Niꞌi ndo ñuyii ma ndeꞌe sa saꞌa xi sa xinimani ñaꞌan Ndios
2
San táxi ia ñuyii jni ndidaa ni vita, kuan antes san dini ndidaa ni xiꞌi ni xi ndidaa sa kuiꞌia xu kada ni xiꞌin ndidaa x-kuachi ni, 2 kuan tiempu yukua xu kada ni ndidaa ni sa kida ñayii ñuyii yaꞌa, xu kunchiko ni sa tastuni ñaꞌan xi ndidaa sa kuiꞌia sa kuu sa tastuni ñaꞌan xi ndidaa ñayii ti xininchisa ñaꞌan. 3 Tiempu yukua ntso ndidaa ndo xu ku kuu ndo kuenta tsa yukua ndidaa tsa, xu kada ndo sa kuiꞌia nchoj mee ndo xiꞌin ndidaa sa xu kani-ini ndo, san duꞌua kuu ndo ñayii diko-ini Ndios kuenta ndidaa ka ñayii. 4 Doko Ndios ia kunda-ini ñaꞌan ntseꞌe, xínimani ñaꞌan ntseꞌe ia kundo ndidaa ndo, 5 taj daa ia ñuyii ku ndo sa saꞌa Jesucristu, kuenta kuu ndo na ñayii xiꞌi sa saꞌa ndidaa ku kuachi ndoa (kuan sa saꞌa j-gracia ia kida sa taxi ia ñuyii jni ndidaa ni) 6 san kída ia sa nandoto ndo xiꞌin Jesucristu, san tantsaku ñaꞌan ia ku ndo andivi xiꞌin ia, 7 ndasa na kini ndo ndidaa sa guaꞌa ku j-gracia Ndios xiꞌin sa xinimani ñaꞌan ia ku ndo ndidaa ndo sa saꞌa Jesucristu. 8 Kuan sa saꞌa j-gracia ia kida sa taxi ia ñuyii jni ndidaa ni, sa saꞌa sa xininchisa ñaꞌan ni xi Jesucristu; san adi mee ni nakoꞌon xi, maska sa Ndios taj daa ia jni ndidaa ni. 9 Doko adi sa kida ni sa guaꞌa, ndasa nisa en ñayii ma ku kuu naꞌnu. 10 Kuan Ndios kídaguaꞌa ñaꞌan ia kundo, sa saꞌa Jesucristu kuguaꞌa ndo ndasa na kada ndo sa guaꞌa sa tastuni ia sa na kada ndo, kuan duꞌua sáni-ini ntsa díꞌna.Na kini mani ñaꞌan Ndios ku ndo sa saꞌa Jesucristu
11 Juandiku na kaꞌan ni ndidaa ni sa enka tiempu dini ndidaa ni, ñayii ti kuu ñuu Israel, xu kunani ni tsa ti kida circuncidarb xi ndidaa tsa io circuncidadu san jaꞌa xu kada ñayii xiꞌin ndaꞌa ñayii. 12 Nakaꞌan ni sa tiempu yukua ti xu kininchisa ñaꞌan ni xi Jesucristu, san ti xu ku kuu ni ñuu Israel san ma niꞌi ni tratu xiꞌin ndidaa sa kachi Ndios sa taxi ia, san ti xukoo ni xiꞌin Ndios san nisa dana ti xu koꞌon xanaa ni ia. 13 Dini ndidaa ni kuenta guaꞌa ti xu kininchisa ni Jesucristu, ío xika ni xi ia doko vita ndadayachi ñaꞌan ia jni sa saꞌa j-niñi ia. 14 Jesucristu ia kuu sa na kookadi ndo, kída ia sa ndidaa dan ñayii kuu ñuu Israel xiꞌin dini ndidaa ni ñayii ti kuu ñuu Israel na nduu ndo enika ñuu. Dátani ia sa xu kada sa xu kaꞌntsa dagua ñaꞌan kundo; 15 Díta ia sa xini uꞌu taꞌan nduu ñuu sa saꞌa xikikoño ia xiꞌin sa taꞌvichiion ley sa na kada ñayii,c san duꞌua kída ia sa nduu ñuu na nduu eni ka ñayii, en ñayii saa, duꞌua kída ia sa na kookadi. 16 Kuan sa saꞌa sa xiꞌi Jesucristu cruz juan kída sa nduu ñuu ndumani xiꞌin Ndios ndasa na nduu ndo ndidaa ndo enika yikikoño, san duꞌua ndéꞌe ndidaa sa diko ini ñaꞌa Ndios ku ndo.
17 San kíxi ia kii kaꞌan ia toꞌon guaꞌa xi ndidaa dini ñayii io xika xi Ndios xiꞌin ndidaa ñayii io yachi sa io ia.d 18 Kuan sa saꞌa ia yaꞌa juandiku guaꞌa ni saa ndo ndidaa ndo jnu ku Tata ndo sa saꞌa eni Espíritu. 19 Juandiku dini ndidaa ni ti kuu ka ni ñayii juera adi ñayii saa duꞌua, maska sa kuu ni ñayii ndekaxi Jesucristu xiꞌin xayii Ndios. 20 Kuan dini ndidaa ni kuu ni kuenta en veꞌe kuguaꞌa, san sa dama saꞌa xi ndée ndidaa sa dadada ñaꞌan ndidaa x-aspóstol Jesús xiꞌin ndidaa x-profeta ia, san Jesucristu kuu yuu diꞌnanuu, 21 san nee veꞌe kaꞌnu na ku guaꞌa sata yuu yaꞌa, san kuguaꞌa ntsa ku kuu en templu ii sa kuxi Ndios. 22 San xiꞌin Jesucristu kuguaꞌa dini ndidaa ni ndasa na ku kuu ni en veꞌe sa nakoo x-espíritu Ndios.