Na modo taꞌan ora na ndixi Jesucristu
2
San vita vi xanii, sa saꞌa xi sa ndixi ia kuu ku Toꞌo ndo Jesucristu xiꞌin sa nataka ndo xiꞌin ia,a xika da ndidaa da jni, 2 sa ma nadama ni sa sani-ini ni adi dakaa ñayii dayuꞌu ñaꞌan jni sa kachi sa kaꞌan xiꞌin en espíritu adi dakaa toꞌon adi carta tsaa da ndidaa da sa kachi sa sa ndíxi ku Toꞌo ndo. 3 Nisa en ñayii ma dadana ñaꞌan jni; kuan antika sa ndixi ia san kuaꞌa ntseꞌe ñayii dando sa xininchisa ñaꞌan xi Ndios san kixi en tsa kida meni sa kuiꞌia, tsa kuu tsa nitaꞌvi sa kuita, 4 tsa yaꞌa kaꞌan tsa x-kontra ndidaa sa kuu Ndios xiꞌin sa chiñuꞌu ñaꞌan xi ia; kuan oni kuu sa yii tsa kuntsaku tsa templu, san kachi tsa sa mee tsa kuu Ndios.5 Ti naꞌa ni sa kuenta io daa da xiꞌin ni ndidaa ni, sa kachi toꞌon da ndidaa toꞌon yaꞌa ña? 6 San vita xini ni andu nundaꞌa ñaꞌan s-tsa, san ketuu tsa doko na taꞌan kii. 7 Kuan sa io ndidaa sa kuiꞌia yukua ñuyii yaꞌa, doko io en sa saꞌntsadagua, ntsa na dita ñaꞌan xi sa io dagua dagua. 8 San ora yukua ketuu sa kuiꞌia yaꞌa, sa kaꞌni ku Toꞌo ndo xiꞌin yoko xuꞌu ni ia, xiꞌin datani ñaꞌan ia xiꞌin sa sandutsa ndixi ia. 9 San sakakuiꞌia kada sa kixi sa kuiꞌia yaꞌa san tastuni ntseꞌe, san kada kuaꞌa ntseꞌe milagru xiꞌin sa naꞌnu doko meni sa naꞌntsa ku kuu,b 10 san kada ndidaa ndituꞌu sa kuu sa kuiꞌia sa dandaa ñaꞌan xi ndidaa tsa kuita, kuan ndidaa tsa yaꞌa ti nchój tsa sa kinimani tsa sa ndaa ndasa na nanitaꞌvi tsa. 11 Juandiku Ndios tsandaꞌa ia en sa dandaa ñaꞌan ndasa na kininchisa ñayii sa naꞌntsa, 12 kuan ndasa na kuidokuachi ndidaa ñayii ti xíninchisa sa ndaa, kuan táꞌan ka xanaa ñayii sa kuiꞌia.
Ndekaj xaꞌan ni sa nanitaꞌvi ni
13 Doko ndikii nchoxi sa kuañaꞌan da ndidaa da taxaꞌvi xi Ndios sa saꞌa ni ndidaa ni vi xanii tsa xinimani ku Toꞌo ndo Jesucristu, kuan ndekaj xaꞌan ia jni ndidaa ni ntsa kuenta kuguaꞌa ñuyii sa na nanitaꞌvi ni, kuan sa saꞌa Espíritu ndekaj xaꞌan ia, ndasa na nduu ii ni sa saꞌa sa xininchisa ni sa ndaa, 14 san kána ñaꞌan ia jni ndidaa ni sa saꞌa ndidaa toꞌon guaꞌa káꞌan da jni, ndasa na kadakaꞌnu ñaꞌan jni xiꞌin ku Toꞌo ndo Jesucristu.
15 Juandiku vi xanii, kuin ndaa ni ndidaa ni san koꞌon xanaa ni ndidaa sa káꞌan jni xiꞌin toꞌon xiꞌin ndidaa sa chidotuni xiꞌin carta jni. 16 San dini ku Toꞌo ndo Jesucristu xiꞌin ku Tata ndo Ndios ia xinimani ñaꞌan ntseꞌe ku ndo, táxi ia toꞌon kaꞌnu-ini ti ndeꞌe xiꞌin chóꞌon ndaa ia ku kuanaa ndo sa saꞌa j-gracia ia, 17 ia yaꞌa na kadakaꞌnu xanaa ni ndidaa ni kuan na kada ni xiꞌin na kaꞌan ni ndidaa sa kuu sa guaꞌa.