Na modo nandeꞌe sa ku kuu ndo xi ñayii xininchisa ñaꞌan xi Jesucristu
5
Ma nduden yo xi tsa savaꞌa, maska sa kadaa sa nanduku ntsee tsa, kuenta sa s-tata yo kaꞌan yo xi; san ndidaa nuyee kuachi kuenta xani yo; 2 san ndidaa ña savaꞌa kada kuenta sa jnana yo; san ndidaa nu dee kada kuenta sa x-kuaꞌa yo, yeñuꞌu yeñuꞌu ku kuu.3 Chintsee ndidaa ña kuu nchisa ñakee. 4 Doko tu dakaa ñakee io d̶aꞌa xi adi d̶aꞌa ñani xi, na kutuꞌua nu koto ñaꞌan nu xi ndidaa ña io xeꞌe nu, san na koto ñaꞌan nu xi s-tadeꞌe nu, kuan jaꞌa ku sa guaꞌa nataꞌan xanaa Ndios. 5 Doko ña kuu nchisa ñakee san menika ña kendoo, Ndios nika ñoꞌon xanaa ña san nduu xiꞌin niñu xikataꞌvi ña xi ia. 6 Doko ña kee kida sa nchoxi xikikoño xi, san kuani nchito ña doko xiꞌi ña. 7 Taꞌvichiion jaꞌa ndasa ma en dakuido kuachi ñaꞌan jnu ndidaa nu. 8 Kuan andu ti danuu xayii mee xi, dana sa xininchisa, san kuiꞌia ka kuu sa kuxi ñayii ti xininchisa.
9 San na na todotuni ndidaa ni ñakee io unidiko kuia xiꞌin maska, ña ío endini xee xi, 10 tu xini ñaꞌan xan sa kida ña sa ndaa; tu xíto ña d̶aꞌa ña, tu sañaꞌan ña en lugar kendoo ñayii, tu xu nakatsa ña saꞌa ñayii ndada ii Ndios; tu xu chintsee ña ñayii xu taꞌan ntseꞌe, tu xu kada ña kuaꞌa ntseꞌe sa guaꞌa.
11 Doko ma na chidotuni yo ndidaa ñakee io kuachi ka, kuan sa saꞌa sa nchoxi xikikoño ña kida sa dandoo ña Jesucristu, san nchu na koo nituku xee ña, 12 san todo kuachi ña kuan ti kída ña sa kachi ña sa kada ña. 13 San ku ini ña sa io duꞌua ña san ndinoo ña veꞌe xiꞌin veꞌe, san adi jaꞌa ni kutuꞌua ña, kutuꞌua ña sa koo dusa ña xiꞌin sa kodo ndaꞌa ña ñayii, san jaꞌa jukua chitaꞌan ña, kaꞌan ña toꞌon ti nandeꞌe sa kaꞌan ña. 14 Juandiku kachi ntsu sa ñakee io kuachi daa na nakoo nituku xee ña, san nakoo d̶aꞌa ña, san na koo ña xeꞌe ña san ma kada ña sa sa xini uꞌu ñaꞌan ku ndo na kaꞌan kuiꞌia xan; 15 kuan dagua ña sa nchiko ña sa nchoxi Satanas.
16 Tu dakaa ñayii xininchisa ñaꞌan xi Jesucristu tu ña deꞌe adi tsie io en ñakee xi na koto ñaꞌan xan. Ndasa ma koto ñaꞌan congregación xan, kuan duꞌua koo ka sa nandeꞌe xi ndidaa ña kuu nchisa ñakee.
17 Ndidaa tsa kuu jnu ntsaa ñaꞌa guaꞌa, na kani ini sa nandeꞌe sa kuañaꞌan doble xaꞌvi tsa, maska tuu kuu tsa, tsa kidachiion ntseꞌe sa kaꞌan xiꞌin dadana ñaꞌan s-toꞌon Ndios. 18 Kuan yodotuni s-tutu ii Ndios: Ma chiyoꞌo ni xuꞌu kititata ora xiko te erraa: San duꞌua ni tsa kidachiion nitaꞌvi tsa sa teyaꞌvi tsa.b
19 Sa xidokuachi en tsa savaꞌa ma danuu yo tu ti io ubi adi uni ñayii na dakuidokuachi ñaꞌan.c 20 San tsa kida ni on kuachi san jnu ndidaa ñayii nataka kuan na nduden s-sta, ndasa nayuꞌu ndidaa ñayii nataka juan san ma duꞌua kada tsa. 21 Sakondaꞌvi ntsu xo sa saꞌa Ndios xiꞌin sa saꞌa ku Toꞌo ndo Jesucristu xiꞌin sa saꞌa ndidaa ángel ndekaxi ia, sa na kada yo ndidaa sa taꞌvichiion san ma ndekax yo ñayii. 22 Guaꞌa guaꞌa ntsaꞌa andu sani yo sa na ku kuu jnu xi congregación, san ma chitaꞌan yo x-kuachi enka ñayii. Koo ndoo ndikii.
23 Ma koꞌo ka yo ndutsa, taꞌa vinu koꞌo sa saꞌa xiti yo xan xiꞌin sa saꞌa ndidaa kueꞌe neꞌe yo xan.