Xuyii ñayii taꞌan-ini Ndios
4
Juandiku ndidaa ni vi xanii, xika da ndidaa da jni sa saꞌa ia kuu ku Toꞌo ndo Jesucristu, kuenta dadana ñaꞌan da jni ndidaa ni, kuenta guaꞌa nandeꞌe sa koo ni ndidaa ni xiꞌin sa kada ni sa na taꞌan xanaa Ndios, duꞌua ni na kaya ka ndikii.2 Kuan ndidaa ni xini nasa dakuaꞌa ñaꞌan da sa kachi ia kuu ku Toꞌo ndo Jesucristu. 3 Kuan sa nchoxi Ndios kuu sa na kada ni sa nataꞌan xanaa ia; san ma koo ni xiꞌin ñayii ti kuu deꞌe ni adi xee ni; 4 san ndiden ndiden na koo deꞌe adi xee ñayii san kadi ni na koo ñayii xiꞌin na koo tsa modo nataꞌan xanaa Ndios, 5 ma kada sa kuiꞌia sa duꞌua kada ni ndidaa ni ora xidi ni ndiaꞌan ni kuenta kida ndidaa ñayii ti xini Ndios; 6 nunca ma en ni duꞌua kada, san dandaa ni xani ni tsa xininchisa; san koo ni xiꞌin d̶eꞌe tsa, kuan ia kuu ku Toꞌo ndo ku ia kuañaꞌan xaꞌvi ñayii duꞌua kida, kuenta sa xini ni ndidaa ni kuan sa kachitoꞌon ndaa da. 7 Kuan Ndios ti kana ñaꞌan ia sa na koo ndo xiꞌin ñadeꞌe ti kuu ku deꞌe ndo adi tsie ti kuu ku kiee ndo, kána ñaꞌan ia sa na koo ndoo ndo. 8 Juandiku andu ti semani toꞌon yaꞌa, adi s-toꞌon ñayii ti semani, maska sa s-toꞌon Ndios ia táxi x-espíritu Santu ia jni ndidaa ni.
9 Doko sa kinimani taꞌan ni ndidaa mee ni sa nisa ti nandeꞌe ka sa chidotuni da ndidaa da jni, kuan sa kutuꞌua ni ndidaa ni xi Ndios sa na kinimani taꞌan ndo ndidaa mee ndo. 10 San duꞌua kida ni xi ndidaa ñayii xininchisa ñaꞌan xi Jesucristu io Macedonia, doko sakundaꞌvi da jni ndidaa ni sa na dakaya ka ni sa xinimani taꞌan ni ndidaa ni. 11 San nduku ni ndidaa ni sa kookadi ni, san kada ni x-chiion mee ni san kadachiion ni xiꞌin ndaꞌa ni, kuenta dakuaꞌa ñaꞌan da ndidaa da jni; 12 ndasa ma dandaa ñaꞌa ni xi ñayii ti xininchisa ñaꞌan xi Ndios xiꞌin ndasa ma kada falta nisadana jni.
Sa ndixi ku Toꞌo ndo
13 Ndidaa dini ñayii xininchisa ñaꞌan xi Jesucristu, nchoj da sa na kini ni nasa kuu sa taꞌan ndidaa ñayii sa xiꞌi, ndasa ma koo ndaꞌvi xanaa ni kuenta ndidaa ñayii ti xininchisa ñaꞌan xi ia. 14 Kuan tu xininchisa ndo sa Jesucristu xiꞌi ia san ndikuu xanaa ia, san duꞌua ni ndaneꞌe ñaꞌan Ndios xiꞌin Jesucristu xi ndidaa ñayii xiꞌi san xíninchisa ñaꞌan xi ia.
15 San toꞌon kaꞌan da ya kachi ia kuu ku Toꞌo ndo: sa ndidaa ntso kuenta guaꞌa nchito ndo, kuenta guaꞌa io daa ndo ntsa na ndixi ia kuu ku Toꞌo ndo, adi diꞌna ka ndo nuꞌu sa kuxi ndidaa ñayii xiꞌi. 16 Kuan ia kuu ku Toꞌo ndo taꞌvichiion ia, xiꞌin s-tachi arcángel xiꞌin s-trompeta Ndios; noo ia andivi; san ndidaa ñayii xininchisa san xiꞌi nandoto diꞌna ka. 17 Danduu ndidaa ntso ñayii nchito, kuenta guaꞌa io daa ndo, na duꞌu ñaꞌan ku ndo ndidaa ndo xiꞌin ndidaa ñayii yaꞌa jnu víko sa na kuaka taꞌan ndo jnu tachi xiꞌin ia kuu ku Toꞌo ndo; san duꞌua koo ndo ndidaa tiempu xiꞌin ia. 18 Juandiku, kadakaꞌnu taꞌan ni xanaa ni ndidaa mee ni xiꞌin ndidaa toꞌon yaꞌa.