Colosenses 2

Nchoj da sa na nitoꞌon ni ndidaa ni sa nduku ntsee ntseꞌe da kidachion da sa saꞌa ni ndidaa ni, xiꞌin sa saꞌa ndidaa ñayii xininchisa io ñuu Laodicea xiꞌin sa saꞌa ndidaa tsa ti xini ñaꞌan d̶a; 2 ndasa na kukaꞌnu xanaa ni ndidaa ni, san eni na ku kuu ni xiꞌin na kinimani taꞌan ni ndidaa ni, ntsa na niꞌi ni sa na kukuituni xanaa ni ndidaa ni, san na kini ni sa yedaꞌvi xi Ndios ia kuu ku Tata ndo xiꞌin ia kuu Jesucristu, 3 kuan Jesucristu kuu ia neꞌen guaꞌa ndidaa sa guaꞌa kutuni xi xiꞌin ndidaa sa xini. 4 Kachi da jaꞌa ndasa ma en dandaa ñaꞌan jni xiꞌin toꞌon vili. 5 San kuani ti io da sa io ni ndidaa ni xan doko kada ni kuenta sa io da sa io ni ndidaa ni, san ku-iꞌni da sa kadi ni io ni ndidaa ni xiꞌin sa in ndaa ni xiꞌin sa xininchisa ni ia kuu Jesucristu.

6 Juandiku duꞌua kuenta xininchisa ni Jesucristu, koo ni modo nchoxi ia, 7 kuin ndaa ni kuenta en tukuiꞌi kono ntseꞌe io xoꞌo xi duꞌua koo ni ndidaa ni xi Jesucristu xiꞌin sa xininchisa ni, duꞌua kuenta kutuꞌua ni, san ma xavi ni sa kuañaꞌan ni taxaꞌvi xi Ndios kuenta dadana ñaꞌan sa kada ni.

Jesucristu kuu ñuyii

8 Ntseꞌe guaꞌa ni ndidaa ni kuan na dandaa ñaꞌan ndidaa ñayii dakuaꞌa ñaꞌan meni toꞌon ti nandeꞌe, kuan meni sa io ñuyii yaꞌa xiꞌin modo sechion ñayii kuu san adii sa dákuañaꞌan Jesucristu.

9 Kuan ndidaa sa kuu Ndios io xi Jesucristu; 10 san dini ndidaa ni ti nandeꞌe nisadana ka jni kuan sa io Jesucristu jni, ia tastuni ndidaa sa tastuni. 11 San ia yaꞌa kída circuncidar ñaꞌa jni ndidaa ni doko adi xiꞌin ndaꞌa ñayii kida maska sa Jesucristu kida sa kída ia kuenta díta ia ndidaa sa kuiꞌia sani-ini ni ndidaa ni. 12 Kuan jnu Ndios dini ndidaa ni sa kuyii nduj ni xiꞌin Jesucristu kuenta sendutsa ni ndidaa ni. San nandoto ni xiꞌin Jesucristu tuku, sa saꞌa sa tastuni Ndios ia ndaneꞌe ñaꞌan xi Jesucristu sa io ndidaa ndii. 13 Dini ndidaa ni xiꞌi ni jnu Ndios kida x-kuachi ni, san ti io circuncidadu ni naku, san kuani duꞌua kaa ni doko taxi ia vida ni xiꞌin Jesucristu, san io ia sakaꞌnu-ini sa saꞌa ndidaa ndituꞌu x-kuachi ni. 14 Kuu kuenta en tutu ío ku kontra ndo, ndidaa sa xu kuidokuachi ndo ndidaa ndo, doko Ndios díta ia san satakaa ia jnu cruz. 15 San díta ia sa tastuni xi ndidaa sa kuiꞌia tastuni, san kída ia sa ndidaa jukua na kendoo sakanuu, kuenta kidanar ñaꞌan ia cruz xi.

16 Juandiku ma en da kuidokuachi ñaꞌan jni sa saꞌa sa saj ni xiꞌin sa xiꞌi ni, adi kii viko, adi yoo yiki, adi sa saꞌa sábado, 17 kuan ndidaa jaꞌa kuu x-kondati ni xi sa kixi. San sa kixi yukua kuu mee Jesucristu ia sa kíxi. 18 Ma en kaꞌntsa dagua sa niꞌi ni x-premiu ni, adi kachi ñayii jni sa na kada ni sa na taꞌan xikikoño ni xiꞌin sa na chiñuꞌu ni ndidaa ángel, san kuenta oni nchisa xini tsa sa kaꞌan tsa san ku iꞌni tsa sa xini ntseꞌe tsa; 19 ndidaa tsa yaꞌa ti kantsaa tsa ia kuu D̶iki xikikoño, ia kida sa saꞌnu nee yikikoño, ia kida sa ndidaa tuchi xiꞌin ndidaa sa nu ndaꞌa taꞌan yiki na kuaꞌnu modo nchoxi Ndios.

20 Doko tu dini ndidaa ni xiꞌi ni xiꞌin Jesucristu xi ndidaa sa ti nandeꞌe io ñuyii yaꞌa. Naku io da ni kuenta io ñayii ñuyii yaꞌa xiꞌin xininchisa daa ni ndidaa sa kachi: 21 “Ma kuenchiion ni, ma kaj ni jaꞌa jukua, nisa ma kitu ni jaꞌa jukua” 22 (Ndidaa jaꞌa kuu sa taꞌvichiion xiꞌin dakuaꞌa ñaꞌan ñayii) doko ndidaa ndeꞌe kuan senchiion ñaꞌan xi. 23 Sa ndaa ku nchisa sa ndidaa kosa yaꞌa danaꞌa sa kuu sa guaꞌa xiꞌin sa kutuni xi, kuan xika sa na kada xiꞌin na ku kuu yeñuꞌu xiꞌin na choꞌon ñayii ini xikikoño ñayii; doko ti dita ndidaa sa kuiꞌia nchu kada ñayii.