Colosenses 3

San vita, tu dini ndidaa ni niꞌi ni en ñuyii saa sa saꞌa sa nandoto Jesucristu, nduku ni sa io nino yukua, sa intsaku Jesucristu ichi j-ladu kuaꞌa Ndios. 2 Choꞌon ni xanaa ni ndidaa sa io nino yukua, san adi sa io nuꞌu ya; 3 kuan xiꞌi ni xi ñuyii yaꞌa, doko xuyii ni yeꞌe ndaꞌa Jesucristu xiꞌin Ndios. 4 San ora na nanuu Jesucristu, ia kuu xuyii ni ndidaa ni, san dini ndidaa ni nanuu ni xiꞌin sa sandutsa ia.

Ñuyii saa xiꞌin ñuyii tuꞌu

5 Juandiku dandoo ni ndidaa sa kuiꞌia nchu kada xikikoño ni ñuyii yaꞌa: San ma en ka ni koo xiꞌin ñayii ti tandaꞌa xiꞌin ni, san ma kada ka ni kuachi ndidaa ni, ma kada ni sakanuu xiꞌin xikikoño ni, san ma kada meni sa kuiꞌia kani-ini ni, xiꞌin ma nchoj ntsaa ni ndidaa sa io kuan juan kuu kuenta ñayii chiñuꞌu sa ti kuu ndios. 6 Sa saꞌa xi ndidaa jaꞌa kida sa kixi sa diko-ini Ndios sa kuxi ndidaa ñayii ti xininchisa ñaꞌan xi ia. 7 San dini ndidaa ni duꞌua xu kada ni ndidaa ni tuku. 8 Doko vita dita ni ndidaa jaꞌa tuku: sa kuu sa den ntseꞌe, sa nadiko xi, san ma koꞌon xanaa ni sa kuiꞌia sa kuxi ñayii, san ma kaꞌan kuiꞌia ni xiꞌin ma keꞌe toꞌon ndadi xuꞌu ni. 9 Ma dandaa taꞌan ni ndidaa mee ni; kuan sa dandoo ni ndidaa sa kuu̱ ni xiꞌin ndidaa sa xu kada ni, 10 san vita sa nadama ni, san nduu ni ñayii saa san duꞌua ni nduu saa ni kuaꞌan ntsa na nduu ni kuenta ia kída guaꞌa ñaꞌan jni xiꞌin na saa ni kini ni ndidaa sa kuu ia, 11 kuan ti nandeꞌe ka tu kuu ndo ñayii ñuu Israel adi griegu, adi tu io circuncidadu ndo ña ñaꞌan, tu ñayii juera ña ñaꞌan, tu kuu esclavu ña ñaꞌan; kuan Jesucristu ku s-Toꞌo xi ndidaa xiꞌin io ia ku ndo ndidaa ndo.

12 Kunaꞌa ni sa ndekaxaꞌan Ndios jni ndidaa ni xiꞌin ndada ii ñaꞌan ia koo ni kuenta nandeꞌe sa koo ni san ku kuu ni ñayii xinimani ntseꞌe, ñayii guaꞌa, ñayii ti iꞌni, ñayii xininchisa, ñayii kaꞌnu xanaa xi, 13 kuyakui taꞌan ni ndidaa mee ni, san koo ni sakaꞌnu-ini sa saꞌa ni ndidaa mee ni, tu andu da kuidokuachi ñaꞌan jni. San duꞌua kuenta ío Jesucristu sakaꞌnu-ini sa saꞌa ni ndidaa ni duꞌua ni koo ni sa kaꞌnu-ini ndidaa ni tuku. 14 Doko nduku ni sa kinimani ni, kuan juan kuu sa kida sa mani io ni. 15 San sa kookadi taxi Ndios nakoo xanaa ni ndidaa ni, san na kuntsaka ñaꞌan jni ndidaa ni, kuan juandiku kana ñaꞌan jni sa na ku kuu ni eni, kuenta en yikikoño; san kuañaꞌan ni taxaꞌvi xi Ndios.

16 San sa dákuaꞌa ñaꞌan Jesucristu nakada sa na kininchisa ni xiꞌin na tastuni ñaꞌan jni ndidaa ni, guaꞌa guaꞌa dakuaꞌa taꞌan ni xiꞌin sa kutuni xi taxi ia, san kata ni salmo, himno xiꞌin kantu espiritual san nee ini ni kuañaꞌan ni taxaꞌvi xi ia. 17 San ndidaa sa kida ni, xiꞌin sa kaꞌan ni kada ni xiꞌin sa nani ia kuu ku Toꞌo ndo Jesucristu, kuañaꞌan ni taxaꞌvi xi Ndios ia kuu ku Tata ndo sa saꞌa ia yaꞌa tuku.

Na modo nandeꞌe sa koo ndidaa xininchisa

18 Ndidaa dini ñadeꞌe io xee xi, kininchisa ni xee ni, kuan duꞌua nchoxi ia kuu ku Toꞌo ndo. 19 Ndidaa dini tsa io deꞌe xi, kinimani ni d̶eꞌe ni, san ma ku kuu sa-ini ni xan. 20 Ndidaa yoꞌo nu kuu daꞌa, kininchisa ñaꞌan xi s-tadeꞌe yo ndidaa, kuan jaꞌa taꞌan xanaa ia kuu ku Toꞌo ndo. 21 Ndidaa dini tadeꞌe, ma da diko-ini ni ndidaa d̶aꞌa ni, kuan na nayuꞌu nu. 22 Ndidaa dini tsa kidachiion, kininchisa ñaꞌan ni xi s-toꞌo ni ñuyii yaꞌa; ma kadachiion ni ora ni ntsaꞌa ñaꞌan jni, kuenta tsa nchu kendoo guaꞌa xiꞌin ñayii ñuyii yaꞌa, maska sa kada ni xiꞌin nee xanaa ni, san yuꞌu ni Ndios. 23 San ndidaa sa na kada ni, kada ni xiꞌin nee xanaa ni, kada ni kuenta sa ia kuu ku Toꞌo ndo kida ni xi, san adii sa kuxi ñayii ñuyii yaꞌa, 24 kuan xini ni sa ia kuu ku Toꞌo ndo taxi xaꞌvi ni, sa kuu herencia kachi ia sa taxi ia. Kuan ia xinokuachi ni xi kuu Jesucristu. 25 Doko ñayii kida sa kuiꞌia, sa kuiꞌia ku kuu xaꞌvi ñayii, kuan Ndios ti ntsaꞌa ia nchakaa ñayii.