Na kuu ndaa ndidaa sa naa ndo ndidaa mee ndo
6
Kukaꞌan ku kaꞌan jnu ni san makada ora naa ni xiꞌin dakaa xani ni kiꞌin ni ku kani kuachi ni jnu ndidaa kustixa ñuyii yaꞌa, san kada ti saꞌan ni jnu ndidaa tsa ndanda ii Ndios. 2 Ña ama ti xini ni ndidaa ni sa ndidaa tsa xininchisa ñaꞌan xi Ndios ndakakuachi xi ñuyii ya ña? San tu dini ndidaa ni ndakakuachi xi ñuyii ya, naku ti kachi kada ndaa ni sa viꞌi ndaa ya tuda? 3 Ña ti xini ni sa ntsoo ndidaa ndo ndakakuachi ndo xi ndidaa ángel ti xinokuachi xi Ndios kuan ña? vika tuku ndidaa sa io ñuyii ma kachi kada ndaa ndo. 4 Naku nchoj ni sa ndidaa tsa vita niꞌi ntsee ka xiꞌin s-toꞌo Ndios na kada ndaa sa naa ni ndidaa ni? 5 Kachi da jaꞌa kuan na kukaꞌan jnu ni: Ama ti io kuani en ñayii kutuni xi sa io ni ndidaa ni xan ña? tsa guaꞌa ni ndada ndaa sa naa ni. 6 Kuan sa naa ni ndidaa ñani mee ni san saꞌan ni sa kani kuachi ni jnu en ñayii ti xininchisa ñaꞌan xi Jesucristu sa na kaꞌntsa dagua tsa.7 San kuiꞌia ntseꞌe kaa sa ndidaa ñani mee ni naa, guaꞌa ka kadivii ni koo ni san kodaa ni nasa kuu mee sa kida ñayii jni. 8 Doko dini ndidaa ni kada kuiꞌia ka kuu ni kuan kada ndidaa ñani mee ni duꞌu niꞌni taꞌan xiꞌin kaꞌan kuiꞌia taꞌan ni.
9 Ama ti xini ni sa ndidaa ñayii ti kida sa ndaa ma yii tsa sa tastuni Ndios ña? Ma dandaa ni mee ni ndidaa ni: kuan nisa ñayii sa koo xiꞌin ñayii ti tandaꞌa xiꞌin, nisa ñayii chiñuꞌu ndidaa idolo, nisa ñayii sa koo xiꞌin ñayii ti kuu xee xi adi d̶eꞌe xi, nisa ñayii ndudeꞌe, nisa tsayee sakoo xiꞌin enka tsa tsayee san nisa ñadeꞌe sa koo xiꞌin enka ñadeꞌe, 10 nisa ñaduꞌu, nisa ñayii nchoj ntseꞌe tuini xiꞌin sa koo sa koo xi ñuyii yaꞌa, nisa ñayii naxini, nisa ñayii kaꞌan kuiꞌia xi enka ñayii, nisa ñayii duꞌu niꞌni ñaꞌan, ma yii sa tastuni Ndios. 11 San dagua ni duꞌua xukoo diꞌna, doko vita san Ndios sa ío ia sakaꞌnu-ini sa saꞌa x-kuachi ni, san ndáda ndoo ñaꞌan ia jni, xiꞌin ndáda ii ñaꞌan ia jni, sa saꞌa sa tastuni Jesucristu xiꞌin x-espíritu ku Ndios ndo.
Nakada ndo sa nataꞌan xanaa Ndios
12 “Guaꞌani kada da sa nchoj d̶a,” doko adi ndidaa nandeꞌe, “Guaꞌa ni kada da sa nchoj d̶a” doko ma kachi da sa tastuni ñaꞌan ndidaa jaꞌa d̶a.a 13 “Sa saj ndo kuu xi ku xiti ndo, san ku xiti ndo kuu sa kee sa saj ndo.” Doko en kii Ndios dandeꞌe ia nduu jaꞌa. San ku kikikoño ndo ya ti io ku ndo, ndasa na koo duꞌua ni ndo xiꞌin ñayii ti tandaꞌa xiꞌin ndo, kuan sa kuxi ku Toꞌo ndo kuu, san yeꞌe ndaꞌa ia. 14 San duꞌua kuenta kída Ndios sa nandoto Jesucristu, duꞌua kada ia sa nandoto ndo tuku, kuan tastuni ia sa kada ia.
15 Ña ama ti xini ni ndidaa ni sa xikikoño ni kuu xikikoño Jesucristu ña. Kuan ma kachi dita da xikikoño Jesucristu san kakintsaa taꞌan da xiꞌin xikikoño en ña diko mee. 16 Ña ama ti xini ni sa ñayii io xiꞌin en ña diko mee kuu tsa eni yikikoño nduu tsa. Kuan kachi: Nduu nu ku kuu endini yikikoño.b 17 Kuan ñayii nakininchisa ñaꞌan xi Jesucristu nduu endini ka xiꞌin ia sa saꞌa x-espíritu ia.
18 Ma koo ni xiꞌin ñayii ti tandaꞌa xiꞌin ni, kuan ñayii sakoo xiꞌin ñayii ti tandaꞌa xiꞌin, ñayii yaꞌa kida kuachi xi xikikoño mee ñayii, doko dakaa enka kuachi kida ñayii, san adii xi xikikoño ñayii kida ñayii. 19 Ña ama ti xini ni sa xikikoño ni kuu s-templu Espíritu Santu, sa io jni ña?, sa taxi Ndios jni,c kuan adi ka xikikoño mee ni kuu, kuan xaꞌan Ndios kuu. 20 Kuan kuenta na niꞌi ñaꞌan Ndios jni, seen ñaꞌan ia, san kuaꞌa ntseꞌe nakoꞌon ni xi ia, juandiku nchoxi sa kadakaꞌnu ni ia xiꞌin xikikoño ni, xiꞌin x-espíritu ni, sa kuu xaꞌan Ndios.