5
Doko ndidaa kii adi ndidaa tiempu ti nandeꞌe sa tsaa da jni vi xanii. 2 Kuan xiniguaꞌa ni sa x-kii ia kuu ku Toꞌo ndo ku kuu kuenta kida en ñaduꞌu saa niñu.a 3 Kuan ora na kachi ñayii: “ kadi ni io xiꞌin sa atuu sa taꞌan” san kikii ni kixi sa taꞌan tsa ndidaa tsa, kuenta kixi sa saꞌntsa xiti en ñadeꞌe sa io sa kaku, san taꞌan ntseꞌe tsa ndidaa tsa. 4 Doko dini vi xanii ma koo dana duꞌua ni ndasa ma taꞌan ni kuenta taꞌan ñayii yii ñaduꞌu xeꞌe xi ti xini na ora yii tsa. 5 Kuan dini ndidaa ni kuu ni d̶aꞌa xi sa dayeꞌe xiꞌin nduu. Ti kuu ndo d̶aꞌa niñu nisa sa naa. 6 Juandiku ma koo naa koo duꞌua ndo kuenta ndidaa ka ñayii maska sa na kunchito ndo san na keꞌe ku diki ndo. 7 Kuan ndidaa ñayii xidi, niñu xidi ñayii san ndidaa ñayii naxini, niñu naxini ñayii. 8 Doko ntso sa nchiko ndo j-luz Ndios, ndikii nchoxi sa koo ndo ku juciu ndo. Na nakuiꞌno ndo doꞌno kaa sa tavi ku sata ndo xiꞌin ku nchika ndo, sa kuu sa xininchisa ndo xiꞌin sa xinimani, san na kuindaa ndo san na keꞌe ku diki ndo sa sa io sa kaꞌnu-ini ku ndo. 9 Kuan Ndios ti ndeka xaꞌan ia sa taꞌan ndo sa diko ini ia, maska sa nanitaꞌvi ndo sa saꞌa ku Toꞌo ndo Jesucristu, 10 ia xiꞌi sa saꞌa ndo san kuani na kuu ndo adi na kunchito ndo, na koo ndo ndidaa ndo xiꞌin ia. 11 Juandiku kuaꞌa taꞌan ni ndidaa ni toꞌon kaꞌnu-ini san chintsee taꞌan ni ndidaa ni, ndasa na kutuꞌua ka ni duꞌua kuenta ni neꞌe ni vaxi ndidaa ni.Pablo sadaa tsa nasa nakada ndidaa ñayii xininchisa ñaꞌan xi Jesucristu
12 Xanii, sakundaꞌvi da sa yeñuꞌu yeñuꞌu na ku kuu ni xi ndidaa ñayii kidachion sa kuj ni ndidaa ni, ñayii dadana ñaꞌan jni na modo kunchiko ni Jesucristu xiꞌin dakuaꞌa ñaꞌan jni na modo nandeꞌe sa koo ni. 13 Ku kuu guaꞌa ni tsa ndidaa tsa xiꞌin kinimani ñaꞌan ni s-tsa kuan x-chiion ku Toꞌo ndo kida tsa. San kadivini koo ni ndidaa ni.
14 San sakundaꞌvi da jni ndidaa ni tuku vi xanii, sa na nduden ni xi ndidaa ñayii io duꞌua ni, san chintsee ni ndidaa ñayii nchu na yuꞌu, xiꞌin chintsee ni ndidaa ñayii ti nduku ntsee, san kuyakui ñaꞌan ni s-tsa ndidaa tsa.
15 San ntsaꞌa ni sa ma en tsa naxikoneꞌe sa kuiꞌia xi sa kuiꞌia; guaꞌa ka nduku ni sa guaꞌa xi ndidaa xani ni xiꞌin sa kuxi ndidaa ñayii.
16 San ndikii ku-iꞌni ni ndidaa ni. 17 San ma dana ni sa kakataꞌvi ni. 18 Kuañaꞌan ni taxaꞌvi xi Ndios sa saꞌa ndidaa, kuan jaꞌa kuu sa nataꞌan xanaa Ndios sa kada ni ndidaa ni kuenta guaꞌa kuu ni xaꞌan Jesucristu.
19 Ma kada ni en ladu Espíritu Santu. 20 Ma kada ni en ladu s-toꞌon Ndios sa káꞌan ndidaa tsa tsandaꞌa ia sa na kaꞌan jni; 21 Kani-ini ni ndidaa sa tsaku jni san ndekaj ni sa guaꞌa. 22 Xikokuin ni sa io ndidaa sa kuiꞌia.
23 San Ndios ia taxi sa na koo kadi, na ndada ii ñaꞌan jni nee tuꞌu ni ndidaa ni; san duꞌua nee xikikoño ni, nee x-espíritu ni, xiꞌin x-alma ni, na koo ndoo xiꞌin ma kuido kuachi ntsa kii na ndixi ia ku Toꞌo ndo Jesucristu. 24 San ia kána ñaꞌa jni ti ndantsa ia san san kada ia ndidaa sa kachi ia.
Kada ntse-ini ni ndidaa ni tavin
25 Xanii, kakataꞌvi ni sa saꞌa da ndidaa da.
26 Kaꞌan taꞌan ni xiꞌin ndidaa ku kiani ndo xan xiꞌin nee xanaa ni ndidaa ni.
27 Xika da xiꞌin sa tastuni ku Toꞌo ndo, sa na kaꞌvi carta yaꞌa xi ndidaa ku kiani ndo ndáda ii Ndios.
28 San j-gracia ku Toꞌo ndo Jesucristu na koo xiꞌin ni ndidaa ni. Duꞌua na kuu.