Sa kidakaꞌnu ñaꞌan xi Jesucristu xiꞌin sa sa ñaꞌan sakanuu xi ia
2
San duꞌua, tu nchisa sa Jesucristu kída ia sa na kadakaꞌnu ni xanaa ni ndidaa ni; tu táxi ia sa na kinimani taꞌan ni ndidaa ni, tu eni Espíritu io xiꞌin ni ndidaa ni, tu kida ini taꞌan ni ndidaa ni, xiꞌin tu kunda-ini taꞌan ni 2 kada ni sa na ku-iꞌni da, san eni modo kani-ini ni, xiꞌin eni modo kada-ini taꞌan ni ndidaa ni. 3 Ma kada ni nisa en sa kuadu adi sa na ku kuu naꞌnu; guaꞌa ka ku kuu yeñuꞌu ni ndidaa ni, san ndiden ndiden kani-ini ni sa ndidaa ñayii io sa io ni xan kunaꞌnu ka sa kuj ni; 4 ma kada sa kuj ni mee ni ndidaa ni nduku ni, nduku ni sa kuxi ndidaa ka ñayii tuku.5 Kani-ini ni ndidaa ni kuenta sani-ini Jesucristu, 6 kuan kuani kuu ia Ndios, ti danuu ia sa kuu ia Ndios adi sa nduku ia sa kuxi mee ia, 7 maska sa dandoo ia en ladu ndidaa sa io xi ia, san kúu ia kuenta en tsa xinokuachi, káku ia kuenta en ñayii; 8 san ti nchu ku naꞌnu ia, seniꞌno ia Ndios kuani juan kida sa ndaꞌvi ntseꞌe ndeꞌe ia, en cruz. 9 Juandiku Ndios kida kaꞌnu ñaꞌa ntseꞌe ia xi ia san sañaꞌan ia sa na kunani ia kuenta ti en nani, 10 ndasa jnu Jesucristu na kuinxiti ndidaa ñayii, ndidaa sa io andivi, ndidaa sa io nuꞌu xiꞌin sa io xiti nuꞌu; 11 san duꞌua ndidaa daꞌan na naꞌmaa sa Jesucristu kuu s-Toꞌo ndidaa sa io, ndasa na kadakaꞌnu ñaꞌan xi Ndios ia kuu ku Tata ndo.
Na ku kuu ndo sa dayeꞌe ñuyii yaꞌa
12 Duꞌua vi xanii, duꞌua kuenta xu kininchisa ñaꞌan ni d̶a kuenta xu koo da sa io ni ndidaa ni xan, kininchisa ñaꞌan ka ni d̶a sa io xika da san yeñuꞌun yeñuꞌun xiꞌin guaꞌa guaꞌa kada ni ndidaa sa nandeꞌe sa kada ni ndasa na kuaꞌnu sa nanitaꞌvi ni. 13 kuan Ndios kuu ia kida sa dini ndidaa ni na kada ni sa nchoxi ia, kuan duꞌua taꞌan xanaa ia.
14 Kada ni ndidaa, san ma kodondaꞌa ni xiꞌin ma naa ni, 15 ndasa ma kuidokuachi ni xiꞌin na ku kuu ni d̶aꞌa Ndios en tsa ti iꞌni xiꞌin io ndoo xiti ndidaa ñayii kuiꞌia ti kida sa ndaa.b Ku kuu ni na chodini dayeꞌe xiti en ñuyii naa; 16 Kuin ndaa ni ndidaa ni xiꞌin s-toꞌon Ndios sa taxi ñuyii ma ndeꞌe san duꞌua kii na ndixi Jesucristu, dan ku iꞌni ntseꞌe da sa ti táꞌan duꞌua da ndidaa sa taꞌan da xiꞌin sa ti kídachiion duꞌua da. 17 San kuani na kuañaꞌan da xuyii da kuenta en sa doko, xiꞌin nee xanaa da san oni ku-iꞌni da kada da ndasa na kuin ntsee ni xiꞌin sa xininchisa ni ndidaa ni. 18 San duꞌua dini ndidaa ni tuku ku iꞌni ni, san na kuiꞌni ndo ndidaa ndo.
Timoteu xiꞌin Epafrodito
19 Xininchisa da ku Toꞌo ndo Jesucristu sa tsandaꞌa ni da Timoteu ya sa io ni ndidaa ni, ndasa na kini da ncha kuu ni ndidaa ni, san duꞌua na kadakaꞌnu da xanaa da; 20 kuan nu yaꞌa kuu nu ndiꞌi ntseꞌe ka xanaa xi sa saꞌa ni sa kuxi ndidaa tsa io jaꞌa. 21 Kuan ndidaa ñayii nduku sa guaꞌa sa kuxi mee, san adi sa nchoxi Jesucristu. 22 Kuan dini ndidaa ni sa xini ni sa guaꞌa modo Timoteu ya, xiꞌin na modo kidachiion nu xiꞌin da sa kaꞌan da toꞌon guaꞌa ya na en daꞌa xiꞌin s-tata xi. 23 Juandiku tuj da sa tsandaꞌa da nu, ora na kini da tu na kee ni da vekaa; 24 doko ñoꞌon xanaa da ia kuu ku Toꞌo ndo sa kiꞌin ni da sa io ni ndidaa ni.
25 Juandiku sani-ini da sa guaꞌa ka na tsandaꞌa da ku kiani ndo Epafrodito, xani da xiꞌin tsa kuu x-kompañeru da tsa naa milicia yaꞌa, tsa tsandaꞌa ni ndidaa ni sa na kuinokuachi d̶a; 26 kuan tsa yaꞌa nchu kini ñaꞌan ntseꞌe tsa jni ndidaa ni, kuan ndiꞌi ntseꞌe xanaa tsa sa niꞌi toꞌon ni ndidaa ni sa kuꞌu s-tsa. 27 San sa ndaa nchisa kuu sa kúꞌu s-tsa san taꞌni ka sa kuu tsa, doko Ndios kunda-ini ñaꞌan ia s-tsa, san adii ni tsa yaꞌa kunda-ini ia, maska sa ntsa ndeꞌe dan kunda-ini ia, ndasa ma taꞌan ntseꞌe ka da. 28 Juandiku na tsandaꞌa da tsa, ndasa na kukaꞌnu xanaa ni sa kini ñaꞌan ni s-tsa, san duꞌua ma ndeꞌe ndaꞌvi koo xanaa da. 29 Kinimani ñaꞌan ni ndidaa ni s-tsa xiꞌin ku-iꞌni ni, san kimani ñaꞌan ni xi ndidaa tsa kuu kuenta tsa yaꞌa; 30 kuan sa saꞌa sa xinokuachi tsa xi Jesucristu, tsa yaꞌa taꞌa nika sa ndeꞌe tsa, taꞌa nika sa ndeꞌe tsa sa saꞌa da, kuan xu nduku tsa sa nandeꞌe d̶a, sa ti kachi taj ni ndidaa ni kuan io xika ni.