Sa nandeꞌe sa niꞌi tsa xinokuachi xi Ndios
9
Ama adi apóstol kuu da ña? Ama ti xini ni sa guaꞌa ni kada da sa sani-ini da sa kuu sa guaꞌa ña? Ama ti xíni da xiꞌin jnu da Jesucristu ia kuu ku Toꞌon ndo kuaan ña? San taxaꞌvi xi chiion kida da, dini ndidaa ni xininchisa ni Jesucristu 2 San kuani dagua ka ñayii na kani-ini sa ti kuu da apóstol, doko dini ndidaa ni xini ni sa dii apóstol kuu da; dini ndidaa ni xininchisa ni Jesucristu san juan nchukachi sa kuu nchisa da x-apóstol Jesucristu.3 Jaꞌa kuu sa tavi ñaꞌan d̶a xi ndidaa tsa ntseꞌe da dakuido kuachi ñaꞌan duꞌua d̶a: 4 Ti nitaꞌvi da sa kaj d̶a xiꞌin sa koꞌo da ña? 5 Ama ti nitaꞌvi da ndidaa da sa kuntsaka da en ñadeꞌe xininchisa ñaꞌan xi Jesucristu ndasa na chintsee ñaꞌan ña d̶a ndidaa da, duꞌua kuenta kida ndidaa ka apóstol xiꞌin ndidaa xani ku Toꞌo ndo Jesucristu xiꞌin Pedru kuan ña? 6 Ña ama dan xiꞌin Bernabé ni ka ya kuu sa nandeꞌe sa kadachion ndasa na kunchito? 7 Ña da soldadu chaꞌvi mee ndidaa sa nandeꞌe xi? Ña andu choꞌon en itu tu tinchiꞌio san ti saxi x-kuiꞌi xi? Ña andu sadi ndikachi san ti xiꞌi d̶ikui te?
8 Ma kani-ini ni sa s-toꞌon mee da kuu sa kaꞌan da ya, kuan duꞌua yodotuni j-ley Ndios. 9 Kuan ley kuan duꞌua yodotuni: Ma chiyoꞌo yo xuꞌu ndikutu ora xiko te erra.a Duꞌua kaꞌan ia kuan ñoꞌon ni xanaa ia kititata ña? 10 Kaꞌan ia sa saꞌa mee da ndidaa da kuenta guaꞌa xinokuachi da xi ia. Kuan sa saꞌa mee da ndidaa da juandiku duꞌua yodotuni, kuan duꞌua kuenta tsa daka trigu xiꞌin tsa xiko erra ñoꞌon xanaa tsa sa niꞌi tsa tata. 11 San dan nduu da chóꞌon da toꞌon guaꞌa kuu xaꞌan x-espíritu Ndios xanaa ni ndidaa ni na en tata, sa ama ntseꞌe kuaꞌa kuu sa xika da sa na chintsee ñaꞌan ni sa nakoo da ñuyii ña?b 12 Tu deen ñayii chintsee ni san dan ndidaa da nandeꞌe sa chintsee ñaꞌan ka ni d̶a, doko dan ndidaa da nisa dana ti xika da kuani nitaꞌvi da sa kaka da jni, duꞌua kida da ndasa ma kukuin sa kaꞌan s-toꞌon guaꞌa Ndios.
Doko ti xika da jaꞌa jni ndidaa ni, guaka kuyakui da ndidaa, ndasa ma kada da sa ndugua ni ndidaa ni san ma kaya toꞌon guaꞌa ya. 13 Ama ti xini ni sa tsa kidachiion templu Jerusalén, saj tsa sa io templu; san tsa xinokuachi jnu altar saj s-tsa sa yodo jnu altar kuan ña?c 14 San duꞌua táꞌvichiion ku Toꞌo ndo Jesucristu xi dan ndidaa da, tsa kaꞌan toꞌon guaꞌa ya, sa kunchito da sa saꞌa chiion yaꞌa.d 15 Doko dan atuu sa xika da jni ndidaa ni, san adi chidotuni da ndasa nchoj da sa na taj ni sa taj ni ndidaa ni d̶a. Kuan guaꞌa ka tu na kuu da san adii sa en ñayii na kachi sa ti nandeꞌe sa kída da sa saꞌa ia kuu ku Toꞌo ndo.
16 Kuan tu nakaꞌan da toꞌon guaꞌa ya, atuu sa ku-iꞌni da kuan jaꞌa táꞌvichiion d̶a sa kada da; kuan ¡ndaꞌvi mee da tu ma kaꞌan da toꞌon guaꞌa yaꞌa! 17 Juandiku tu na kada da chion yaꞌa xiꞌin nee xanaa da, niꞌin da xaꞌvi da; san tu ma kada da doko sa taꞌvichiion ia sa na kada da chiion yaꞌa. 18 Nasa kuu xaꞌvi da tuda?, xaꞌvi da kuu sa na kaꞌan daa da toꞌon guaꞌa ya, san ma teyaꞌvi da, kuani niꞌi taꞌvi da sa niꞌin da en xaꞌvi da.
Na ndukuntsee ndo sa niꞌi ndo sa taxi Ndios
19 San kuani ti kuu da en esclavu doko nduu da na en esclavu xinokuachi jni ndidaa ni, ndasa na niꞌi da kuaꞌa ntseꞌe ñayii sa kuxi Cristu. 20 Ora sa kutaꞌan da ndidaa ñayii ñuu Israel nduu da na en ñayii ñuu Israel, ndasa na kininchisa uu ñayii yaꞌa Jesucristu. San duꞌua ndidaa ñayii xininchisa ley, nduu da kuenta en ñayii xininchisa ley ndasa na niꞌi da uu ñayii yaꞌa sa na kininchisa ñaꞌan tsa xi Jesucristu (kuani ti yeꞌe da ndaꞌa ley) 21 Ora io da sa io ndidaa ñayii ti xini ley, kida da sa kida ñayii yaꞌa tuku, ndasa na kininchisa ndidaa ñayii yaꞌa Jesucristu (adi jaꞌa nchu kachi sa ti io j-ley Ndios d̶a kuan yeꞌe da ndaꞌa j-ley Jesucristu) 22 San ora io da sa io ndidaa ñayii díka xininchisa ñaꞌan xi Jesucristu, nduu da na en ñayii yukua tuku ndasa na nanitaꞌvi ñayii yaꞌa. Jaꞌa nchukachi sa kuu da taꞌa taꞌa sa kuu ndidaa ñayii yaꞌa ndasa duꞌua na nanitaꞌvi dagua ñayii yaꞌa. 23 San ndidaa jaꞌa kida da sa saꞌa toꞌon guaꞌa ya, ndasa na niꞌi da ndidaa sa kachi.
24 Kuan xini ni ndidaa ni, sa ndidaa ñayii saꞌan sa kono en competencia, en dini ñayii kidanar, san ñayii yukua niꞌi en sa niꞌi. San duꞌua io ntsoo ndidaa ndo, kuenta guaꞌa xininchisa ndo Jesucristu, kuu kuenta en sa kono ndo, juandiku nakoo ndaa ndo kuan na kadanar ndo, san na niꞌi ndo en sa niꞌi ndo. 25 San ndidaa tsa sa kono dakuaꞌa ntseꞌe tsa, san taꞌan ntseꞌe tsa ndasa na kadanar tsa, san na niꞌi tsa en corona sa ndeꞌe ñuyii yaꞌa, doko ntsoo ndidaa ndo ndukuntsee ndo ndasa na niꞌi ndo en corona ti ndeꞌe. 26 Juandiku ti xino kueꞌe duꞌua da san nisa ti naa duꞌua da. 27 Maska sa kida da sa na kininchisa ñaꞌan xikikoño da d̶a; san duꞌua kida da, kuan ti nchoj da sa ora tuꞌu kaꞌan da s-toꞌon Ndios, san mee da kendoo da adi kuita da carrera yaꞌa.