CARTA CHÍDOTUNI PABLO XI NDIDAA ÑAYII XININCHISA IO GALACIA
Pablo kaꞌan tsa xi ndidaa ñayii xininchisa ñaꞌan xi Jesucristu io Galacia
1
Dan kuu Pablo x-apóstol Jesucristu, san adi ñayii sáni ñaꞌan d̶a, Jesucristu xiꞌin Ndios kuu ia kána ñaꞌan d̶a, ia kída sa nándoto Jesucristu sa io ndidaa ndii. 2 Dan xiꞌin ndidaa ku kiani ndo io sa io da ya, tsaa da carta yaꞌa xi ndidaa x-congregación Ndios io Galacia. 3 Ndios ia kuu ku Tata ndo xiꞌin ku Toꞌo ndo Jesucristu, na taxi ia j-gracia ia xiꞌin sa na kookadi ni ndidaa ni, 4 Jesucristu nákuañaꞌan ia xuyii ia sa saꞌa ku kuachi ndo ndidaa ndo, ndasa ma kuita ndo ndidaa ndo ñuyii kuiꞌia yaꞌa, kuan duꞌua nchóxi Ndios ia kuu ku Tata ndo, 5 ia na kukaꞌnu na kuduku ndikii. Duꞌua na kuu.Endini toꞌon guaꞌa io
6 Ndios kána ñaꞌan ia jni ndidaa ni, san sa saꞌa Jesucristu dádana ñaꞌan ia j-gracia ia jni ndidaa ni. Juandiku sani-ini da naku ntseꞌe da kama dána ni ndidaa ni sa xininchisa ni Jesucristu, san nchiko ni enka toꞌon sa ti kuu toꞌon guaꞌa yaꞌa. 7 Doko kuadi io enka toꞌon guaꞌa; kuan io ñayii nadama toꞌon guaꞌa yaꞌa, san duꞌua kida ñayii ndasa na dana ni s-toꞌon guaꞌa Jesucristu. 8 Doko tu dan ndidaa da, adi en ángel io andivi na kaꞌan enka toꞌon den na kagua sa kuxi toꞌon guaꞌa káꞌan jni ndidaa ni, san na taꞌnu ntsatu. 9 Sá kachi toꞌon da ndidaa da jni, san kaꞌan nituku da: Tu andu kaꞌan enka toꞌon sa kuxi toꞌon guaꞌa xininchisa ni san na taꞌnu ntsatu.
10 Dan ti nduku da sa kendoo guaꞌa da xiꞌin ñayii, maska sa xiꞌin Ndios nchu kendoo guaꞌa da, kuan tu nchu kendoo guaꞌa da xiꞌin ñayii san ma ku kuu da tsa xinokuachi xi Jesucristu.
Chiion kida Pablo
11 Juandiku kachi da jni vi xanii, toꞌon guaꞌa káꞌan da jni adi s-toꞌon ñayii ñuyii yaꞌa kuu; 12 kuan nisa en ñayii ti táꞌvichiion xiꞌin ti dakuaꞌa ñaꞌan toꞌon guaꞌa yaꞌa d̶a, maska sa Jesucristu kuu ia dádana ñaꞌan d̶a.
13 Kuan dini xini ni ndidaa ni na ñayii kúu da nee ñotaꞌan da judaísmo, san xini ni ndidaa ni tuku na modo nika xu kada da xi ndidaa ñayii kuu x-congregación Ndios, san xu nduku ntseꞌe da tsa ndasa ma kaya tsa ndidaa tsa.a 14 San dan xu ku kuu en tsa kuu jnuu xi judaísmo, san xu ku kuiño ka da sa kuxi ndidaa tsa xu dagua xiꞌin da xuun da, san kuiño ntseꞌe da xi sa xu kininchisa s-tadeꞌe da.b 15 Doko Ndios ndekaj xaꞌan ia d̶a ntsa kii ñoꞌon da xiti j-nana da, duꞌua kída ia sa saꞌa j-gracia ia. 16 Kída ia sa xíni da D̶aꞌa ia,c ndasa na kaꞌan da s-toꞌon guaꞌa ia sa nanitaꞌvi ñayii ti kuu ñuu Israel. San nisa en ñayii ti dákuaꞌa ñaꞌan d̶a, 17 san nisa ti saꞌan da Jerusalén sa ntsaꞌa da ndidaa tsa kuu apóstol antika sa kuj da. Sa sáꞌan da kuu país Arabia, danduu sáꞌan da ñuu Damasco.
18 San yaꞌia uni kuia san sáꞌan da Jerusalén,d sa ntsaꞌa da Pedru san ío da saꞌun kii xiꞌin tsa. 19 Doko ti xíni da nisa en ka x-apóstol Jesucristu, meni Jacobo, xani ia ku Toꞌo ndo xíni da; 20 san ndidaa sa kaꞌan da kuu sa ndaa, ti naꞌntsa da kuan Ndios ntsaꞌa ñaꞌan ia d̶a.
21 Danduu saꞌan da país Siria xiꞌin Cilicia. 22 San ndidaa ñayii io ndidaa x-congregación Ndios io Judea ti xu kini ñaꞌan tsa d̶a. 23 Sa xu kuvaa kuu sa xu kaꞌan tsa ndidaa tsa: “Tsa xu kuiko ñaꞌan xi ndidaa ñayii xininchisa ñaꞌan xi Jesucristu, vita xininchisa ñaꞌan tsa san kaꞌan tsa toꞌon guaꞌa yaꞌa, sa kuu toꞌon xu kini uꞌu tsa diꞌna.” 24 San xu kadakaꞌnu tsa Ndios sa saꞌa da.