Efesios 5

Na modo nandeꞌe sa koo ndidaa ñayii xininchisa ñaꞌan xi Ndios

Juandiku kada ni sa kida Ndios kuenta ndidaa d̶aꞌa ia xinimani ia, 2 san ndinoo ni xiꞌin sa xinimani, kuenta Cristu xinimani ñaꞌan ia ku ndo ndidaa ndo, san doko ia xuyii ia sa saꞌa ndo, sa kuu en sa guaꞌa nataꞌan xanaa Ndios.

3 Doko dini ndidaa ni ñayii ndada ii Ndios, ma kada ni san nisa ma ndaku ndidaa sa kuiꞌia yaꞌa sa io ni ndidaa ni: sa sakoo ñayii xiꞌin ñayii vita tandaꞌa ka xiꞌin, xiꞌin ndidaa sa kuiꞌia kida kuiꞌia xikikoño ñayii, adi sa nchoj ntseꞌe ñayii sa koo sa koo xi ñayii ñuyii yaꞌa; 4 nisa ma kaꞌan ni toꞌon ndadi, ma kaꞌan diki ni, ma kaꞌan ni toꞌon kuiꞌia toꞌo duꞌua, kuan ndidaa jaꞌa ti guaꞌa, guaꞌa ka kuañaꞌan ni taxaꞌvi xi Ndios ndi kii. 5 Kuan sa xini ni sa ndidaa ñayii sakoo xiꞌin ñayii vita tandaꞌa ka xiꞌin, ñayii kida sa kuiꞌia xiꞌin xikikoño xi, ñayii nchoj ntseꞌe tuini xiꞌin sa koo sa koo xi ñuyii yaꞌa xiꞌin ñayii chiñuꞌun idolo, nisa en ñayii duꞌua kida ma niꞌi sa koo sa sa tastuni Jesucristu xiꞌin Ndios. 6 Ma kachi ni sa dandaa ñaꞌan jni ndidaa ni xiꞌin toꞌon kuiꞌia toꞌon duꞌua, kuan juandiku kixi sa diko-ini ntseꞌe Ndios sata ndidaa ñayii kuiꞌia ti xininchisa ñaꞌa xi ia. 7 Juandiku ma kotaꞌan ni ndidaa ñayii duꞌua kida, 8 kuan enka tiempu ío ni sa naa, doko vita io ni sa dayeꞌe kída Ndios. Ndinoo ni kuenta ñayii neꞌe sa dayeꞌe Ndios tuda 9 (kuan x-espíritu Ndios kuu sa kida sa na ku kuu guaꞌa ñayii, sa na ku kuu ñayii, ñayii ndaa xiꞌin na kaꞌan ñayii sa ndakuiti) 10 nduku ni sa kada ni sa taꞌan xanaa Ndios. 11 Ma kotaꞌan ni ñayii io sa naa kuan sa kida ñayii yaꞌa ku sa ti nandeꞌe, guaꞌa ka datuu ñaꞌan ni, 12 kuan sakanuu kuu sa kaꞌan ndidaa sa kuiꞌia yeguaꞌa sa kida tsa. 13 Doko sa dayeꞌe kuaan kida sa ndidaa kosa yaꞌa ketuu san ku vaa. 14 Kuan sa dayeꞌe dayeꞌe ndidaa juandiku kachi:

ndikuu xanaa yoꞌo nu xidi,

ndukoo sa io ndidaa ndii

san dayeꞌe Jesucristu yo.

15 Juandiku guaꞌa ntsaꞌa ni na modo ndikono ni. Ma kada koo ni kuenta ndidaa ñayii ti kutuni xi, guaꞌa ka koo ni kuenta ñayii kutuni xi. 16 Ma dakuita duꞌua ni kii, kuan ndidaa kii yaꞌa on ka on ka kaya sa kuiꞌia. 17 Ma koo kueꞌe duꞌua ni, guaꞌa ka nduku ni nasa kuu sa nataꞌan xanaa Ndios. 18 Ma kada naxini ni ndidaa ni, kuan juan kida sa ndukueꞌe nduu duꞌua ni, guaꞌa ka kuemani ni sa na kuntsaka ñaꞌan Espíritu Santu jni, 19 san kaꞌan taꞌan ni ndidaa mee ni xiꞌin salmo, himno xiꞌin kantu espiritual; kata ni xiꞌin kadakaꞌnu ni ia kuu ku Toꞌo ndo xiꞌin nee xanaa ni ndidaa ni. 20 Sa saꞌa Jesucristu ndi kii kuañaꞌan ni taxaꞌvi xi Ndios ia kuu ku Tata ndo sa saꞌa ndidaa sa taxi ia ku ndo.

Na modo nchoxi sa koo ñayii ndiaꞌan xininchisa ñaꞌa xi Ndios

21 Yuꞌu ni Ndios san kininchisa taꞌan ni ndidaa ni.

22 Ndidaa ñadeꞌe io xee xi na kininchisa ñaꞌan ña s-tsa kuenta xininchisa ña Ndios, 23 kuan ñadeꞌe yeꞌe ña ndaꞌa xee ña, duꞌua kuenta x-congregación ia yeꞌe ndaꞌa Jesucristu, kuan x-congregación ia kuu na xikikoño ia, san mee ia kída sa nanitaꞌvi. 24 San duꞌua kuenta x-congregación ia xininchisa ñaꞌan xi Jesucristu, duꞌua na kininchisa ñaꞌan ña deꞌe xi xee ña ndidaa.

25 Ndidaa dini tsa io d̶eꞌe xi, nchoxaꞌan ni xi d̶eꞌe ni, duꞌua kuenta Jesucristu nchoxaꞌan ia xi x-congregación ia, san na kuañaꞌan ia xuyii ia sa saꞌa xi, 26 ndasa na ndada ii ñaꞌa ia, san ndadandoo ñaꞌan ia xiꞌin nakatsa ñaꞌan ia xiꞌin s-toꞌon ia sa kuu kuenta ndutsa, 27 ndasa na ku kuu en congregación io ndoo xiꞌin ti nduchiꞌndu san sandutsa. 28 Duꞌua, ndidaa tsa io d̶eꞌe xi nchoxi sa nchoj s-tsa d̶eꞌe tsa kuenta xikikoño mee tsa. Tsa nchoxi xi d̶eꞌe xi, nchoxaꞌan tsa xi mee tsa. 29 Kuan ti en xini uꞌu xikikoño xi; maska sa sañaꞌan sa saxi xiꞌin kida kuidadu, duꞌua kuenta Jesucristu kida kuidadu ia x-congregación ia, 30 kuan ndidaa ndo kuu xikikoño ia. 31 Juandiku nuyee ya dandoo nu s-tata nu xiꞌin jnana nu san koo nu xiꞌin d̶eꞌe nu, san nduu nu nduu eni ka ñayii. 32 Jaꞌa kuu en secretu kaꞌnu ntseꞌe; doko jaꞌa nchukachi na modo eni ka kuu Jesucristu xiꞌin x-congregación ia. 33 Juandiku ndiden ndiden nchoxaꞌan ni xi d̶eꞌe ni kuenta nchoj ni mee ni, san ndidaa dini ñadeꞌe ku kuu yeñuꞌu ni jnu xee ni.