Gálatas 3

Kininchisa ndo ley ña kininchisa ndo Jesucristu

¡Naku ntseꞌe da ntsee d̶iki ndidaa dini ñayii io Galacia! andu dandaa ñaꞌan jni, sa ma kininchisa ni sa ndaa? Kuan dan kaꞌan ndaa da andu kuu Jesucristu ia i-nchitakaa cruz kuaan jni ndidaa ni. 2 Kachi toꞌon ni ndidaa ni na ora niꞌi ni x-espíritu Ndios, niꞌi ni kuenta xininchisa ni ley ña kii tsaku jni toꞌon guaꞌa yaꞌa, adi kuenta tsaku jni toꞌon guaꞌa yaꞌa san xíninchisa ni ña? 3 Tu duꞌua kída nchisa, san náku ti tediki ni tuda? kuan tu kesaꞌa saa ni en ñuyii sa saꞌa x-espíritu Ndios, naku vita meni ka ni ndidaa ni nchu kaka? 4 Ama ndidaa sa taꞌan ni taꞌan duꞌua ni ndidaa ni ña? ¡Tuj da sa ñaꞌan! 5 Ndios kida ia milagru sa io ni ndida ni xan san taxi ia x-espíritu Santu ia jni sa saꞌa sa xininchisa ni ley, ña sa saꞌa sa tsaku jni stoꞌon guaꞌa ia san xininchisa ni?

Tratu kída Ndios xiꞌin Abraham

6 Ndios xínimani ia Abraham kuan xíninchisa tsa Ndios. 7 Juandiku ntsaꞌa ni ka, ndidaa ñayii kuu nchisa d̶aꞌa Abraham kuu tsa xininchisa ñaꞌan xi Ndios. 8 Yodotuni s-toꞌon Ndios tuku, sa Ndios kinimani ia ndidaa ñayii ti kuu ñuu Israel, doko tu na na kininchisa ñaꞌan tsa ndidaa tsa xi ia. Juandiku Ndios káꞌan ia toꞌon guaꞌa yaꞌa xi Abraham san sadaa ia: Sa saꞌa yoꞌo juandiku kada ntsu sa guaꞌa xi ndidaa ñayii ñuyii yaꞌa. 9 San duꞌua, sa saꞌa Abraham kída sa Ndios kida ia sa guaꞌa xi ndidaa ñayii na kininchisa ñaꞌan xi ia kuenta kída Abraham.

10 Kuan ndidaa ñayii sani-ini sa nanitaꞌvi sa saꞌa ni ley taꞌnuntsatu, kuan s-toꞌon Ndios kachi: Taꞌnu ntsatu ndidaa ñayii ti kida ndidaa sa yodotuni ley ya. 11 Juandiku kachi ndaa sa nisa en ñayii ti saa jnu Ndios sa saꞌa ley, kuan ndidaa ñayii kida sa nchoxi Ndios sa saꞌa sa xininchisa ñayii kada sa koo ñayii oni oni. 12 Doko ley den kuu xiꞌin sa xininchisa ndo kuan ley yodotuni: Ñayii kida ndidaa sa yodotuni ley nanitaꞌvi sa saꞌa ley.

13 Doko Jesucristu kuu ia cháꞌvi ndidaa sa xidokuachi ñayii ti xininchisa ley. San taꞌnuntsatu ia sa saꞌa ntso ndidaa ndo. Kuan duꞌua yodotuni s-tutu ii Ndios: Taꞌnuntsatu ñayii satakaa ñaꞌan xi sata en yutu sa na kuu, 14 Ndasa ndidaa sa guaꞌa kachi Ndios sa kuañaꞌan ia xi Abraham na niꞌi ndidaa ñayii ti kuu ñuu Israel tuku. San duꞌua tu na kukaꞌnu-ini ndo Jesucristu san niꞌi ndo Espíritu kachi Ndios sa taxi ia ku ndo.

15 Xanii, na kaꞌan da en toꞌon sa ti vixi sa kukuituni xanaa ni ndidaa ni. Ora kida ñayii en tratu xiꞌin enka ñayii san kida firmar tsa, san tutu yukua ti en kachi dandoo adi chidotuni ka. 16 San duꞌua ndidaa sa sadaa Ndios sa kuañaꞌan ia xi Abraham xiꞌin en xayii tsa. San s-toꞌon Ndios ti kaꞌan sa kuxi ndidaa xayii tsa, maska sa kuxi en xayii tsa, ia kuu Jesucristu. 17 Sa nchukachi da kuu jaꞌa: Tratu kída ndaa Ndios xiꞌin Abraham sa kuxi Cristu, ley kíxi kumi cientu xiꞌin oko uxi kuia danduu, ti dandoñaꞌa xi tratu yaꞌa, sa nisa ma kachi dandoo tratu sádaa Ndios sa kuañaꞌan xi Abraham. 18 Kuan tu sa nanitaꞌvi na niꞌin sa saꞌa ley san ma ku kuu ka sa saꞌa sa sadaa Ndios sa kuañaꞌan ia xi Abraham.

Nasa kuu x-chiion ley kuaan tuda

19 Nasa nandeꞌe ley kuaan tuda? Ley kuaan kíxi sa saꞌa ndidaa kuachi xu kada ndidaa ñayii. Doko ley yukua nandeꞌe ntsa nasaa xayii Abraham tsa kachi sa kixi kuaan san Ndios tsandaꞌa ia uu ángel sa na kadaa ley kuan xi en ñayii. 20 San ora táxi Ndios kuan ley táxi ia sa saꞌa en ñayii doko ora sádaa ia sa kuañaꞌan ia xi Abraham sa kuañaꞌan ia ti tsandaꞌa ia en ñayii maska sa mee Ndios káꞌan xiꞌin tsa.

21 Nisa en modo ma kachi ndo sa ley ti xiniguaꞌa taꞌan xiꞌin ndidaa sa kachi Ndios sa kuañaꞌan ia xi Abraham. Kuan tu ley guaꞌani na taxi ñuyii ma ndeꞌe ku ndo ndidaa ndo, san Ndios na kinimani ñaꞌan ia ku ndo ndasa xininchisa ndo ley. 22 Doko sa saꞌa ley sa yodotuni, ndidaa ndituꞌu ñayii yeꞌe ndaꞌa kuachi, ndasa ndidaa ñayii xininchisa ñaꞌa xi Jesucristu na niꞌin sa kachi Ndios sa kuañaꞌan ia, sa kuu ñuyii ma ndeꞌe.

23 Antika sa Ndios na taxi ia sa xininchisa ñaꞌa ndo xi ia, san ley kuu kuenta en vekaa ku ndo ndidaa ndo, sa yentsadi ndo, ntsa ki na kada Ndios sa na tediki ndo nása kuu sa xininchisa ñaꞌa ndo xi ia. 24 San ley kuaan kúu na en ñayii dakuaꞌa ñaꞌan ku ndo sa na saa ndo sa io Jesucristu, san duꞌua na nakinimani ñaꞌan Ndios ku ndo sa saꞌa sa xininchisa ndo Jesucristu. 25 Doko vita sa io sa xininchisa ndo, san ti nandeꞌe ka sa dakuaꞌa ñaꞌan adi kachi toꞌon ley kuan na modo saa ndo sa io Jesucristu 26 kuan ndidaa ni kuu d̶aꞌa Ndios kuan xininchisa ni Jesucristu, 27 ndidaa dini ñayii sendutsa xiꞌin sa nani Jesucristu nduu ni kuenta mee ia. 28 Juandiku nasa kuu mee ni ndidaa ni, tu kuu ni ñayii ñuu Israel ña kuu ni griegu, esclavu ña adii esclavu, tsiee adi ñadeꞌe. Tu xininchisa ni Jesucristu san eni ka kuu ni ndidaa ni. 29 Kuan tu kuu ni xaꞌan Jesucristu san kuu ni xayii Abraham, san niꞌi ni ndidaa sa sadaa Ndios sa kuañaꞌan ia xi Abraham.