San s-toꞌon Ndios na kukaꞌnu
3
Juandiku vi xanii kakataꞌvi ni ndidaa ni sa saꞌa da ndidaa da, kuan ndasa s-toꞌon Ndios kama na ku vaa xiꞌin na kadakaꞌnu ñaꞌan xi, duꞌua kuenta kída sa io mee ni ndidaa ni, 2 san káka ni xi ia sa na chintsee ñaꞌan ia d̶a ndidaa da ndasa ma naniꞌitaꞌan da xiꞌin ñayii kuiꞌia, ñayii ñoꞌon sa kuiꞌia xanaa xi; kuan adi ndidaa tsa xaꞌan xi kuu sa kininchisa ñaꞌan xi Ndios. 3 Doko ia kuu ku Toꞌo ndo ku ia ti nadama s-toꞌon xi, san chintsee ñaꞌan ia sa na kuin ndaa ni xiꞌin chintsee ñaꞌan ia ndasa ma kada ni sa kuiꞌia. 4 San ñoꞌon xanaa da Ndios sa kida ni xiꞌin kada ni on ni ndidaa sa taꞌvichiion da ndidaa da jni. 5 San ia kuu ku Toꞌo ndo na koꞌno ichi xanaa ni sa xinimani Ndios xiꞌin sa na kuyakui ni ndidaa sa taꞌan ni, kuenta Jesucristu kuyakui ia ndidaa sa táꞌan ia.Nandeꞌe sa kadachiion ndo ndidaa ndo
6 Xanii, taꞌvichiion da jni sa saꞌa ku Toꞌo ndo Jesucristu, sa ma kotaꞌan ni ndidaa ku kiani ndo io dusa kuan adi jukua kuu sa dákuaꞌa ñaꞌan da ndidaa da jni. 7 Kuan sa xini ndidaa ni na modo nandeꞌe sa koo ni, duꞌua kuenta ío mee da ndidaa da sa io ni xan kuan kuadi ío dusa da ndidaa da sa io ni xan, 8 kuan ti sáj daa da xíta ni, kuan xini mee ni ndidaa ni sa nee-ini xu kadachiion da ndidaa da nduu xiꞌin niñu ndasa ma na koꞌon jni ndidaa ni; 9 san adii sa ti nitaꞌvi da, maska sa duꞌua xu kada da ndasa na kini ni ndidaa ni, san duꞌua na kada ni tuku. 10 San kuenta ío da ndidaa da sa io ni ndidaa ni xan duꞌua taꞌvichiion da: Tu ti en nchu kadachiion sa ma kaxi tuku. 11 Kuan niꞌi toꞌon da sa sa io ni ndidaa xan io uu tsa ti io ndaa, io dusa tsa, san nani nani chitaꞌan tsa ami ti kana ñaꞌan s-tsa. 12 San ndidaa tsa yaꞌa taꞌvichiion da xi, xiꞌin kaꞌan den da xi, sa saꞌa ku Toꞌo ndo ia kuu Jesucristu, sa na kadachiion tsa san na niꞌi tsa sa kaj s-tsa.
13 Doko dini ndidaa ni vi xanii, ma xavi ni sa kada ni sa guaꞌa. 14 San tu dakaa tsa ti nchu kininchisa toꞌon yodotuni carta tsandaꞌa da ya, san ntsaꞌa ni andu kuu tsa, san ma kotaꞌan ni tsa, ndasa na kukaꞌan jnu tsa. 15 Doko ma kada ni s-tsa kuenta en tsa xini uꞌu ni, maska sa kadaa ndaa ni ndidaa sa kuiꞌia kida tsa na xani ni.
Ndios na taxi ia sa guaꞌa sa diko ni ndidaa ni
16 San ku Tata ndo Ndios ia taxi sa koo kadi na taxi ia sa na koo kadi ni ndidaa ni ndikii xiꞌin ndidaa modo, san ku Toꞌo ndo Jesucristu na koo xiꞌin ni ndidaa ni.