CARTA KU UU CHÍDOTUNI PABLO XI TIMOTEU
Kada ntse-ini yo
1
Ntsuꞌu kuu Pablo x-apóstol Jesucristu, kuan duꞌua nchóxi Ndios, sa kachi ia sa kuu ñuyii sa niꞌi ndo sa saꞌa Jesucristu; 2 sa kuxi Timoteu, nu kuu na ku daꞌa ntsu nu nchoj ntseꞌe ntsu: Ndios ia kuu ku Tata ndo xiꞌin ku Toꞌo ndo Jesucristu, na taxi ia x-gracia ia xiꞌin sa kunda-ini xo san kadi ni nakoo yo.Kaꞌan sa kuu Jesucristu
3 Sañaꞌan ntsu taxaꞌvi xi Ndios, ia xinokuachi ntsu xi kuenta xu kuinokuachi ndidaa ku tadeꞌe ntsu, ndasa ma en sa kuidokuachi ntsu, sa ndikii nakaꞌan ñaꞌan ntsu xo san xika ntsu xi Ndios sa saꞌa yo nduu xiꞌin niñu. 4 Ndiden na kaꞌan ntsu na modo xu ndaꞌyu yo juan kida sa nchu kini ñaꞌan ka ntsu xo. Ndasa na ku iꞌni ntsu, 5 kuan nakaꞌan ntsu sa sa xininchisa io xo kuu sa ndaa. Kuan diꞌna ka xita yo Loida ío xi xiꞌin ío xi jnana yo Eunice san xini ntsu sa yoꞌo io xo tuku.
6 Juandiku taꞌvichiion ntsu xo sa duꞌua kuenta nakuiko ñuꞌun, duꞌua na kada yo xiꞌin don táxi Ndios xo kuenta sakindodo ñaꞌan ntsu ku ndaꞌa ntsu yoa. 7 Kuan Ndios ti nchoxi ia sa na ku kuu ndo ñayii na yuꞌu, maska sa táxi ia sa tastuni ndo, sa xinimani xiꞌin sa tastuni ndo ku kikikoño ndo. 8 Juandiku ma kukaꞌan jnu yo sa kaꞌan yo s-toꞌon ia kuu ku Toꞌo ndo, san nisa ma ku kaꞌan jnu yo sa yeꞌe ntsu vekaa sa saꞌa ia. Guaꞌa ka, kuyakui ndidaa sa taꞌan yo sa saꞌa toꞌon guaꞌa ya kuan Ndios chintsee ñaꞌan ia xo ndasa na kuyakui yo. 9 ia kída sa na nitaꞌvi ndo xiꞌin kana ñaꞌan ia ku ndo xiꞌin toꞌon ii, adi sa saꞌa ndidaa sa guaꞌa kída ndo, maska sa duꞌua sani-ini mee ia xiꞌin gracia táxi ia sa saꞌa Jesús ia kuu Cristu ntsa antika sa kuguaꞌa ñuyii; 10 Doko vita sa ketuu Jesucristu ia kida sa nanitaꞌvi ndo, ia díta sa xiꞌi, san kída ia sa na ketuu ñuyii xiꞌin ma koo ka sa ndeꞌe ñayii sa saꞌa toꞌon guaꞌa ya, 11 san sa saꞌa toꞌon guaꞌa yaꞌa kuu ntsu tsa kanandodo xiꞌin x-apóstol Jesucristu xiꞌin maestru xi ndidaa ñayii ti kuu ñuu Israel. 12 San juan kida sa taꞌan ntseꞌe ntsu, doko ti kukaꞌan ku nuu ntsu; kuan ntsuꞌu xiniguaꞌa ntsu andu xíninchisa ntsu san xini guaꞌa ntsu sa ia yaꞌa tastuni sa kada ia sa kachi ia ku ntsu, na saa kii yukua.
13 Ma nadama yo ndidaa toꞌon ndaa tsáku xo sa káꞌan ntsu xo, xiꞌin sa xininchisa xiꞌin sa xinimani io xi Jesucristu. 14 Sa saꞌa Espíritu Santu ia io ku kuanaa ndo kuneꞌe guaꞌa ndidaa sa dákuaꞌa ñaꞌa xo.
15 Sa xini yo sa ndidaa tsa io Asia dandoo ñaꞌan tsa ku ntsu en tsa ku tsa nani Figelo xiꞌin enka tsa nani Hermógenes; 16 ia kuu ku Toꞌo ndo na kunda-ini ñaꞌan ia xi xayii tsa nani Onesíforo, kuan kuaꞌa ntseꞌe guelta ki koto ñaꞌan tsa kuntsu, san ti kukaꞌan jnu tsa sa nuꞌni ntsu xiꞌin cadena. 17 Kuan kuenta kij tsa Roma san nanduku ñaꞌan tsa kuntsu, sa ti kukuin noo tsa ntsa naniꞌi ñaꞌa tsa. 18 San ia kuu ku Toꞌo ndo na kada sa na niꞌi tsa sa na kunda-ini ñaꞌan ia kii yukua. San yoꞌo xini guaꞌa yo sa chíntsee ñaꞌan ntseꞌe tsa ku ndo kuenta io ndo Éfeso.