Colosenses 4

Ndidaa dini tsa io tsa kidachiion xi, ku kuu guaꞌa ni xiꞌin ndidaa tsa kidachiion jni, kuan xini ni sa io en S-toꞌo ni andivi tuku.

2 Kakataꞌvi ni on ni xi Ndios, san kuañaꞌan ni taxaꞌvi xi ia. 3 San káka ni sa saꞌa dan nduu da tuku, ndasa na chintsee ñaꞌan ia kuu ku Toꞌo ndo sa na kaꞌan da s-toꞌon ia, ndasa na niꞌi toꞌon ñayii ndidaa sa yeguaꞌa sa kuu Jesucristu, kuan sa saꞌa xi juan diku yeꞌe da vekaa, 4 ndasa na kaꞌan da kuenta nandeꞌe sa kaꞌan da.

5 San guaꞌa ni xiꞌin ncha kuu ni jnu ndidaa ñayii ti kuu x-congregación Ndios, kuenchiion guaꞌa ni s-tiempu ni. 6 Ndidaa s-toꞌon ni na ku kuu toꞌon guaꞌa, san oni na kuneꞌe diko kuenta en sa saj ndo saꞌan ñee, ndasa na kini ni na modo naxikoneꞌe ni ndiden toꞌon.

Na kada ntse-ini ni

7 Ku kiani ndo Tíquico tsa kuu en tsa xinokuachi ndaa xi ia kuu ku Toꞌo ndo, xiꞌin tsa xinokuachi xiꞌin da xi Ndios kachitoꞌon tsa jni ndidaa ni ndidaa sa taꞌan da. 8 Juandiku tsandaꞌa da tsa jni ndidaa ni, ndasa na kini tsa ncha kuu ni ndidaa ni san na kadakaꞌnu tsa xanaa ni, 9 tsandaꞌa da tsa xiꞌin Onesimo, ku kiani ndo tsa kuu en tsa xinokuachi ndaa tuku, tsa kuu ñuu io ni ndidaa ni xan. San kachitoꞌon tsa nasa kuu sa taꞌan ndidaa ichaꞌa.

10 Kada ntse-ini jni kachi Aristarco tsa yeꞌe vekaa xiꞌin da, san duꞌua ni kachi; Marcos, staꞌan Bernabé, san sa taꞌvichiion jni sa nandeꞌe sa kada ni xiꞌin tsa; san tu na kiꞌin tsa sa io ni ndidaa ni; kinimani ñaꞌa ni sta; 11 san Jesús, tsa kaꞌan tsa Justu xi kachi tsa sa na kada ntse-ini jni tuku. Tsa yaꞌa ni ndidaa tsa kuu ñayii Israel chintsee ñaꞌan d̶a, xiꞌin chiion kida da sa saꞌa sa tastuni Ndios, san tsa yaꞌa kuu tsa kidakaꞌnu xanaa da. 12 Kada ntse-ini jni kachi Epafras, en tsa xinokuachi xi Jesús ia kuu Cristu; tsa kuu ñuu io ni ndidaa ni xan san ndidaa tiempu xika tsa xi Ndios sa saꞌa ni ndidaa ni, ndasa na kuin ndaa ni san na nayii ni ndaꞌa Ndios san na kada ni sa nchoxi ia. 13 Dan xini guaꞌa da sa ñoꞌon ni xanaa Epafras ya kuan ndiꞌi ntseꞌe xanaa tsa sa saꞌa ni ndidaa ni xiꞌin sa saꞌa ndidaa tsa io Laodicea xiꞌin tsa io Hierápolis. 14 Kada ntse-ini jni kachi Lucas, tsa kuu medico xinimani ntseꞌe da ndidaa da, xiꞌin Demas.

15 Na kada ntse-ini xi ndidaa ku kiani ndo io Laodicea xiꞌin na kada ntse-ini xi Ninfas xiꞌin ndidaa ñayii kuu x-congregación Ndios nataka xeꞌe ña. 16 Ora na tuꞌu kaꞌvi ni carta yaꞌa, tsandaꞌa ni na kiꞌin xi ndidaa ñayii kuu x-congregación ia io Laodicea ndasa na kaꞌvi tsa juan tuku, san dini ndidaa ni kaꞌvi ni sa io ni ndidaa ni xan, carta na nataj tsa jni. 17 Kadaa ni xi Arquipo sa na kada tsa chiion sañaꞌan ia kuu ku Toꞌo ndo, sa na kada tsa.

18 Dan Pablo chidotuni da xiꞌin ndaꞌa da toꞌon yaꞌa. Nakaꞌan ni sa yeꞌe da vekaa. San j-gracia Ndios nakoo xiꞌin ni ndidaa ni. Duꞌua na kuu.