DIꞌNA NUU CARTA CHÍDOTUNI PABLO XI TIMOTEU
Kada ntse-ini jni ndidaa ni
1
Ntsuꞌu kuu Pablo, x-apóstol Jesús ia kuu Cristu kuan duꞌua táꞌvichiion Ndios, ia kida sa nanitaꞌvi ndo xiꞌin Jesucristu ia ñoꞌon ku kuanaa ndo. 2 Sa kuxi Timoteua nu kuu ku daꞌa nchisa ntsu sa saꞌa sa xininchisa ndo Jesucristu: Ndios ia kuu ku Tata ndo xiꞌin ku Toꞌo ndo Jesucristu na taxi ia j-gracia xiꞌin sa kunda-ini xiꞌin sa na koo kadi yo.Guaꞌa yo xi ndidaa sa naꞌntsa dakuaꞌa ñaꞌan ndidaa ñayii
3 Kuenta kuaꞌan ntsu Macedonia sakundaꞌvi ntsu jnu yo sa na kendoo yo Efeso, san kachi ntsu yo sa na taꞌvichiion yo xi ndidaa tsa dakuaꞌa ñaꞌan enka modo, sa ma dakuaꞌa ñaꞌan ka tsa, 4 nisa ma kunini tsa ndidaa tsa sa nakani ñayii xiꞌin andu kuu kuu xayii tsa, kuan jaꞌa kida sa naa tsa ndidaa tsa xiꞌin kida sa ti saꞌnu tsa modo io tsa xiꞌin Ndios, sa kuu kida sa saꞌa sa xininchisa, kuenta kachi ntsu diꞌna duꞌua ni kada vita.
5 Kuan sa nchoj ntsu xiꞌin sa taꞌvichion tsu ya kuu sa ndidaa ñayii xininchisa na koo ntseꞌe sa xinimani tsa ndidaa tsa, sa kana xanaa tsa kuan io ndoo, kuan sani-ini guaꞌa tsa xiꞌin in ntsee tsa xiꞌin sa xininchisa tsa. 6 Kuan dagua tsa dandoo tsa ndidaa jaꞌa san nchiko tsa toꞌon ti xaꞌvi xi, 7 san nchu ku kuu tsa ñayii dakuaꞌa ñaꞌa j-ley Ndios, doko nisa ti xini tsa nása kaꞌan tsa xiꞌin ti sakuituni xanaa tsa.
8 Kuan xini ndo sa j-ley Ndios kuu sa guaꞌa tu na kuenchiion ndaa ndo modo kachi. 9 San xini ndo jaꞌa tuku: Sa ley ti vaxi sa kuxi ñayii io ndaa, maska sa sa kuxi ndidaa ñayii xidondagua j-ley Ndios xiꞌin sa kuxi ñayii ti kida sa kachi Ndios, ñayii ti xini ñaꞌan xi Ndios xiꞌin ñayii kida kuachi, sa kuxi ndidaa ñayii ti ku yeñuꞌun, ñayii io kuenta io ndidaa ñayii ñuyii yaꞌa, ñayii saꞌni s-tadeꞌe xi xiꞌin ñayii saꞌni ndii, 10 sa kuxi ndidaa ñayii sakoo xiꞌin ñayii ti tandaꞌa xiꞌin, ndidaa ñayii ndu deꞌe adi ndu yee, sa kuxi ñayii duꞌu ñaꞌan xi ñayii san danduu nadiko ñaꞌan kuenta esclavu, sa kuxi ñayii naꞌntsa, sa kuxi ndidaa ñayii chonaꞌa sa ti kuu, xiꞌin sa kuxi dakaa ñayii ti seniꞌno sa dadana ñaꞌan Ndios, 11 san jaꞌa kuu sa dadana ñaꞌan s-toꞌon guaꞌa Ndios ia na kukaꞌnu, san kukaꞌnu-ini ñaꞌa ia ku ntsu sa na kaꞌan ntsu toꞌon guaꞌa yaꞌa.
Kida kaꞌnu ntsu Ndios kuan kunda-ini ñaꞌan ia
12 Sañaꞌan ntsu taxaꞌvi xi Jesús ia kuu Cristu ia kuu ku Toꞌo ndo kuan chintsee ñaꞌan ia sa na kuindaa ntsu kuan kukaꞌnu ini ñaꞌan ia, juandiku sáni ñaꞌan ia chiion yaꞌa ku ntsu, 13 kuan antes kúu ntsu en tsa xu kaꞌan kuiꞌia xi Jesús, san xu kuiko ntsu ñayiib xiꞌin kuu ntsu ñayii kuiꞌia. Doko Ndios kunda-ini ñaꞌan ia ku ntsu, kuan ti xu kini ntsu nasa xu kada ntsu, kuan ti xu kininchisa ntsu. 14 Doko j-gracia Ndios kaꞌnu ntseꞌe ka san táxi sa xininchisa ntsu xiꞌin xínimani ñaꞌan ntseꞌe ku ntsu sa saꞌa Jesucristu.
15 Sa ndaa ku toꞌon yaꞌa san ndidaa yo nandeꞌe sa kininchisa: Sa Jesús kixi ia ñuyii yaꞌa sa kada ia sa na nanitaꞌvi ndidaa ñayii io x-kuachi xi, san ntsuꞌu ku tsa diꞌna nuu io ntseꞌe ka x-kuachi xi. 16 Doko Ndios kunda-ini ñaꞌan ia ku ntsu diꞌna nuu, ndasa Jesús ia kuu Cristu na chintsee ñaꞌan ia ku ntsu, ntsuꞌu tsa kuu diꞌna nuu kunda-ini ñaꞌan ia xi, ndasa na kini ñayii nchiko vaxi sa na kininchisa san duꞌua na niꞌi ñayii yaꞌa ñuyii ma ndeꞌe. 17 Juandiku, na keñuꞌu Rey io ndidaa tiempu, ia ti ndeꞌe, ia ti danaꞌa, ia kuu uniko Ndios xiꞌin ia kutuni ntseꞌe xi, na kukaꞌnu xiꞌin na keñuꞌu ia ndidaa tiempu. Duꞌua na kuu.
18 Jaꞌa taꞌvichiion ntsu yo vi daa Timoteu, kada x-chiion Ndios xiꞌin nee xanaa yo kuenta kachi ndidaa profecia sa kada yo, san tu na kada yo sa ku kuu yo kuenta en soldadu naa guaꞌa. 19 kininchisa ni on san kada sa xini yo sa kuu sa ndaa, kuan dagua ñayii dándoo sa xininchisa, san xíta tsa. 20 San uu tsa yaꞌa kuu Himeneu xiꞌin Alejandru, tsa nachiꞌi ntsu ndaꞌa sakakuiꞌia, ndasa na kutuꞌua tsa sa ma kaꞌan kuiꞌia tsa xi Ndios.