Ma kada sa naxikokagua ndidaa tsa dika xininchisa
8
San vita na kachi toꞌon da ndidaa sa ndukutoꞌon ni, sa saꞌa ndidaa sa doko xi idolo: Ndidaa ndo xini nasa kuu ndidaa jaꞌa. Doko nchoxi sa nakininchisa sa ndidaa sa kutuni ku ndo kida sa nchu ku kuu naꞌnu ndo, doko sa xinimani kida sa saꞌnu ku espíritu ndo. 2 Andu sani-ini sa xini ntseꞌe, san ti xini ndaa kuu. 3 Doko andu xinimani ñaꞌan xi Ndios, Ndios xini andu kuu ñayii yaꞌa.4 Juandiku, ndidaa sa saj ndo, sa sañaꞌan ñayii xi ndidaa idolo, xini ndo sa idolo nisadana ti kuu ñuyii yaꞌa, Kuan xini ndo sa io en dini Ndios. 5 Kuani io sa danani ñayii ndios andivi xiꞌin nuꞌu (kuan kaꞌan ñayii sa io kuaꞌa ndios xiꞌin kuaꞌa tsa toꞌo) 6 doko ntsoo xini ndo sa io en dini Ndios, ia kuu ku Tata ndo. Ia kída guaꞌa ndidaa sa io, san ntsoo ndidaa ndo kuu ndo xaꞌan ia. Io en dini ia kuu ku Toꞌo ndo tuku, san ia yaꞌa ku Jesucristu. Ndios kída guaꞌa ia ndidaa sa io sa saꞌa Jesucristu.
7 Adi ndidaa ñayii sakuituni xanaa xi ndidaa jaꞌa; kuan antika sa kininchisa ni Jesucristu, ku ini ni sa chiñuꞌu ni idolo. San ora saj ni koño saj ni kuenta sa dóko xi idolo, san juan kida sa kida kuiꞌia sa sani-ini ni kuan ti sakuituni ndaa xanaa ni. 8 Kuan adi sa saj ndo kida sa nduu yachi ndo adi ku xika ndo sa io Ndios. 9 San kuani guaꞌa ni sa kaj ndo ndidaa sa io, doko guaꞌa ndo kuan na kada ndo sa nayuꞌu ñayii dika xíninchisa. 10 Kuan tu dakaa ñayii xininchisa ñaꞌan xi Jesucristu ti sakuituni ndaa xanaa xi, na kini ñaꞌan jni sa intsaku ni sa kaj ni sa dóko xi idolo, ñayii yaꞌa kani-ini tsa sa guaꞌa ni sa kaj ndo sa doko xi idolo. 11 Tu duꞌua kida ni kuan sakuituni ndaa xanaa ni, san ku kiani ndo tsa ti sakuituni ndaa xanaa xi kuita tsa, san Jesucristu xiꞌi sa saꞌa tsa tuku. 12 Ora duꞌua kida ni, kida ni sa ku kiani ndo tsa ti sakuituni ndaa xanaa xi, na tauꞌu xanaa tsa san kida ni kuachi jnu Jesucristu. 13 Juandiku tu sa saꞌa xi sa saj d̶a kida sa kida xani da kuachi, ma kaj da koño, ndasa ma kada xani da kuachi.