Filipenses 1

CARTA CHÍDOTUNI PABLO XI NDIDAA ÑAYII XININCHISA IO ÑUU FILIPOS

Duꞌua kaꞌan Pablo

Dan Pablo xiꞌin Timoteu tsa xinokuachi xi Jesucristu; tsandaꞌa da carta yaꞌa xi ndidaa ñayii ndadandoo Jesucristu, ñayii io Filipos, xiꞌin sa kuxi ndidaa tsa kuu jnu xi xiꞌin tsa kuu diácono io sa io ni ndidaa ni xan: 2 Ndios ia kuu ku Tata ndo xiꞌin ku Toꞌo ndo Jesucristu, na taxi ia j-gracia ia xiꞌin sa na kookadi ni ndidaa ni.

Pablo xika tsa xi Ndios sa saꞌa ndidaa ñayii xininchisa ñaꞌan xi Jesucristu

3 Sañaꞌan da taxaꞌvi xi ku Ndios ndo ndiden nakaꞌan ñaꞌan da jni ndidaa ni, 4 san ndiden kaꞌan da xi Ndios, xika da sa saꞌa ni ndidaa ni, san xika da xiꞌin nee xanaa da san ku iꞌni ntseꞌe da, 5 ndasa sa saꞌa toꞌon guaꞌa ya eni modo na koo ni ndidaa ni kuenta kída ni ntsa kii niꞌi toꞌon ni san duꞌua ni kada ni ntsa vita; 6 san xini ndaa da sa Ndios, ia kesaꞌa chiion yaꞌa sa io ni ndidaa ni, kada ni on ia ntsa na xino, ntsa kii na ndixi Jesucristu. 7 Guaꞌa ntseꞌe sa duꞌua na kani-ini da sa saꞌa ni ndidaa ni, kuan ndidaa kii ñoꞌon ni xanaa da; kuani ora yeꞌe da vekaa adi ora natavi da toꞌon guaꞌa yaꞌa san sadaa da xi ñayii sa sa ndakuiti kuu, san dini ndidaa ni io gracia yaꞌa jni xiꞌin da. 8 Kuan Ndios xini ia sa xinimani ñaꞌan da jni ndidaa ni, sa saꞌa xi sa xinimani Jesucristu. 9 San jaꞌa kuu sa xika da xi ia: Sa sa xinimani ni na kuaꞌnu ntseꞌe ka ndikii xiꞌin na kini guaꞌa ka ni xiꞌin na kutuꞌua ka ni xi Ndios, 10 ndasa na niꞌi ndekaj ni ndidaa sa guaꞌa ntseꞌe, san duꞌua koo ndoo ni ñuyii san ma koo nisadana sa nachoꞌon jnu ni kii na ndixi Jesucristu, 11 juandiku koo en vida ndaa sa saꞌa Jesucristu, kuan jaꞌa kada sa kaꞌan guaꞌa ñayii xiꞌin kadakaꞌnu ñayii Ndios.

Jesucristu kuu xuyii da

12 Xanii, nchoj da sa na kini ni sa ndidaa sa táꞌan da ya chintsee ñaꞌan sa na kuvaa toꞌon guaꞌa ya. 13 San duꞌua ndidaa ñayii io palaciu xiꞌin ndidaa ka ñayii xini sa yentsadi da xini ñayii sa sa kaꞌan da toꞌon guaꞌa yaꞌa juandiku yentsadi da. 14 Kuaꞌa ku kiani ndo xininchisa ñaꞌan xi Jesucristu niꞌi toꞌon sa yeꞌe da vekaa, san vita ti nayuꞌu ka tsa ndidaa tsa sa kaꞌan tsa s-toꞌon Ndios.

15 San dagua ñayii kaꞌan sa kuu Jesucristu, kuan nchoj tsa sa na kachi ñayii sa ntseꞌe ka tsa sa kuj da xiꞌin ndasa nchu naa tsa, doko dagua tsa kaꞌan xiꞌin nee xanaa tsa. 16 Uu tsa kuan kaꞌan tsa kuan den sa nduku tsa, san adi xiꞌin nee xanaa tsa kaꞌan tsa, maska sa nchoj s-tsa sa na taꞌan ntseꞌe ka da sa yeꞌe da vekaa. 17 Doko dagua ka tsa kuan, kaꞌan tsa sa kuu Jesucristu kuan xinimani ñaꞌan tsa d̶a, san xini tsa sa Ndios sani ñaꞌan d̶a sa na natavi da toꞌon guaꞌa ya. 18 Doko nasa kada dan, ndidaa modo kuani guaꞌa adi uꞌu, doko kaꞌan tsa s-toꞌon Jesucristu san juan ku-iꞌni da. San ku-iꞌni ntseꞌe ka da. 19 Kuan dan xini da sa sa xíkataꞌvi ni xi Ndios xiꞌin sa saꞌa sa chintsee ñaꞌan Espíritu Santu, juan kada sa nayaa da, 20 san juan kuu sa nchoj ntseꞌe da san ma kendoo da sakanuu, san ñoꞌo xanaa da Ndios ndikii, san Jesucristu kukaꞌnu ia sa saꞌa xikikoño da san naskada tu na kuu da ña na kunchito da. 21 Kuan tu na kunchito da, san kuinokuachi da xi Jesucristu san tu nandeꞌe da san guaꞌa ka. 22 Doko tu guaꞌa ka sa na kunchito ndasa na kada da xchion Ndios, ti xini da nasa ndekaj da. 23 Vixi sa ndekaj da dakaa nduu kosa yaꞌa, kuan en xichi nchu ndeꞌe da ndasa na kiꞌin da jnu Jesucristu, kuan juan kuu sa guaꞌa ntseꞌe ka; 24 doko sani-ini da tu na kendoo da san guaꞌa ka kuan sa saꞌa dini ndidaa ni kida. 25 San xini guaꞌa da sa nchoxi ia sa kendoo da juandiku sani-ini da sa kendoo da xiꞌin ni ndidaa ni, ndasa na kutuꞌua ni xiꞌin na ku iꞌni ni xiꞌin sa xininchisa ni Jesucristu, 26 san duꞌua tu nakoo nituku da sa io ni ndidaa ni xan, jaꞌa kada sa kadakaꞌnu ni Jesucristu sa saꞌa da.

27 Juandiku xika da jni ndidaa ni, sa nakoo ni kuenta kachi s-toꞌon guaꞌa Jesucristu, san kuani na kiꞌin da sa io ni adi ñaꞌan, doko na nitoꞌon da sa in ndaa ni ndidaa ni xiꞌin sa xininchisa ni xiꞌin eni sani-ini ni ndidaa ni, xiꞌin en ni kidachiion ni san eni natavi ni toꞌon guaꞌa yaꞌa, 28 san ti yuꞌu ni ndidaa ñayii xini uꞌu ñaꞌan jni ndidaa ni. Jaꞌa danaꞌa sa ndidaa ñayii yaꞌa kuaꞌan tsa sa kuita tsa, doko dini ndidaa ni kuaꞌan ni sa nanitaꞌvi ni. San ndidaa jaꞌa taxi Ndios. 29 Kuan Ndios taxi ia jni ndidaa ni sa saꞌa Cristu, sa adii ni na niꞌi ni sa kininchisa ñaꞌan ni xi ia maska sa na niꞌi ni sa taꞌan ni sa saꞌa ia tuku, 30 Kuan duꞌua ni taꞌan ni kuenta táꞌan dan xiꞌin kuenta taꞌan ni daa da.