CARTA CHÍDOTUNI PABLO XI NDIDAA ÑAYII XININCHISA IO ÑUU COLOSAS
Pablo kaꞌan tsa xi ndidaa ñayii xininchisa ñaꞌan xi Jesucristu io Colosas
1
Dan kuu Pablo x-apóstol Jesucristu, kuan duꞌua nchoxi Ndios xiꞌin Timoteu ku kiani ndo, 2 tsaa da nduu da tutu yaꞌa sa kuxi ndidaa ku kiani ndo ndada ii Ndios xiꞌin ti dandoo sa xininchisa ñaꞌan xi Jesucristu io ñuu Colosas. Ndios ia kuu ku Tata ndo xiꞌin ku Toꞌo ndo Jesucristu, na taxi ia j-gracia ia xiꞌin sa na kookadi ni ndidaa ni.Pablo xikataꞌvi tsa sa saꞌa ndidaa ñayii xininchisa ñaꞌan xi Jesucristu
3 Ndiden xika nduu da xi Ndios sa saꞌa ni ndidaa ni sañaꞌan da taxaꞌvi xi ia kuu s-Tata ku Toꞌo ndo Jesucristu, 4 kuan niꞌi toꞌon da sa xininchisa ñaꞌan ni ndidaa ni xi ia xiꞌin xinimani ni ndidaa ñayii ndada ii ia, 5 sa saꞌa xi sa ñoꞌon xanaa ni sa niꞌi ni sa ñoꞌon guaꞌa andivi sa kuj ni ndidaa ni, san sa tsaku jni ndidaa ni sa ndakuiti sa kuu toꞌon guaꞌa, 6 sa tsáku jni ndidaa ni xiꞌin nee ñuyii. San duꞌua kuenta en tukuiꞌi saꞌnu san kee kuiꞌi, duꞌua kida d̶ini ndidaa ni tuku ntsa kii tsáku jni xiꞌin sakuituni nchisa xanaa ni sa kuu j-gracia Ndios; 7 san jaꞌa kutuꞌua ni xi Epafras tuku,a tsa xinokuachi xiꞌin ndo, tsa xinimani ndo tsa ti dandoo sa xinokuachi xi ia kuu Jesucristu sa saꞌa ni ndidaa ni. 8 Tsa yaꞌa káchitoꞌon tsa namodo xinimani ni ndidaa ni sa saꞌa Espíritu Santu.
9 Juandiku dan nduu da tuku, ntsa kii nitoꞌon da, ti dandoo da sa kaka da xi Ndios sa saꞌa ni ndidaa ni, san xika da ndidaa da sa nakini guaꞌa ni nasa nchoxi ia san na kukuituni xanaa ni xiꞌin na tediki guaꞌa ni ndidaa ni sa saꞌa Espíritu Santu; 10 ndasa na koo ni kuenta nchoxi ia kuu ku Toꞌo ndo, san duꞌua na taꞌan-ini ia ndidaa sa kida ni, san ndidaa sa kida ni na ku kuu sa guaꞌa, xiꞌin na kaya ka sa xini ni Ndios; 11 xika da nduu da xi Ndios sa na niꞌntsee ni sa saꞌa sa ntseꞌe tastuni ia, kuan na kuyakui ni xiꞌin na kukaꞌnu xanaa ni ndidaa sa taꞌan ni, 12 san duꞌua na niꞌi kuañaꞌan ni xiꞌin nee xanaa ni taxaꞌvi xi ia kuu ku Tata ndo, ia kída sa na niꞌi ndo sa niꞌi ndidaa ñayii ndada ii ia, ñayii io xiti sa dayeꞌe ia, 13 kuan kineꞌen ñaꞌan ia ku ndo xiti xi sa naa san ntsakañaꞌa ia ku ndo sa tastuni D̶aꞌa ia xinimani ntseꞌe ia, 14 ia kida sa ma kuidoduachi ka ndo sa saꞌa jniñi ia kuan io ia sakaꞌnu-ini sa saꞌa ku kuachi ndo.b
Jesucristu tastuni ndidaa sa io
15 Jesucristu kuu sa kuu Ndios ia ti danaꞌa, ia tastuni ndidaa sa kuguaꞌa; 16 kuan sa saꞌa ia yaꞌa kuguaꞌa ndidaa sa io andivi xiꞌin nuꞌu, sa danaꞌa xiꞌin sa ti danaꞌa, tu kuu sa tastuni, ña kuu sa tastuni ñaꞌan xi. Ndidaa kuguaꞌa sa saꞌa ia xiꞌin sa kuxi ia. 17 San io ia diꞌnaka sa kuxi ndidaa jaꞌa, san sa saꞌa ia yaꞌa io ndaa ndidaa jaꞌa. 18 San ia yaꞌa kuu d̶iki yikikoño sa kuu x-congregación ia.c San ia yaꞌa kuu ia tastuni ntseꞌe nandoto sa io ndidaa ndii, ndasa na ku kuu ia, ia diꞌna nu xi ndidaa; 19 kuan Ndios nchóxi ia sa ndidaa sa kuu ia na ku kuu Jesucristu, 20 san sa saꞌa ia kuu Jesucristu kída sa na kinimani ia ndidaa sa io nuꞌu ya xiꞌin andivi, kuan sa saꞌa niñi kee Jesucristu kuenta i-nchitakaa ia cruzd kída sa ndumani ia xiꞌin.
21 Kuan dini ndidaa ni enka tiempu ora ti kuu ni xaꞌan Ndios san xu kini uꞌu ni ia, kuan meeni sa kuiꞌia xu kani-ini ni xiꞌin xu kada ni, doko vita na kinimani ñaꞌan ia jni ndidaa ni, 22 Jesucristu nduu ia ñayii ñuyii yaꞌa san xiꞌi ia ndasa na nduu ii ni xiꞌin na ndundoo ni ndidaa ni, san duꞌua ma kuidokuachi ka ni jnu ia; 23 doko nandeꞌe sa kuin ndaa ni xiꞌin sa xininchisa ni ndidaa ni, san ma dana ni ndidaa ni toꞌon guaꞌa tsaku jni kuan juan kaꞌan sa kuu sa ñoꞌon xanaa ni, sa kaꞌan xi ndidaa ñayii io ñuyii; san dan Pablo kuu tsa xinokuachi xi Ndios sa kaꞌan.
Pablo xinokuachi tsa xi ndidaa ñayii xininchisa kuan duꞌua táꞌvichiion s-tsa
24 San vita ku-iꞌni da sa taꞌan da xiꞌin xikikoño da sa saꞌa ni ndidaa ni, san taꞌan ni on da sa saꞌa ndidaa ñayii kuu x-congregación ia, sa kuu xikikoño Jesucristu, 25 san mee Ndios táxi chiion yaꞌa d̶a, sa na kuinokuachi da xi x-congregación ia, san na kaꞌan da sa ndaa kuiti sa kuu s-toꞌon ia jni ndidaa ni, 26 kuan ndidaa jaꞌa na ntsa tiempu yedaꞌvi, doko vita dadana ñaꞌan ia xi ndidaa ñayii ndada ii ia, 27 San ndidaa tsa yaꞌa dadana ñaꞌan ia ndidaa sa naꞌnu xiꞌin sa yedaꞌvi yukua xi, ndidaa ñayii ti kuu ñuu Israel; san sa yedaꞌvi yukua kuu sa Jesucristu io ia xanaa ni ndidaa ni, juandiku sa ntsatu ni ndidaa ni kaꞌnu ntseꞌe.
28 San juan dakuaꞌa ña da nduu da xi ndidaa ñayii, san kaꞌan niꞌi da xi ñayii sa kuu Jesucristu, san dakuaꞌa ñaꞌan da xiꞌin sa kutuni taxi Ndios d̶a nduu da, ndasa duꞌua na koo ndaa ñayii sa kiꞌin ñayii jnu Jesucristu, 29 sa saꞌa xi jaꞌa juandiku ntseꞌe da nduku ntsee da sa kuinokuachi da xiꞌin sa yakui taxi Jesucristu kuan d̶a.