Na modo nandeꞌe sa ku kuu ndidaa tsa dakuaꞌa ñaꞌan
3
Jaꞌa ku sa ndaa: Tu andu nchoxi sa ku kuu jnu xi sa kuntsaka ñaꞌan xi ñayii kuu x-congregacion Ndios, guaꞌa sa nchu kada chiion yukua. 2 Doko nandeꞌe sa tsa io chiion yaꞌa nandeꞌe sa koo ndaa tsa, tsa tandaꞌa xiꞌin io xiꞌin endini ñadeꞌe, tsa sani- ini ndaa, tsa sani-ini antika sa kaꞌan, tsa ku yeñuꞌu, tsa sañaꞌan noo xeꞌe xi sa na kendoo ñayii, san vivo tsa sa dakuaꞌa ñaꞌan tsa; 3 san ma ku kuu tsa en tsa xini, san ma naa tsa, ma ku kuu tsa ñayii nchoj ntsaa sa niꞌi daa tuini; guaꞌa ka na ku kuu tsa ñayii guaꞌa, ñayii kaꞌnu xanaa xi, san adi ñayii nchoj ntseꞌe tuini; 4 san nakini tsa taꞌvichiion tsa xeꞌe tsa, na kada tsa sa na kueniꞌno ñaꞌan daꞌa tsa s-tsa xiꞌin na kuu yeñuꞌu nu. 5 Kuan tu kuu tsa en tsa nisa ti kachi tastuni xeꞌe xi, namodo kuntsaka ñaꞌan tsa xi ñayii kuu x-congregacion Ndios? 6 Ma ku kuu tsa en ñayii dika ni xininchisa ñaꞌan xi Jesucristu, kuan na ku-iꞌni tsa san taꞌan tsa sa taꞌan sakakuiꞌia. 7 Nandeꞌe sa ndidaa ñayii ti xininchisa na kiniguaꞌa ñaꞌan ñaꞌan s-tsa tuku, ndasa ndidaa ñayii na kininchisa sa kaꞌan tsa, san duꞌua ma kikagua tsa sa nchu kada sakakuiꞌia kuan s-tsa.aNa modo nandeꞌe sa ku kuu ndidaa tsa kuu diacono
8 San duꞌua ni tsa kuu diácono naꞌnu naꞌnu na ku kuu tsa, san ma nadama tsa s-toꞌon tsa, xiꞌin ma koꞌo ntseꞌe tsa vinu, san nisa ma nchoj ntsaa tsa sa niꞌi daa tsa tuini; 9 na kininchisa tsa ia kuu ku Toꞌo ndo xiꞌin na kuinokuachi tsa xi ia san na koo ndoo xanaa tsa. 10 Diꞌna ka na kototuni ñaꞌan s-tsa san danduu na koo tsa chiion yaꞌa, tu ti io sa xidokuachi tsa. 11 San d̶eꞌe tsa, ndaa ndaa na ku kuu ña, ma kada jaꞌa jukua dakuidokuachi ña, maska sa na kani-ini ndaa ña san ndidaa sa kida ña na kada ndaa ña, san ma dandaa ñaꞌan ña. 12 Ndidaa diácono na ku kuu tsa, tsa tandaꞌa xiꞌin io xiꞌin endini ñadeꞌe; san na tastuni guaꞌa tsa ndidaa d̶aꞌa tsa xiꞌin xeꞌe tsa ndidaa tsa. 13 Kuan tsa kida ndaa x-chiion diácono, kaꞌan guaꞌa s-tsa xiꞌin kuin ndaa tsa xiꞌin sa xininchisa tsa Jesucristu.
Sa ndaa kuiti sa xininchisa ndo
14 Toꞌon yaꞌa tsaa ntsu xo kuani ñoꞌon ku kuanaa ntsu sa kij ni ntsu ki koto ñaꞌan ntsu yo, 15 kuan tu na ku kuee ntsu, na kini yo na modo nandeꞌe sa kuinokuachi yo xeꞌe Ndios sa kuu x-congregacion ia nchito, kuan jaꞌa kuu en marku xiꞌin cimientu sa nchido ñaꞌan xi sa ndaa. 16 Sa ndaa kuiti kuu sa kuaꞌa ntseꞌe sa nchukachi sa kíxi Ndios sa io ndidaa ñayii:
Ndios nduu ia ñayii ñuyii yaꞌa,
x-Espíritu Ndios kachi sa ti ío x-kuachi ia,
san xíni ñaꞌan ndidaa ángel xi ia,
san káꞌan s-toꞌon ia xi ndidaa ñayii io ndidaa ñuu,
san xíninchisa ñaꞌan uu ñayii io ñuyii,
san kídakaꞌnu ñaꞌan xi ia ntsaa andivi.