Na chiion taꞌvi xi Pablo sa kada tsa sa io ndidaa ñayii ti kuu ñuu Israel
3
Juandiku dan Pablo, yeꞌe da vekaa kuan kaꞌan da s-toꞌon Jesucristu xi ndidaa dini ñayii ti kuu ñuu Israel. 2 Xini da sa xini ni ndidaa ni chion táꞌvi Ndios d̶a sa na kada da ndasa na chintsee ñaꞌan da jni ndidaa ni kuan kundai-ni ñaꞌan ia jni ndidaa ni. 3 Kuan Ndios dadana ñaꞌan ia d̶a sa sani-ini ia sa yeguaꞌa xi ia, kuan sa duꞌua chídotuni da jni ndidaa ni. 4 San ora na kaꞌvi ni ndidaa ni sa chídotuni da ya, san ora yukua tediki ni nasa kuu sa xini da sa kída Jesucristu kuan ti en xu kini. 5 Kuan ndidaa ñayii ío diꞌna ti dadana ñaꞌan Ndios ndidaa toꞌon yaꞌa xi, doko vita dadana ñaꞌan ia xi ndidaa x-apóstol ia xiꞌin ndidaa x-profeta ia sa saꞌa x-espíritu ia: 6 san jaꞌa kuu, sa ndidaa tsa ti kuu ñuu Israel níꞌi tsa sa ku kuu tsa eni yikikoño xiꞌin ndidaa tsa kuu ñuu Israel san nduu tsa níꞌi sa kachi Jesucristu sa niꞌi tsa sa saꞌa s-toꞌon guaꞌa ia.a7 Kuan sa saꞌa j-gracia ia kída sa na ku kuu da en tsa xinokuachi xi toꞌon guaꞌa yaꞌa, kuan duꞌua kída ia xiꞌin sa tastuni ia. 8 San kuani dan kuu tsa luchi ntseꞌe ka sa kuxi ndidaa ñayii ndáda ii Ndios, doko nchóxi ia sa na kada da chiion guaꞌa yaꞌa, sa na kaꞌan da xi ndidaa tsa ti kuu ñuu Israel sa kuu toꞌon guaꞌa, sa kuu ndidaa sa guaꞌa ma kachi kaꞌvi ndo io xi Jesucristu, 9 ndasa na dadana ñaꞌan da xi ndidaa ñayii ndidaa sa yedaꞌvi xiꞌin ti en xu kini xi Ndios ia kidaguaꞌa ndidaa sa io. 10 San duꞌua ndidaa tachi kuu jnu xi sa io ndidaa andivi na kini nadataꞌan nadatuꞌu sa kutuni io xi Ndios sa saꞌa sa kida x-congregación ia. 11 Kuan juan sáni-ini ia ntsa diꞌna san kída ia sa saꞌa Jesucristu ku Toꞌo ndo, 12 san sa saꞌa Jesucristu xiꞌin sa xininchisa ñaꞌan ndo xi ia, juandiku guaꞌa ni saꞌan ndo jnu Ndios san ti yuꞌu ndo kuan ñoꞌon ku kuanaa ndo ia, 13 Juandiku xika da sa na ndukuntsee ni, san ma nayuꞌu ni sa saꞌa ndidaa sa taꞌan da sa saꞌa ni, kuan ndidaa jaꞌa kuu sa chiñuꞌu ñaꞌan jni ndidaa ni.
Sa xinimani Cristu
14 Sa saꞌa xi jaꞌa juandiku saꞌnuxiti da jnu s-Tata ia kuu ku Toꞌo ndo Jesucristu, 15 ia kuu s-tata ndidaa ñayii io nuꞌu san duꞌua sa io andivi, 16 ndasa sa saꞌa x-espíritu ia na taxi ia ndidaa sa ntsee io xi ia jni ndidaa ni ndasa x-espíritu ni na koo sa ntsee yukua xi; 17 san duꞌua nakoo Jesucristu xanaa ni kuenta guaꞌa xininchisa ni ia kuan na ku kuu ni kuenta en yutu teen yoꞌo guaꞌa adi en veꞌe in kutu, duꞌua na kuu ni xiꞌin sa xinimanitaꞌan ni, 18 san duꞌua na kukuituni guaꞌa xanaa ni xiꞌin ndidaa ka tsa ndáda ii ia, na modo kuu sa ndeka, na modo kuu sa kani, sa duku xiꞌin sa kono sa kuu sa xinimani Jesucristu, 19 xiꞌin na kini ni ndidaa ni sa sa xinimani ia kaꞌnu ntseꞌe ka sa kuxi ndidaa sa kutuni xi, ndasa na chitu ni ndidaa sa kuu Ndios.
20 San ia kida xiꞌin tastuni sa kada kuaꞌa ka sa kuxi sa xika ndo adi sa sakuituni ku kuanaa ndo, kuenta guaꞌa táxi ia sa tastuni ndo, 21 ia yukua na kada kaꞌnu vita xiꞌin ndidaa tiempu, ndidaa ñayii kuu x-congregación ia, ndidaa ñayii io xiꞌin ndidaa ñayii koo danduu sa saꞌa Jesucristu. Duꞌua na kuu.