2
Danduu yaꞌia uxi kumi kuia, san saꞌan nituku da Jerusaléna xiꞌin Bernabé san ntsaka da Tito ya tuku. 2 Saꞌan da kuan Ndios kachi ia sa na kiꞌin da. San Jerusalén ío en junta xiꞌin ndidaa ni tsa kunaꞌnu kukaꞌnu-ini ñaꞌan xi Jesucristu io juan, san nakani da na modo xu káꞌan da toꞌon guaꞌa xi ndidaa ñayii ti kuu ñuu Israel, ndasa na nanitaꞌvi tsa ndidaa tsa. Duꞌua kída da kuan ti nchoj da sa chiion kida da na ku kuu en chiion duꞌua. 3 Saꞌan da xiꞌin Tito san kuani kuu nu griegu, doko ti en chontsee sa na kada circuncidarb nu, 4 kuan uu ñayii kaꞌan sa kukaꞌnu-ini ñaꞌan xi Jesucristu sáꞌan juan, doko saꞌan ni tsa sa ntsaꞌa ñaꞌan tsa d̶a ndidaa da. Ndidaa tsa yaꞌa kuu tsa naꞌntsa, san nchu dadana tsa sa kutuꞌua ndo xi Jesucristu, san nchoj s-tsa sa nayii ndo ndaꞌa ley. 5 Doko ti kída da sa kachi tsa ndidaa tsa, kuan sa nchoj da ndidaa da kuu sa na kininchisa ni ndidaa ni toꞌon guaꞌa yaꞌa, sa kuu sa ndaa.6 San ndidaa tsa kuu jnu xi, ti tuni d̶a nasa kuu kuu mee tsa kuan Ndios ti ntsaꞌa ia nasa kuu ñayii, ti dádana ñaꞌan tsa enka toꞌon saa d̶a ndidaa da.c 7 Guaꞌa ka nakininchisa tsa ndidaa tsa sa Pedru kuu tsa kukaꞌnu-ini ñaꞌan xi, sa na kaꞌan s-toꞌon Ndios xi ndidaa ñayii kuu ñuu Israel, san dan táꞌvichiion d̶a sa na kaꞌan da xi ndidaa ñayii ti kuu ñuu Israel. 8 Kuan Ndios tsandaꞌa ñaꞌan ia xi Pedru sa na kaꞌan tsa xi ndidaa ñayii kuu ñuu Israel, duꞌua ni tsandaꞌa ñaꞌan ia xi mee da sa na kaꞌan da xi ndidaa ñayii ti kuu ñuu Israel.
9 Juandiku Santiagu, Pedru xiꞌin Juan tsa taꞌvichiion xi sa na kuntsaka ñaꞌan, nakininchisa tsa sa Ndios taxi ia chiion yaꞌa d̶a. San duꞌua xínimani ñaꞌan tsa d̶a nduu da Bernabé ya, san semani tsa sa na kiꞌin da ku kaꞌan da xi ndidaa ñayii ti kuu ñuu Israel, san mee tsa ndidaa tsa kaꞌan tsa xi ndidaa ñayii kuu ñuu Israel. 10 Endini sa sákundaꞌvi tsa d̶a ndidaa da, sa na keꞌe d̶iki da sa chintsee da ndidaa ñayii kundaꞌvi xininchisa, san juan kuu sa ndukuntsee da sa kada da ndidaa da.
Pablo nakani ñaꞌan ndaa tsa xi Pedru
11 Doko kuenta saꞌan Pedru Antioquía, jnu tsa sadaa da, sa ti io ndaa sa kida tsa. 12 Kuan diꞌna ka xu kaj s-tsa xiꞌin ndidaa tsa ti kuu ñuu Israel ti io circuncidadu, antika sa saa uu tsa kuu ñuu Israel tsandaꞌa Santiagu; danduu kee den tsa, ti xu kaxka tsa xiꞌin ndidaa tsa yaꞌa, kuan xu yuꞌu tsa ñayii kuu ñuu Israel io circuncidadu saa juan. 13 San dagua ka ñayii xininchisa kuu ñuu israel io Antioquia, dándee ndidaa sa kuiꞌia kida Pedru, ti xu kotaꞌan tsa sa kaj tsa xiꞌin ndidaa ñayii ti kuu ñuu Israel xininchisa, san sa kída tsa ndidaa tsa kída sa ntsa ndeꞌe Bernabé duꞌua na kada. 14 Doko kuenta xíni da sa ti io tsa ndidaa tsa kuenta kachi toꞌon guaꞌa dakuaꞌa ñaꞌan Jesús, sadaa da xi Pedru ya jnu ndidaa tsa yaꞌa: “Dini kuu ni ñuu Israel doko io ni kuenta io ndidaa ñayii ti kuu ñuu Israel, naku tseyeka ni ndidaa ñayii ti kuu ñuu Israel sa na koo tsa kuenta io ñayii ñuu Israel tuda?”
San na nitaꞌvi ndo vaxi sa saꞌa Jesucristu
15 Ntso kuu ndo ñuu Israel ntsa kaku ndo, san ti kuu ndo ñayii kuachi kuenta ndidaa ñayii ti kuu ñuu Israel; 16 kuan xiniguaꞌa ndo sa Ndios na kinimani ñaꞌan ia xi ñayii xininchisa ñaꞌan xi Jesucristu, san ti en nanitaꞌvi sa saꞌa ley.d Ntso ndidaa ndo xíninchisa ñaꞌan ndo xi Jesucristu tuku,e ndasa na na kinimani ñaꞌan Ndios ku ndo. Kuan nisa en ñayii ma nanitaꞌvi sa saꞌa sa xininchisa ley.
17 Ntso nchoj ndo sa na na kinimani ñaꞌan Ndios ku ndo sa saꞌa Jesucristu. Doko tu sa na kada ndo jaꞌa na kada sa kini ndo sa kuu ndo ndidaa ndo ñayii kuachi kuenta ndidaa ñayii ti kuu ñuu Israel. Ama jaꞌa nchu kachi sa Jesucristu xinokuachi ia xi ndidaa ñayii io xkuachi xi ña? ñaꞌan. 18 Kuan tu ndidaa sa kachi da sa ma kada ka da, na kada nituku da san kida da kuachi. 19 Kuan sa saꞌa ley xiꞌin sa kuxi ley kída sa xiꞌi da, ndasa modo yukua na kunchito da sa kuxi Ndios. 20 San vita dan xiꞌi da en cruz kuenta Jesús, san adii ka dan nchito vita, kuan Jesucristu io ia xanaa da. San neni nchito da, xiꞌin yikikoño yaꞌa nchito da, kuan kukaꞌnu-ini da d̶aꞌa Ndios, ia xínimani ñaꞌan d̶a xiꞌin nákuañaꞌan xuyii xi sa saꞌa da. 21 Ti ku sa-ini da xi gracia taxi Ndios. Kuan tu Ndios na kinimani ñaꞌan ia sa saꞌa sa kida ndo sa kachi ley, san sa xiꞌi Jesucristu ti xaꞌvi xi tudaa.