꞌua ni ndidaa ña savaꞌa tuku, nandeꞌe sa ku kuu yeñuꞌu ña modo io ña, san ma ku kuu ña ñayii da kuidokuachi ñaꞌan, nisa ma ku kuu ña en ña xini. Na ku kuu ña en ñayii dakuaꞌa ñaꞌan sa guaꞌa, 4 san na dadana ñaꞌan ña xi ndidaka ña kuachi sa na kinimani ña xee ña xiꞌin na kinimani ña d̶aꞌa ña, 5 sa na ku kuu ña en ñayii sani-ini guaꞌa sa kida, ña kadi ni io, ña xinokuachi xeꞌe xi, ñayii guaꞌa, ña xininchisa ñaꞌan xi xee xi, ndasa ma en kaꞌan kuiꞌia xi s-toꞌon Ndios.
6 San duꞌua ni taꞌvichiion xi ndidaa nu kuachi xan sa na ku kuu nu ñayii sani-ini guaꞌa sa kida. 7 Doko yoꞌo kani saꞌa xiꞌin ndidaa sa guaꞌa kida yo xan ndasa duꞌua na kutuꞌua nu, san ora dakuaꞌa ñaꞌan yo kada ndaa kachi, ku kuu en ñayii xininchisa ñaꞌan xi. 8 Dakuaꞌa ñaꞌan toꞌon ndaa xiꞌin toꞌon ti en na kaꞌnu, ndasa ñayii kaꞌan kuiꞌia ku ndo ndidaa ndo na kukaꞌan jnu xi, san ma en kaꞌan kuiꞌia ku ndo ndidaa ndo.
9 Taꞌvichiion xi ndidaa tsa kidachiiona sa na kininchisa tsa s-toꞌo tsa. San na kada tsa sa na na taꞌan xanaa s-toꞌo tsa, san ma naxikoneꞌe tsa, 10 ma ku kuu tsa ñaduꞌu, maska sa na ku kuu tsa ñayii guaꞌa ni kukaꞌnu-ini ñaꞌan xi, ndasa na danaꞌa sa vili kuu ndidaa sa guaꞌa dadana ñaꞌan Ndios ia kida sa nanitaꞌvi ndo.
11 Kuan j-gracia Ndios nanuu ndasa na nanitaꞌvi ndidaa ñayii. 12 San sa saꞌa j-gracia ia kutuꞌua ndo sa na dandoo ndo sa kida ndo, sa ti nataꞌan xanaa ia, xiꞌin na dandoo ndo ndidaa sa nchoj ntsaa ndo ñuyii yaꞌa, san na koo ndaa ndo ñuyii yaꞌa, na kada ndo sa ndaa, xiꞌin nakada ndo sa nataꞌan xanaa Ndios, 13 san na kuntsatu ndo sa guaꞌadiko xiꞌin sa sandutsa ndixi Jesucristu ia kuu ku Ndios kaꞌnu ndo ia kida sa nanitaꞌvi ndo. 14 Kuan na kuañaꞌan ia mee ia sa saꞌa ndo ndidaa ndo, san duꞌua cháꞌvi ia sa saꞌa ndidaa ku kuachi ndo san ndada ndoo ñaꞌan ia ndasa na ku kuu ndo xaꞌan ia, san na nduku ntsee ndo sa kada ndo sa guaꞌa.
15 Ndidaa toꞌon yaꞌa dakuaꞌa ñaꞌan xiꞌin taꞌvichiion san den kaꞌan xiꞌin sa tastuni io xo. ¡San ma en kaꞌan sa ti xaꞌvi yo!