6
Ndidaa tsa seen ñaꞌan xi sa ku kuu esclavu na ku kuu guaꞌa tsa xi s-toꞌo tsa, kuan ndasa ma kaꞌan kuiꞌia xi ku Ndios ndo xiꞌin sa dakuaꞌa ñaꞌan ndo. 2 San tu andu io s-toꞌo xi xininchisa ñaꞌan xi Jesucristu, ma kada juan kada sa ma kininchisa ñaꞌan ka tsa, kuan kuu tsa xani tsa. Maska sa nandeꞌe sa kuinokuachi guaꞌa ka tsa, kuan tsa xinokuachi tsa jnu xi kuu xani tsa xiꞌin tsa xininchisa ñaꞌan xi Jesucristu. Jaꞌa dakuaꞌa ñaꞌan xiꞌin kaꞌan.Sa kunda-ini xiꞌin sa ku iꞌni nchisa
3 San tu andu dakuaꞌa ñaꞌan enka toꞌon san ti na taꞌan xanaa xi s-toꞌon ia kuu ku Toꞌo ndo Jesucristu xiꞌin ndidaa toꞌon guaꞌa dakuaꞌa ñaꞌan ndo ndasa na koo guaꞌa ñayii xiꞌin Ndios, 4 tsa yaꞌa sani ini tsa sa ndidaa xini tsa doko ti xini tsa nisadana, san danaꞌa s-tsa ndidaa sa kaꞌan tsa kuan nchu natoꞌon ntseꞌe tsa san juan kida sa kaku ndidaa sa kuadu, sa naa ndodo taꞌan, sa kaꞌan kuiꞌia tsa xi Ndios, sa sani-ini kuiꞌia, 5 xiꞌin sa naa, san jaꞌa kuu ndidaa ñayii ti neꞌe sa ndaa kuan ti xini ka tsa nasa kuu sa ndaa san meni ka sa sani-ini tsa sa ku kuika tsa xiꞌin s-toꞌon Ndios; ma kotaꞌan taꞌan yo ndidaa ñayii duꞌua senchiion. 6 Kuan sa koo guaꞌa ndo xiꞌin Ndios kuu sa guaꞌa xiꞌin tu kadi ni io ndo xiꞌin sa io ku ndo. 7 Kuan nisa dana ti neꞌe ndo vaxi ñuyii yaꞌa, san nisa dana ma kuneꞌe ndo kiꞌin tuku. 8 Kuan tu io sa kaj ndo xiꞌin doꞌno kuiꞌno ndo kadi ni na koo ndo xiꞌin. 9 Kuan ndidaa ñayii nchu ku kuika, xitotuni ñaꞌan xi san kikagua ndaꞌa ndidaa sa kuiꞌia ti nandeꞌe sa sakuntsaka ñaꞌan xi ñayii saꞌan sa ndeꞌe ñayii xiꞌin sa kuita ñayii. 10 Kuan sa nchoxi ndidaa ñayii tuini juan kida sa kaku ndidaa sa kuiꞌia; sa juan ndúku uu ñayii, san dana tsa sa xininchisa tsa san táꞌan ntseꞌe tsa sa saꞌa xi.
Nduku ntsee sa saꞌa sa xininchisa yo
11 Doko yoꞌo, nu kuu ñayii xinokuachi xi Ndios xiko kuin sa io ndidaa sa kuiꞌia xan san kunchiko sa ndaa, sa koo guaꞌa yo xiꞌin Ndios, sa xininchisa, sa xinimani, sa kuyakui, sa ku kuu ñayii kaꞌnu xanaa xi. 12 Kuindaa xiꞌin sa xininchisa yo; choꞌon xanaa yo ñuyii ma ndeꞌe, sa kána ñaꞌan xo kuenta tuꞌu naꞌma yo jnu kuaꞌa ntseꞌe ñayii xini sa kida yo. 13 Taꞌvichiion ntsu xo sa saꞌa Ndios ia sañaꞌan ñuyii xi ndidaa sa io, xiꞌin sa saꞌa Jesús ia kuu Cristu, ia káꞌan sa ndaa jnu Poncio Pilatu, 14 sa na kada yo ndidaa toꞌon guaꞌa yaꞌa modo kachi ndasa ma en da kuidokuachi ñaꞌan ntsa na ndixi ku Toꞌo ndo Jesucristu. 15 Kuan na taꞌan kii, kada sa na nanuu ia guaꞌadiko, ia tastuni ndidaa tiempu, ia kuu j-Rey ndidaa tsa kuu rey xiꞌin ia kuu s-Toꞌo ndidaa tsa tastuni; 16 ia kuu unico ia ti xiꞌi, ia io sa io sa dayeꞌe san nisa en ñayii ti kachi kuyachi jnu xi, ia nisa en ñayii ti xini ñaꞌan xi xiꞌin ma kachi kini ñaꞌan xi, ia yaꞌa na keñuꞌu xiꞌin ia yaꞌa na tastuni ndidaa tiempu. Duꞌua na kuu.
17 Taꞌvichion xi ndidaa ñayii kuika io ñuyii yaꞌa, sa ma ku ku-iꞌni tsa san ma koꞌon xanaa tsa sa kuika, kuan sa kuika ti kudii ndidaa tiempu. Na koꞌon xanaa tsa Ndios nchito ia taxi ndidaa sa nandeꞌe ku ndo xiꞌin sa guaꞌa kundo. 18 Na kada tsa sa guaꞌa, san ndidaa sa guaꞌa yaꞌa na koo vaa s-tsa xiꞌin na koꞌon xanaa tsa sa chintsee ñaꞌan tsa xi ñayii xiꞌin sa io s-tsa, 19 duꞌua choꞌon guaꞌa tsa sa kuxi tiempu vaxi ndasa na kuin ndaa tsa sa niꞌi tsa ñuyii ma ndeꞌe.
Sa xika Pablo xi Timoteu
20 Timoteu, kada sa taꞌvichiion xo, san ma ku nini yo ndidaa sa kuiꞌia sa duꞌua xiꞌin sa kaꞌan ñayii sa kuu ciencia doko adi sa ndaa kuu; 21 kuan kuaꞌa ñayii xininchisa xíta kida ndidaa juan.
Ndios na taxi ia j-gracia ia xo. Duꞌua na kuu.