CARTA CHÍDOTUNI PABLO XI NDIDAA ÑAYII XININCHISA IO EFESO
Tutu sa chidotuni Pablo sa kuxi ndidaa ñayii io ñuu nani Efeso
1
Dan kuu Pablo x-apóstol Jesucristu kuan duꞌua nchóxi Ndios; tsaa da carta yaꞌa sa kuxi ñayii io Efeso ñayii ndada ii Ndios xiꞌin ñayii xinokuachi ndaa xi Jesucristu:a 2 Ndios ia kuu ku Tata ndo xiꞌin ku Toꞌo ndo Jesucristu, na taxi ia j-gracia ia xiꞌin sa na koo kadi ni ndidaa ni.Sañaꞌan Pablo taxaꞌvi xi Ndios
3 Na kukaꞌnu na kuduku Ndios s-Tata ia kuu ku Toꞌo ndo Jesucristu, kuan káꞌan ia sa guaꞌa sa kuj ndo ndidaa ndo sa saꞌa Jesucristu ntsa andivi kuan. 4 Ndios ndekaj xaꞌan ia kundo sa na kuu ndo enika xiꞌin Jesucristu ntsa antika sa kuguaꞌa ñuyii, ndasa na ku kuu ndo ñayii ii xiꞌin ñayii ti xidokuachi ka jnu ia. 5 Kuan sa saꞌa sa xinimani ia xiꞌin kuan duꞌua nchóxi ia juandiku kída sa nduu ndo d̶aꞌa ia sa saꞌa Jesucristu, kuan duꞌua sáni-ini ia ntsa dína, 6 ndasa na kaꞌan guaꞌa xi j-gracia kaꞌnu ia, kuan xiꞌin j-gracia ia kída sa xinimani ñaꞌan ia ku ndo sa saꞌa D̶aꞌa ia nu xinimani ntseꞌe ia, 7 san sa saꞌa Jesucristu níꞌi ndo sakaꞌnu-ini sa saꞌa ku kuachi ndo, sa saꞌa niñi kée ia, duꞌua táꞌan kuan kaꞌnu ntseꞌe j-gracia ia, 8 san sa saꞌa ndidaa gracia yaꞌa táxi ia sa kutuni xiꞌin sa sakuituni ku kuanaa ndo. 9 ndasa duꞌua na kukuituni ku kuanaa ndo ndidaa sa yeguaꞌa sa sáni-ini mee ia sa kada ia sa saꞌa Jesucristu, 10 San jaꞌa kuu sa sáni ini ia xiꞌin kída ia sa sa saꞌa Jesucristu nádataka ia enika ndidaa sa io andivi xiꞌin sa io nuꞌu.
11 Sa saꞌa ia yaꞌa kída sa niꞌi da ndidaa da sa ku kuu da d̶aꞌa Ndios kuan duꞌua sáni ini ia, ia kida ndidaa ndituꞌu kuenta guaꞌa sani-ini ia, 12 ndasa na kadakaꞌnu da ndidaa da sa tastuni ia, ndidaa dan tsa díꞌna ka ñóꞌon xanaa xi Jesucristu. 13 San sa saꞌa ia yaꞌa dini ndidaa ni tuku, kuenta tsaku jni toꞌon ndaa sa kuu toꞌon guaꞌa sa nanitaꞌvi ñayii, san xíninchisa ni ia, chituni ñaꞌan ia jni xiꞌin Espíritu Santu kachi ia sa taxi ia, 14 san Espíritu Santu niꞌi ndo nchu kachi sa dini niꞌi ndo ndidaa ka sa kachi ia sa niꞌi ndo, ora na kuntsaka ñaꞌan ia ku ndo kiꞌin, kuan seen ñaꞌan ku ndo ndasa na kadakaꞌnu ndo ndidaa sa naꞌnu kuu ia.
Pablo xika tsa sa na kuañaꞌan Ndios sa na kukuituni xanaa ndidaa tsa xininchisa ñaꞌan xi Jesucristu
15 Sa saꞌa ndidaa jaꞌa juandiku kuenta niꞌi toꞌon da sa xininchisa ni Jesucristu xiꞌin na modo xinimani ni ndidaa ñayii ndada ii ia, 16 ti ku kuinoo da sa kuañaꞌan da taxaꞌvi xi ia sa saꞌa ni ndidaa ni kuan nakaꞌan ñaꞌan da jni ndidaa ni ora kaꞌan da xi Ndios, 17 ndasa j-Ndios ku Toꞌo ndo Jesucristu, ia kuu ku Tata ndo tastuni ntseꞌe, na taxi ia sa na kukuituni xanaa ni ndidaa ni, ndasa na kini ni sa ndakuiti sa nchu dadana ñaꞌan ia xiꞌin nakini ndaa ni nasa kuu ia; 18 san xika da xi ia sa na kada ia sa na kini ni ndidaa ni tuku, ndasa na kini ni nasa kuu sa ntsatu jni sa taxi ia jni ndidaa ni, xiꞌin nasa kuu sa naꞌnu xiꞌin sa guaꞌa sa kuu herencia sañaꞌan ia xi ndidaa ñayii ndada ii ia, 19 san duꞌua na kini ni ndidaa sa naꞌnu tastuni ia xiꞌin ndidaa sa ntsee ia sa kída ia sa saꞌa ndidaa ntsoo ñayii xininchisa ñaꞌan xi ia, sa saꞌa sa ntsee ia. 20 Kuan xiꞌin sa tastuni yukua kída sa nandoto Jesucristu san tantsaku ñaꞌan ia andivi ichi j-ladu kuaꞌa ia.b 21 San sani ñaꞌan ia sa na tastuni ñaꞌan Jesucristu xi ndidaa sa tastuni, xiꞌin ndidaa sa niꞌi sa tastuni, xiꞌin sata ndidaa sa io, tantu ñuyii yaꞌa xiꞌin ñuyii kixi, 22 kuan nachiꞌi Ndios ndidaa ndaꞌa Jesucristu,c san dii ni mee ia kída sa Jesucristu kuu ia tastuni xi x-congregación ia, 23 san x-congregación ia kuu xikikoño ia,d san congregación yaꞌa io ndidaa sa kuu Cristu ia kuu Ndidaa ndi tuꞌu.