6
Xanii, tu dakaa ni kída kuachi, san ndidaa dini tsa io Espíritu kuan xi nandeꞌe sa chintsee ñaꞌan ni sa na ndundaa ñayii yaꞌa san ma ku kuu naꞌnu ni. Kuan na kada kototuni ñaꞌan jni tuku. 2 Chintsee taꞌan ni ndidaa ni ora taꞌan ni sa taꞌan ni, san duꞌua kada ni ndidaa ni sa táꞌvichiion Jesucristu.3 Kuan andu sani-ini sa ntseꞌe kunaꞌnu, san ti kuu nisadana, san ñayii duꞌua sani-ini ya dandaa ñaꞌan xi mee. 4 Ndiden ndiden ntsaꞌa ni ncha kuu ni, san tu io en ñayii kida sa guaꞌa san juan na kuiꞌni ñayii doko ma en ni kachi sa kutuni ka jni sa kuxi enka ñayii; 5 san ndiden ndiden kuyakui ni sa nandeꞌe sa kuyakui ni.
6 Ñayii kutuꞌua s-toꞌon Ndios, nandeꞌe sa kuañaꞌan tsa sa nandeꞌe xi tsa dakuaꞌa ñaꞌan s-tsa.
7 Ma dandaa ni mee ni; kuan ti en dandaa ñaꞌan xi Ndios. Kuan sa dákaa ni juan nakeꞌen ni. 8 Kuan tu andu kida sa kuiꞌia nchoxi xikikoño xi, sa niꞌi kuu sa kuiꞌia, doko andu kida sa guaꞌa sa nchoxi Espíritu niꞌi ñuyii ma ndeꞌe. 9 Na kada ndo sa guaꞌa san ma xavi ndo, kuan saa kii san nakeꞌen ndo. 10 Ndiden nandeꞌe sa kada ndo sa guaꞌa xi ñayii san na kada ndo, doko ñayii nandeꞌe ka sa kada ndo sa guaꞌa xi kuu ndidaa ñayii xininchisa ñaꞌa xi Jesucristu duꞌua kuenta mee ndo.
Jaꞌa ni ka kuu toꞌon chidotuni Pablo xi ñuu yaꞌa
11 Mee da tsáa letra yaꞌa, san ntsaꞌa ni sa naꞌnu ntseꞌe ndaa. 12 Ndidaa ñayii nchoxi sa na kada circuncidar ni, sa nchoj s-tsa ndidaa tsa kuu sa na kendoo guaꞌa tsa xiꞌin ndidaa ñayii. Kuan tu na kaꞌan tsa sa saꞌa x-cruz Jesucristu san kini uꞌu ñaꞌan ndidaa ñayii s-tsa. 13 Ndidaa tsa yaꞌa kída circuncidar tsa doko ti kida tsa ndaa yodotuni ley. Sa nchoj s-tsa kuu sa na kada circuncidar ni ndidaa ni kuan na ku-iꞌni tsa sa mee tsa kída sa kída circuncidar ni ndidaa ni. 14 Doko dan nunka ma ku-iꞌni da sa saꞌa enka kosa maska sa sa saꞌan ni sa xiꞌi ku Toꞌo ndo Jesucristu. Kuan sa saꞌa ia yaꞌa dan kida da kuenta sa ñuyii yaꞌa ndeꞌe d̶a san duꞌua ni dán ndeꞌe da xi ñuyii yaꞌa tuku. 15 Kuan ti nandeꞌe nisadana tu io circuncidadu ndo ña ñaꞌan, sa nandeꞌe kuu sa na danaꞌa sa ndada saa ñaꞌan Ndios ku ndo. 16 San Ndios na kuañaꞌan ia sa kookadi xiꞌin sa kunda-ini ñaꞌan ia xi ndidaa ñayii kida kuenta kachi da ya xiꞌin x-Israel Ndios.
17 San vita, ma en ka ni kada sa ndiꞌi xanaa da, kuan xikikoño da neꞌe teꞌma ndidaa sa táꞌan da sa saꞌa sa xininchisa da Jesucristu.
18 Xanii, j-gracia ia kuu ku Toꞌo ndo Jesucristu na koo xiꞌin x-espíritu ni ndidaa ni. Duꞌua na kuu.