4
San kachi da jaꞌa tuku: Tu nu niꞌi ndidaa sa io xi s-tata xi luchi daa nu, eni kuu nu xiꞌin ndidaa tsa xinokuachi xeꞌe nu, san kuani xaꞌan nu kuu ndidaa, 2 kuan luchi daa nu san xito ñaꞌan daa ñayii jnu, ntsa kii chikuꞌua s-tata nu sa nakeꞌen nu ndidaa sa kuu xaꞌan nu. 3 San duꞌua ni ío ntso ndidaa ndo tuku kuenta lin daa ndo, xu tastuni ñaꞌa ñuyii yaꞌa ku ndo san xu kada ndo sa nchoxi. 4 Doko xínotaꞌan kii chikuꞌua Ndios, tsandaꞌa ia D̶aꞌa ia, ia kaku xi en ñadeꞌe san yeꞌe ia ndaꞌa ley. 5 Ndios tsandaꞌa ia D̶aꞌa ia, ndasa na kineꞌen ñaꞌan ia ndaꞌa ley ku ndo ndidaa ndo, san danduu nakuaka ñaꞌan ia ndasa na nduu ndo d̶aꞌa ia.6 San vita ndasa ndúu ni ndidaa ni d̶aꞌa ia, san Ndios tsandaꞌa ia xanaa ni x-espíritu D̶aꞌa ia, ndasa nakoo jni ndidaa ni. Juandiku ora kaꞌan ndo xi Ndios san Espíritu kida sa na kuu kadaa ndo ¡Taa! xi ia. 7 Dini ndidaa ni ti kuu ka ni esclavu, kuan kuu ni ndidaa ni d̶aꞌa Ndios. San tu kuu ni d̶aꞌa Ndios taxaꞌvi xi ia juandiku niꞌi ni ndidaa sa io xi ia sa saꞌa Jesucristu.a
Ndiꞌi xanaa Pablo sa saꞌa ndidaa gálatas
8 Kuenta vita kininchisa ka ni Ndios, san xu kuinokuachi ni xi ndidaa sa ti kuu ndios. 9 Doko adi mee ni ndidaa ni xíni ñaꞌan xi Ndios, maska sa Ndios xíni ñaꞌan jni, juandiku ti guaꞌa sa naxikokagua nituku ni sa kada ni sa kida ndidaa ñayii io ñuyii yaꞌa, kuan ndidaa jaꞌa ti guaꞌa xiꞌin ti xaꞌvi xi. 10 Dini ndidaa ni choꞌon ii ni kii naꞌnu, yoo, temporada xiꞌin kuia. 11 Ntseꞌe sani-ini da gua ti nandeꞌe ndidaa sa kída da sa saꞌa ni ndidaa ni.
12 Xanii, nchoj da sa na koo ni kuenta io da, kuan kúu da kuenta dini ndidaa ni, sa dini atuu en sa kuiꞌia kída ni ndidaa ni d̶a. 13 Kuan dini ndidaa ni xini ni sa sa kuꞌu d̶a kida sa ío da uu kii sa io ni ndidaa ni, san juan kuu diꞌna nuu guelta káꞌan da toꞌon guaꞌa yaꞌa jni; 14 kuani kuꞌu d̶a doko dini ndidaa ni ti kukuiꞌia-ini ñaꞌan ni san nisa ti xiko ñaꞌan ni, maska sa semani ñaꞌan ni xeꞌe ni d̶a, kuenta en x-ángel Ndios adi na mee Jesucristu. 15 Kuan dan xini da sa tu guaꞌni na tagua ni nduchinuu ni sa taj ni d̶a san kada ni. Naku ti duꞌua ka kuu ni vita. 16 Ña sa kaꞌan da sa ndaa juandiku xini-uꞌu ñaꞌan ni ndidaa ni.
17 Ndidaa tsa kachi sa na kada ni ndidaa sa yodotuni j-ley ndidaa ñayii kuu ñuu Israel, danaꞌa sa kida mani ntseꞌe tsa jni ndidaa ni, doko meni sa naꞌntsa kuu, kuan sa nchoj s-tsa kuu sa na dana ñaꞌan ni d̶a ndidaa da, san na kunchiko ñaꞌan ni ndidaa ni s-tsa. 18 Guaꞌa sa nduku ntsee ni sa kada ni sa guaꞌa, san adii ni ora io da sa io ni ndidaa ni xan. 19 Ndidaa dini kuu ni na d̶aꞌa da, juandiku taꞌan ntseꞌe da sa saꞌa ni ndidaa ni duꞌua kuenta taꞌan en ña deꞌe ora sa io sa kaku ña daꞌa, san taꞌan da ndasa dini ndidaa na ku kuu ni kuenta Jesucristu, 20 naku ti io da sa io ni ndidaa ni xan, ndasa na kaꞌan den da en taꞌa jni, kuan ti sakuituni xanaa da naku da kida ni.
Sa kída Agar xiꞌin Sara
21 Ndidaa dini ñayii nchu kininchisa ley kachi toꞌon ni: ti tsaku jni nasa yodotuni ley kuan ña? 22 Kuan yodotuni sa Abraham ío uvi d̶aꞌa tsa, en nu kaku Agar ña seen ñaꞌan xi sa kuinokuachi,b san enka nu kaku Sara d̶eꞌe mee tsa.c 23 D̶aꞌa Agar káku nu kuenta kaku ndidaa ñayii, doko daꞌa kaku Sara, káku nu kuan Ndios sadaa ia xi Abraham sa kaku nu. 24 Sa duꞌua, sa káku nduu nuyaꞌa kuaꞌa sa nchukachi. Nduu ñadeꞌe yaꞌa nchu kachi uu tratu kída Ndios xi ñayii. Agar kuaan ndee ña tratu kee tinduu Sinaí, san d̶aꞌa ña seen ñaꞌan jnu sa kuinokuachi nu, 25 san Agar kuu ña kuenta tinduu Sinaí io Arabia, san kaa ña kuenta kaa Jerusalén io vita kuan ndidaa ñayii io Jerusalén yeꞌe ndaꞌa ley. 26 Doko Sara kuu ña ndee tratu saa, san kaa ña kuenta kaa Jerusalén io andivi sa ti yeꞌe ndaꞌa ley, san d̶aꞌa ña yukua kuu ndo ndidaa ndo, 27 kuan duꞌua yodotuni:
Ku-iꞌni yoꞌo nu ti kachi koo d̶aꞌa xi;
kana sa ku-iꞌni, yoꞌo nu ti xini na modo uꞌu sa kaku daꞌa;
Kuan yoꞌo nudeꞌe dandoo ñaꞌan xi, kuaꞌa ka daꞌa koo yo
sa kuxi nu io xee xi.d
28 Xanii, ntso ndidaa ndo kuu ndo kuenta Isaac tsa sadaa Ndios sa kuañaꞌan ia xi Abraham, san kaꞌan da sa ndee ndo tsa yukua, kuan kuu ndo ndidaa daꞌa sadaa Ndios sa kuañaꞌan ia. 29 San tiempu yukua nu káku kuenta kaku ndidaa ñayii, xíni uꞌu nu nu káku sa saꞌa sa tastuni espíritu,e san duꞌua ni kuu ntsa vita. 30 Doko s-tutu ii Ndios kachi sa Ndios sadaa ia xi Abraham: Kuiko nu séen yo sa kuinokuachi jnuu yo xan xiꞌin d̶aꞌa nu; kuan ti nitaꞌvi nu sa niꞌi nu ndidaa sa niꞌi d̶aꞌa yo Isacc xan nu kaku d̶eꞌe mee yo.f 31 Xanii, ti kuu ndo d̶aꞌa ña señaꞌan xi sa kuinokuachi, maska sa kuu ndo d̶aꞌa d̶eꞌe mee Abraham.