Na modo koo ndaa ñayii ndiaꞌan
7
San vita na naxikoneꞌe da ndidaa sa nduku toꞌon ni, guaꞌa ka tu ma en koo xiꞌin ñadeꞌe. 2 Doko ndasa ma en kada kuachi xiꞌin xikikoño xi, juandiku tsie nakoo d̶eꞌe tsa san ñadeꞌe nakoo xee ña. 3 Tsayee nakoo tsa xiꞌin d̶eꞌe tsa, san ñadeꞌe kuaan nakoo ña xiꞌin xee ña. 4 Kuan ñadeꞌe io xee xi, ti tastuni nimee ña xikikoño ña kuan xaꞌan xee ña kuu xikikoño ña, san duꞌua ni tsayee kuaan tuku, kuan xaꞌan d̶eꞌe tsa kuu xikikoño tsa. 5 Ma kada kini taꞌan ni xikikoño ni, ña enika tu io sa kakataꞌvi ni xi Ndios, san dandoo ni sa io ni ndiaꞌan ni ntsa na taꞌan kii kachi ni sa kakataꞌvi ni, san naxino kii yukua san nakuaka taꞌan ni ndiaꞌan ni san koo ni nduu ni, kuan na kada kototuni ñaꞌan sakakuiꞌia jni nduu ni san kikagua ni kuachia.6 Jaꞌa kuu en toꞌon kaꞌan da jni doko adi taꞌvichiion da sa duꞌua na kada ni. 7 Guaꞌa tu ma en ñayii koo d̶eꞌe xi adi xee xi, na koo kuenta mee da; doko ndide ndiden sañaꞌan Ndios sa koo ñayii, andu koo d̶eꞌe xi adi xee xi san andu ñaꞌan.
8 Kaꞌan da xi nu vita koo ka d̶eꞌe adi xee xi xiꞌin ndidaa ña kendoo kee, sa guaꞌa ka ma tandaꞌa nu ndidaa nu san nakoo kuenta mee da. 9 Doko tu ntsaꞌa nu sa ma ku yakui nu, san na tandaꞌa nu guaꞌa ka; kuan guaꞌa ka tu na tandaꞌa nu kuiꞌia ka sa kayu nu sa sani-ini nu sa koo nu xiꞌin ñayii.
10 Doko ñayii tandaꞌa, taꞌvichiion ia kuu ku Toꞌo ndo adi dan taꞌvichiion: Sa ñadeꞌe ma d̶andoo ña xee ña; 11 doko tu daa ñadeꞌe dandoo ña xee ña, kadivini nakoo ña ma tandaꞌa ka ña xiꞌin enka tsie, guaꞌa ka nanduku ña sa ndumani ña xiꞌin xee ña. Duꞌua ni tsayee tuku ma d̶andoo tsa d̶eꞌe tsa.b
12 San dagua ka ñayii sadaa da xi, adi ia kuu ku Toꞌo ndo: Tu dakaa ku kiani ndo io d̶eꞌe tsa, san ti xininchisa ña Jesucristu, doko semani ña sa xee ña xininchisa tsa Jesucristu, san ku kiani ndo ma dandoo ñaꞌan tsa xan. 13 San tu dakaa ku kuaꞌa ndo io xee xi san ti xininchisa tsa Jesucristu, doko semani tsa sa d̶eꞌe tsa xininchisa ña Jesucristu, san ku kuaꞌa ndo ya ma dandoo ñaꞌan ña s-tsa. 14 Kuan tsa ti xininchisa guaꞌa ni na kinimani ñaꞌan Ndios tsa sa saꞌa d̶eꞌe tsa kuan xininchisa ña Jesucristu, san duꞌua ni ñadeꞌe ti xininchisa guaꞌani na kinimani ñaꞌan Ndios xan sa saꞌa xee ña. Kuan tu ñaꞌan san ndidaa d̶aꞌa ña ma na kinimani ñaꞌan Ndios jnu, doko vita kuu nu ñayii xuun ia. 15 Doko tu tsayee adi ñadeꞌe ti xininchisa ñaꞌan xi Jesucristu intsee ni sa nchu dandoo taꞌan, san na dandoo taꞌan kadi tsa. Kuan tsa xininchisa kuan, ña ña xininchisa kuan ti nandeꞌe sa kuinokuachi ña xi tsa ti xininchisa, kuan Ndios kána ñaꞌan ia sa kadivini nakoo ndo. 16 Kuan, namodo xini dini ñadeꞌe tu sa saꞌa ni nakada sa na nanitaꞌvi xee ni, ña dini tsayee namodo xini ni tu sa saꞌa meni nakada sa na nanitaꞌvi d̶eꞌe ni.
17 Doko toꞌon yaꞌa taꞌvichion da xi ndidaa x-congregacion Ndios, ndiden ndiden ni nakoo ñayii xiꞌin na kada ñayii kuenta sadaa Ndios xi ñayii. 18 Kána ñaꞌan xi en ñayii io circuncidadu ña? San ma chiguaꞌa tsa sa io circuncidadu tsa. Kana ñaꞌan xi en tsa ti io circuncidadu ña? Ma kada circuncidarc tsa. 19 Kuan guaꞌa ni kuu tu nakoo circuncidadu ñayii adi ñaꞌan doko sa nchoxi Ndios kuu sa na kininchisa ndo sa táꞌvichiion ia. 20 Ndiden ndiden na koo ñayii modo io ñayii kii xíninchisa ñaꞌan ñayii xi Jesucristu. 21 Kuan tu kuu ni esclavu kii kana ñaꞌan Ndios jni, ma ndiꞌi xanaa ni; doko tu guaꞌa ni na niꞌi ni sa na dayaa ñaꞌan jni san nduku-ini ni. 22 Kuan tu andu kuu esclavu, san xininchisa ñaꞌan xi Jesucristu, san ñayii yaꞌa ti kuu ka esclavu xi kuachi, kuan Jesucristu dayaa ñaꞌan s-tsa, san vita Jesucristu kuu s-toꞌo tsa, doko ñayii ti kuu esclavu kuenta kána ñaꞌan Jesucristu xi, nduu tsa esclavu xi Jesucristu. 23 Kuan kuaꞌa ntseꞌe ku keyaꞌvi sa saꞌa ni, juandiku ti guaꞌa sa kada ni sa nchoxi ñayii san daxio ni sa nchoxi Ndios. 24 Xanii, ndiden ndiden kendoo ni kuenta kána ñaꞌan Ndios jni.
25 Doko ndidaa nu ndee vita tandaꞌa ka, atuu sa taꞌvichiion Ndios sa kuj nu ndidaa nu, doko dan sani-ini da kuenta en tsa níꞌi sa kunda-ini Ndios. 26 Sa saꞌa ndidaa sa vixi io vita, san tuj d̶a sa guaꞌa ka tu ndidaa nu kuachi ya ma koo d̶eꞌe nu adi xee nu. 27 San tu io d̶eꞌe yo, ma d̶ando ñaꞌan yo jnu. San tu ti io d̶eꞌe yo, sa ma nduku yo nu. 28 Doko tu nakoo d̶eꞌe yo san ti kida yo kuachi; san tu nu ndee nakoo xee nu san ti kida nu kuachi tuku; doko dini kuu san taꞌan nu ndidaa nu san juandiku kaꞌan da jnu ndidaa nu.
29 Xanii, sa nchukachi da ku jaꞌa: Ti io ntseꞌe ka tiempu. Juandiku tsa io d̶eꞌe xi, na kada tsa kuenta sa ti io d̶eꞌe tsa; 30 San ndidaa ñayii ndaꞌyu na kada ñayii kuenta sa ti ndaꞌyu ñayii; san ñayii ku-iꞌni ya, na kada ñayii kuenta sa ti kuiꞌni ñayii; san ndidaa ñayii seen, na kada ñayii kuenta sa nisadana ti io xi ñayii; 31 San ndidaa ñayii io ntseꞌe xi ñuyii yaꞌa, ma koꞌon xanaa xi sa io xi, kuan ndidaa sa io ñuyii yaꞌa ndeꞌe.
32 Dan vi xanii, nchoj d̶a sa ma en ni ndiꞌi xanaa xi. Nu kuachi ti io d̶eꞌe xi ndiꞌi xanaa nu x-chiion Ndios xiꞌin sa kada nu sa nataꞌan xanaa ia. 33 Doko tsa io d̶eꞌe xi, yeꞌe d̶iki tsa sa io ñuyii yaꞌa, xiꞌin sa kada tsa sa nataꞌan xanaa d̶eꞌe tsa, 34 San nu ndee yeꞌe d̶iki nu x-chiion Ndios, xiꞌin sa koo ndoo nu tantu kuenta x-espíritu nu san xiꞌin xikikoño nu jnu Ndios. Doko ñadeꞌe io xee xi ndiꞌi xanaa ña sa io ñuyii yaꞌa xiꞌin sa kada ña sa nataꞌan xanaa xee ña.
35 Kaꞌan da ndidaa toꞌon yaꞌa jni adii sa nchu dadana ñaꞌan da jni, maska sa sa guaꞌa kuu xi mee ni, ndasa na kada ni sa ndaa xiꞌin sa guaꞌa san duꞌua nee jnu ni na tuꞌua ni sa io Ndios.
36 San tu dakaa tata sani-ini sa sakanuu niꞌi kuan d̶aꞌa ndee tsa xisa nu san vita tandaꞌa ka nu san nakada tsa nasa kuu sa sani-ini tsa, kuan adi kuachi kuu sa na tandaꞌa nu. 37 Doko tu dakaa tata sani-ini sa ma da tandaꞌa tsa d̶aꞌa deꞌe tsa, san nchoj s-tsa sa duꞌua ni na koo ndee nu, san kida tsa sa guaꞌa tuku. 38 San duꞌua tata da tandaꞌa d̶aꞌa xi kida tsa sa guaꞌa, san tata ti da tandaꞌa d̶aꞌa xi kida tsa sa guaꞌa ka.
39 Ñadeꞌe kuu ña eni yikikoño xiꞌin xee ña neni io tsa ñuyii. Doko tu xee ña kuan xíꞌi tsa, san ñadeꞌe yaꞌa guaꞌa ni tandaꞌa ña xiꞌin andu nchoj xan, doko nandeꞌe sa ku kuu en tsa xininchisa ñaꞌan xi Jesucristu. 40 Doko sani-ini da, guaꞌa ka koo ña ñuyii tu ma na tandaꞌa ka ña, san tuj d̶a sa io x-espíritu Ndios kuan d̶a tuku.