Ñayii dadana sa ndaa
4
Doko Espíritu Santu kachi ndaa sa ndidaa tiempu ultimo koo ñayii dandoo sa xininchisa ñaꞌan xi Ndios, san kininchisa tsa espíritu naꞌntsa xiꞌin ndidaa sa dakuaꞌa ñaꞌan tachi kuiꞌia; 2 sa saꞌa ñayii naꞌntsa uu jnu xi kuan ndidaa ñayii yaꞌa ti nakini ka tsa nasa kuu sa guaꞌa xiꞌin sa kuiꞌia. 3 Kuan dadaꞌan tsa sa tandaꞌa ñayii, san taꞌvichiion tsa sa ma en kaxi ndidaa sa kída guaꞌa Ndios, ndasa na kaxi ndidaa tsa xininchisa ñaꞌan xi ia san na kuañaꞌan tsa taxaꞌvi xi ia, ndidaa ñayii xini sa ndaa. 4 Kuan ndidaa sa kídaguaꞌa Ndios kuu sa guaꞌa juandiku ma kachi ndo sa ti guaꞌa, tu sañaꞌan ndo taxaꞌvi xi Ndios ora saj ndo; 5 kuan sa saꞌa s-toꞌon Ndios xiꞌin sa saꞌa sa xikataꞌvi ndo, Ndios ndada ndooa ia.En ñayii kidachiion guaꞌa xi Jesús ia kuu Jesucristu
6 Tu ndidaa toꞌon yaꞌa na dakuaꞌa ñaꞌan yo xi ndidaa ku kiani ndo xan, ku kuu yo en tsa xinokuachi ndaa xi Jesucristu. San kutuꞌua guaꞌa yo xi sa xininchisa yo xiꞌin sa dakuaꞌa ñaꞌan xo. 7 Ma kada kasu yo kuentu kueꞌe kuentu duꞌua nakani ndidaa ña nisaꞌnu. Dakuaꞌa na modo koo guaꞌa yo xiꞌin Ndios. 8 Kuan sa koo guaꞌa xikikoño yo taꞌa ni xaꞌvi xi; doko sa koo guaꞌa yo xiꞌin Ndios kuu sa xaꞌvi ka xi, san jaꞌa io x-promesa xi ñuyii yaꞌa xiꞌin ñuyii vaxi. 9 Toꞌon ndaa kuu jaꞌa san nandeꞌe sa kininchisa ndidaa ñayii. 10 Kuan sa saꞌa toꞌon yaꞌa kidachiion ndo xiꞌin taꞌan ntseꞌe ndo, kuan ñoꞌon ku kuanaa ndo Ndios nchito, ia kida sa nanitaꞌvi ndidaa ñayii, doko maska sa kuxi ndidaa ñayii xininchisa ñaꞌan xi ia.
11 Jaꞌa taꞌvichiion xiꞌin dakuaꞌa ñaꞌan. 12 Ma en kaꞌan sa nuliin nu duꞌua kuu yo, maska sa ku kuu ejemplu xi ndidaa ñayii xininchisa xiꞌin modo kaꞌan yo, na modo kuu yo, na modo xinimani yo ñayii, namodo io x-espíritu yo, na modo xininchisa yo xiꞌin na modo io ndoo xanaa yo. 13 Neni na nasaa ntsu, kaꞌan den, kaꞌvi san dakuaꞌa ñaꞌan. 14 Ma dandoo yo don io xo, sa níꞌin yo sa saꞌa profecía kuenta saki ndodo ndidaa tsa io jnu xi ndaꞌa tsa d̶iki yo. 15 Kada ndidaa jaꞌa san kada ndidaa sa kachi, ndasa na kini ñayii sa kutuꞌua yo. 16 Kada kuidadu mee yo xiꞌin sa dakuaꞌa ñaꞌan yo; san ma dandoo yo sa kada yo, kuan tu na kada yo jaꞌa san nanitaꞌvi yo xiꞌin ndidaa tsa sakunini ñaꞌan xo.