Eni ku ndo ndidaa ndo sa saꞌa Espíritu
4
Dan tsa yeꞌe vekaa kuan kaꞌan da s-toꞌon ku Toꞌo ndo xika da jaꞌa jni ndidaa ni, sa na koo ni kuenta nandeꞌe sa koo ndidaa ñayii kana ñaꞌan Ndios xi: 2 ma ku kuu iꞌni ni ndidaa ni, ku kuu ni ñayii kaꞌnu xanaa xi, kuyakui taꞌan ni san ma nadiko jni, san kinimani taꞌan ni ndidaa ni,a 3 nduku ni ndidaa ni sa kadivii ni na ni koo ni san eni kani-ini ni kuenta ñayii neꞌe eni Espíritu. 4 Ku kuu ni endini yikikoño, endini Espíritu, kuan duꞌua kana ñaꞌan jni ndidaa ni sa na koꞌon endini sa na koꞌon xanaa ni. 5 Io endini tsa Toꞌo, endini sa xininchisa ni, endini sa sendutsa, 6 endini Ndios ia kuu ku Tata ndo ndidaa ndo, ia tastuni ñaꞌan ku ndo ndidaa ndo, ia io xiꞌin ndo ndidaa ndo xiꞌin ia io ku kuanaa ndo ndidaa ndo.7 Doko ndiden ndiden taxi Ndios gracia kundo kuenta modo sani-ini Jesucristu sa taxi ia. 8 Juandiku kachi:
Kundaa ia ntsa nino, san kineꞌen ia ndidaa ñayii yeꞌe ntsadi san ntsaka ñaꞌan ia kuaꞌan
san sañaꞌan ia don xi ndidaa ñayii.b
9 Nasa nchu kachi sa kundaa ia? sa kachi kuu sa diꞌna ka noo ia sa kono ntseꞌe sa kuu nuꞌu, 10 ia noo xiꞌin ku ndaa kuu ia sáa sata ndidaa andivi, ndasa na dachitu ia ndidaa. 11 San dini ia yaꞌa sañaꞌan xi uu ñayii sa na ku kuu tsa x-apóstol Jesús, uu ka tsa sañaꞌan ia sa na ku kuu tsa x-profeta ia, dagua tsa niꞌi sa ku kuu tsa evangelista, dagua tsa pastor xiꞌin dagua tsa maestru, 12 ndasa na chintsee tsa ndidaa tsa, ndidaa ñayii nada ii ia ndasa na kuaꞌnu tsa yaꞌa ndidaa tsa, san na kada tsa chion sañaꞌan ia sa kada tsa, kuan na kuaꞌnu ndidaa ñayii kuu xikikoño Jesucristu, 13 san duꞌua ntsa nasaa kii sa eni ka modo na kininchisa ndo Jesucristu xiꞌin na kini ndaa ndo D̶aꞌa Ndios san na nduu ndo en ñayii ndaa kuenta mee ia. 14 Ndasa ma ku kuu ka ndo kuenta nuliin noo noo nadama s-toꞌon xi, nu saꞌan ichaꞌa ichukua kida s-toꞌon ndidaa tsa dadana ñaꞌan sa kuu sa naꞌntsa, sa senchiion tsa xiꞌin maña sa dadana ñaꞌan tsa; 15 maska sa na kunchiko ndo sa ndaa xiꞌin sa xinimani ndo, san kueni kueni na nduu ndo kuenta mee ia kuu jnu xi, ia kuu Jesucristu, 16 kuan ia yaꞌa kida san nee xikikoño saꞌnu, san saꞌnu xiꞌin sa xinimani san nundaꞌa taꞌan ndiden tuchi segun chiion taꞌvi sa kada.c
Ñuyii saa taxi Jesucristu
17 Juandiku xika da jni xiꞌin sakundaꞌvi da jnu ni sa saꞌa ia kuu ku Toꞌo ndo, sa ma koo ka ni kuenta io ñayii ti xininchisa ñaꞌan xi Ndios, ñayii sani-ini ndidaa sa kuiꞌia ti nandeꞌe, 18 kuan sa saꞌa ndidaa sa ti sakuituni xanaa tsa xiꞌin sa ntsee d̶iki tsa, san ndidaa tsa yaꞌa io naa tsa, san io xika tsa xi ñuyii taxi Ndios, 19 kuan ti kukaꞌan ka jnu tsa sa kida tsa sa kuiꞌia, kuan meni ka sa io tsa xiꞌin ñayii yaꞌa ñayii yukua san kida tsa sa kuiꞌia kida kuiꞌia ñaꞌa s-tsa jnu Ndios. 20 Doko dini ndidaa ni adi duꞌua kutuꞌua ni sa kada ni, kii kutuꞌua ni sa kuu Jesucristu, 21 tu nchisa sa inini ñaꞌan ni xiꞌin kutuꞌua ni sa kachi ia, duꞌua kuenta sa ndaa io xi ia. 22 Dandoo ni ndidaa modo xu koo ni diꞌnad san ku kuu ni en ñayii saa san ma ku kuu ka ni ñayii xu ku kuu ni kuan ñayii yukua kuini sa dandaa ñaꞌan ndidaa sa nataꞌan xanaa xi xi, 23 san nadama ni modo sani-ini ni, 24 nduu ni en ñayii saa,e en ñayii kidaguaꞌa Ndios ndasa na koo sa kuxi ni mee ia, sa na kada sa guaꞌa xiꞌin sa ndaa.
25 Doko vita dandoo ni ndidaa sa naꞌntsa, san kaꞌan ni sa ndakuiti jnu ndidaa ñayii xininchisa,f kuan ndiden ndiden kuu ni en ndaꞌa saꞌa yikikoño.
26 Tu nadiko jni doko ma kada ni kuachi;g ma daꞌvi ora san kudiko daa jni, 27 kuan na kada kadanar ñaꞌan sakakuiꞌia kuaan jni.
28 Tsa xu duꞌu san ma duꞌu ka tsa, maska sa na kadachiion tsa san na nduku ntsee tsa, san na kada tsa xiꞌin ndaꞌa tsa sa kuu sa guaꞌa, ndasa na chintsee tsa ñayii nandeꞌe xi.
29 Ma kaꞌan ni ndidaa ni toꞌon kuiꞌia, maska sa toꞌon guaꞌa ndasa na kuaꞌnu ni xiꞌin na kada ni sa guaꞌa xi ndidaa ñayii nini ñaꞌa jni. 30 San ma kada ni sa na ta-uꞌu x-Espíritu Santu Ndios, xiꞌin sa chituni ñaꞌa ia jni ndasa na kiꞌin ni sa io ia.
31 Dita ni ndidaa sa ta-uꞌu, sa diko-ini, sa naa ndodo, sa kantseꞌe taꞌan, sa sastadi ñaꞌan, xiꞌin ndidaa sa sani-ini ni sa kuiꞌia xi enka ñayii. 32 Guaꞌa ka ku kuu ni ñayii guaꞌa xiꞌin enka ñayii, ñayii kunda-ini enka ñayii, koo ni sa kaꞌnu-ini sa saꞌa enka ñayii, kuenta Ndios ío ia sakaꞌnu-ini sa saꞌa ni ndidaa ni sa saꞌa Jesucristu.h