San kída Pablo ñuu nani Tesalonica
2
Kuan xiniguaꞌa ni ndidaa ni vi xanii, sa saꞌan dan ndidaa da sa koto ñaꞌan da jni ndidaa ni, san adi dakuita duꞌua da s-tiempu da. 2 Kuan dini ndidaa ni xini ni sa kída ñaꞌa ntseꞌe ndidaa ñayii kuiꞌia io ñuu Filiposa kuan d̶a ndidaa da, san taꞌan ntseꞌe da, doko Ndios kida ntsee ia xanaa da ndidaa da ndasa na kaꞌan da s-toꞌon guaꞌa ia jni ndidaa ni san kuani kuaꞌa ñayii ti nchú kunini.b 3 Kuan ndidaa toꞌon kaꞌan da ndidaa da jni, nee ini kaꞌan da ndidaa da san ti kuu sa naꞌntsa san nisa sa kuiꞌia san nisa sa dandaa ñaꞌan da. 4 Kuan Ndios kukaꞌnu-ini ñaꞌan ia sa na kaꞌan da ndidaa da toꞌon guaꞌa yaꞌa, san duꞌua kaꞌan da; san adi sa nataꞌan xanaa ñayii kuu maska sa nataꞌan xanaa Ndios ia xini ku kuanaa ndo. 5 Kuenta xini ni ndidaa ni, ti káꞌan da ndidaa da meni toꞌon vita jni ndidaa ni, san nisa ti ndúku da namodo kineꞌen da tuini jni ndidaa ni, kuan Ndios kuu ia xini guaꞌa. 6 San ti nduku da sa na kadakaꞌnu ñaꞌan ñayii d̶a ndidaa da, san nisa sa kadakaꞌnu ñaꞌan mee ni ndidaa ni d̶a, adi dakaa ka ñayii, san kuani guaꞌa kada da sa na kada gastu ni kuan kuu da x-apóstol Jesucristu. 7 Doko guaꞌa ka, xu ku kuu guaꞌa da ndidaa da jni ndidaa ni, na en ñadeꞌe kida mani xi d̶aꞌa yiki xi. 8 Ntseꞌe xinimani ñaꞌan da ndidaa da jni ndidaa ni, san adi ni ndidaa toꞌon guaꞌa yaꞌa káꞌan da jni, maska sa ntsandeꞌe xuyii da ndidaa da saꞌntsa-ini da sa saꞌa ni ndidaa ni, kuan xinimani ñaꞌan ntseꞌe da jni ndidaa ni. 9 Kuan xini ni ndidaa ni vi xanii, sa xavi ntseꞌe da kidachiion da nduu xiꞌin niñi ndidaa da, ndasa ma ku kuu da en ñayii nandeꞌe sa kuañaꞌan ni sa koꞌo sa kaxi sa saꞌa sa kaꞌan da s-toꞌon Ndios.10 San dini ndidaa ni xini ni, san xini Ndios tuku, sa kadi ni xiꞌin ío ndaa da sa io ndidaa dini tsa xininchisa. 11 San xini ni tuku na modo xu kaꞌan da ndidaa da sa na nduku ntsee ni ndidaa ni xiꞌin na modo xu kadakaꞌnu da xanaa ni ndidaa ni kuenta en tata kida kaꞌnu tsa xanaa d̶aꞌa tsa, 12 kuaꞌa ntseꞌe guelta kaꞌan da jni ndidaa ni sa na koo ni modo taꞌvichion Ndios kuan kána ñaꞌan ia jni ndidaa ni sa na koo ni xiꞌin ia sa tastuni ia, sa kaꞌnu ntseꞌe.
13 Juandiku sañaꞌan ni on da ndidaa da taxaꞌvi xi Ndios, kuan kuenta tsaku jni ndidaa ni toꞌon kaꞌan da jni, san xininchisa ni doko adi kuenta s-toꞌon ñayii ñuyii yaꞌa, maska sa kuenta s-toꞌon Ndios, sa kuu sa ndaa kuiti sa kidachiion xanaa ndidaa dini tsa xininchisa. 14 Kuan dini ndidaa ni vi xanii taꞌan ni ndidaa sa xu taꞌan ndidaa ñayii kuu x-congregación Ndios, ñayii xininchisa ñaꞌan xi Jesucristu io Judea, san táꞌan ntseꞌe ni ndidaa ni kida ndidaa ñayii xuun ni, duꞌua kuenta ni táꞌan ndidaa tsa yaꞌa kída ndidaa ñayii kuu Israel, 15 ndidaa ñayii yaꞌa saꞌni ñaꞌan xi ku Toꞌo ndo Jesucristu xiꞌin saꞌni tsa kuaꞌa ntseꞌe profeta; san xiko ñaꞌan tsa d̶a ndidaa da;c san ti kida tsa sa nataꞌan xanaa Ndios, san xini uꞌu tsa ndidaa ñayii, 16 san ti nchoj ndidaa tsa yaꞌa, sa kaꞌan da ndidaa da xi ndidaa ñayii ti kuu ñayii Israel ndasa na nanitaꞌvi tsa, san duꞌua tsa yaꞌa ndidaa tsa dakaya ka tsa x-kuachi tsa, kuan sa diko ntseꞌe xi Ndios sa kíxi sa kuj s-tsa yaꞌa ndidaa tsa.
Pablo sani-ini nituku tsa sa kiꞌin tsa ku koto tsa ndidaa ñayii io ñuu Tesalonica
17 Doko dan ndidaa da vi xanii ío xika da taꞌa ndidaa da san ti xíni taꞌan ndo doko adi xanaa da ío xika, san nduku ntseꞌe da ndidaa da modo sa kini ñaꞌa nituku da jni ndidaa ni. 18 Juandiku keꞌen guelta nchúkiꞌin da ndidaa da sa io ni ndidaa ni xan, dan Pablo, doko kuaꞌa sa chodaka sakakuiꞌia d̶a ndidaa da. 19 Kuan sa saꞌa dini ndidaa ni juandiku io en sa ñoꞌon xanaa da ndidaa da, en sa ku-iꞌni da xiꞌin en sa kada sa kadakaꞌnu ñaꞌan d̶a ndidaa da kada ku toꞌo ndo Jesucristu ora na ndixi ia. 20 Kuan dini ndidaa ni kida sa ku naꞌnu da xiꞌin sa kida sa ku iꞌni da ndidaa da.