CARTA KU UU CHÍDOTUNI PABLO XI NDIDAA ÑAYII XININCHISA IO ÑUU TESALONICA
Kada ntse-ini jni ndidaa ni
1
Dan Pablo xiꞌin Silvanu xiꞌin Timoteu, tsaa da carta yaꞌa sa kuxi ndidaa dini ñayii kuu x-congregación Ndios io ñuu Tesalonica, ñayii nataka xi Ndios ia kuu ku Tata ndo xiꞌin ku Toꞌo ndo Jesucristu: 2 ia yaꞌa na taxi j-gracia ia xiꞌin sa na koo kadi ni ndidaa ni.3 Ndikii nchoxi sa kuañaꞌan da ndidaa da taxaꞌvi xi Ndios sa saꞌa dini ndidaa ni vi xanii, kuan duꞌua nandeꞌe, kuan sa xininchisa ni ndidaa ni xan saꞌnu kuaꞌan san saꞌnu sa xinimani ni ndidaa ka ñayii xininchisa ñaꞌan xi Jesucristu; 4 juandiku ku iꞌni da jnu ndidaa ñayii kuu x-congregación Ndios io ndidaa ka ñuu sa saꞌa ni ndidaa ni. Kuan nakani da na modo kida kaꞌnu ni xanaa ni xiꞌin na modo xininchisa ni kuani daa taꞌan ni xiꞌin xiko ñaꞌan jni. 5 San jaꞌa danaꞌa sa Ndios ku ia ndaka ndaa kuachi, kuan ndasa dini ndidaa ni, na niꞌin ni sa koo ni sa tastuni Ndios ñayii, kuan sa saꞌa sa tastuni yukua juandiku ntseꞌe da taꞌan ni ndidaa ni.
6 Kuan Ndios kuu ia ndaa, juandiku kida ia sa na taꞌan ndidaa ñayii kida sa ntseꞌe da taꞌan ni ndidaa ni, 7 san ndidaa dini tsa taꞌan ntseꞌe taxi ia sa ndexavi ni ndidaa ni duꞌua ni kuenta dan ndidaa da tuku, ora na ndixi Jesucristu ia kuu ku Toꞌon ndo ntsa andivi xiꞌin ndidaa ángel sa tastuni ntseꞌe, 8 xiꞌin sa dayeꞌe ntseꞌe ku ñuꞌu, san kuañaꞌan ia xaꞌvi ndidaa ñayii ti na kininchisa ñaꞌan xi Ndios xiꞌin ti xininchisa s-toꞌon guaꞌa ku Toꞌo ndo Jesucristu. 9 San ndidaa ñayii yaꞌa taꞌan ntseꞌe san ma ndeꞌe, kuan koo xika tsa xi sa sandutsa Ndios xiꞌin sa tastuni ia, 10 ora na ndixi ia, kii yukua san kukaꞌnu ia sa saꞌa ndidaa ñayii ndada ii ia xiꞌin sa nakini ñaꞌan ndidaa ñayii xíninchisa ñaꞌan (kuan ndidaa toꞌon káꞌan da ndidaa da xíninchisa ni ndidaa ni). 11 Juandiku ndikii xika da ndidaa da xi Ndios sa saꞌa ni ndidaa ni, xika da sa na kada ia sa na ni ꞌin taꞌvi ni ndidaa ni sa kána ñaꞌan ia jni, san na kada ia xiꞌin sa tastuni ia ndidaa sa guaꞌa nchu kada ia sa saꞌa ndidaa dini ñayii xininchisa ñaꞌa xi ia, 12 san duꞌua na kadakaꞌnu ñaꞌan xi Jesucristu ia kuu ku Toꞌo ndo sa saꞌa ni ndidaa ni, san duꞌua ni dini sa saꞌa ia, sa saꞌa j-gracia ku Ndios ndo xiꞌin ia kuu ku Toꞌo ndo Jesucristu.