Sa nakani ndaa ñaꞌan xi ndidaa ñayii nataka
5
Kuvaa sa io ni en ni xiꞌin j-nana ku uu ni na d̶eꞌe ni, sa jukua kuu en sakanuu ntseꞌe, kuan nisa ñayii ti xini ñaꞌan xi Ndios ti duꞌua senchiion.a 2 Nchoxi sa kukaꞌan jnu ni ndidaa ni san na kuiko ni tsa duꞌua senchiion xan sa nataka ni ndidaa ni, kuan kada kida ni kuenta sa ti xini ni. 3 Dan kuani ti io da xan doko kada ni kuenta sa io da kuan x-espíritu da io xiꞌin ni ndidaa ni. San kachi da sa tsa xan sa xídokuachi tsa. 4 Kada ni kuenta sa io da sa io ni ndidaa ni xan san xiꞌin sa nani ku Toꞌo ndo Jesucristu xiꞌin sa tastuni ia, 5 na chiꞌi ndo ndidaa ndo tsayee xan ndaꞌa sakakuiꞌia ndasa nakada ñaꞌan xi xikikoño tsa, san duꞌua na nanitaꞌvi x-espíritu tsa, kii na ndixi ia kuu Jesucristu.6 Ti guaꞌa sa kuemani ni ndidaa sa duꞌua taꞌan ya, nakaꞌan ni sa kachi, taꞌa ni levadura kida sa na nañu ndidaa yusa.b 7 Dita ni levadura io jni ndidaa ni xan ndasa na nduu ni kuenta en yusa saa sa ti yeꞌe levadura sa kuu kuachi; kuan Jesucristu kuu ku Pascua ndo san sa xíꞌi ia sa sa saꞌa ndo ndidaa ndo. 8 Na kada ndo viko Pascua san ma kuenchiion ndo levadura sa nchukachi sa kuu kuachi io ku ndo ndidaa ndo, maska sa na kada ndo xiꞌin ita stila ti yeꞌe levadura, xiꞌin na kada ndo xiꞌin nee ku kuanaa ndo xiꞌin na ndu ndaa ndo.
9 Sa chídotuni da jni ndidaa ni sa ma kotaꞌan ni ndidaa ñayii sa koo xiꞌin ñayii ti tandaꞌa xiꞌin. 10 Adi juan nchu kachi sa oni oni ma kotaꞌan ni ndidaa ñayii yaꞌa ñuyii yaꞌa, kuan tu duꞌua san nandeꞌe san kee ni ñuyii yaꞌa. Kuan ma kada sa ma kotaꞌan ni ñayii nchoj ntseꞌe tuini xiꞌin sa koo sa koo xi ñuyii yaꞌa, nisa ñaduꞌu, nisa ñayii chiñuꞌu idolo. 11 Sa nchukachi da kuu sa ma koo mani ni xiꞌin ndidaa ñayii kachi sa kuu d̶aꞌa Ndios doko kada ñayii kuiꞌia kuu, ñayii sa koo xiꞌin ñayii ti tandaꞌa xiꞌin, ñayii nchoj ntseꞌe tuini xiꞌin sa koo sa koo xi ñuyii yaꞌa, ñayii chiñuꞌu idolo, ñayii kaꞌan kuiꞌia, ñayii naxini, ñaduꞌu, ndidaa ñayii duꞌua senchiion ya nisa ma kukoo ni sa kaj ni xiꞌin. 12 Kuan adi dan kida tocar ñaꞌan xi sa ndakakuachi xi ndidaa ñayii ti xininchisa ñaꞌan xi Ndios, doko dini ndidaa ni kuu sa nandeꞌe sa ndakakuachi ni xi ñayii io x-congregacion Ndios io sa io ni. 13 Kuan mee ni Ndios ndakakuachi xi ndidaa ñayii ti xininchisa ñaꞌan xi ia, san kuiko ni ndidaa ni tsa kuiꞌia xan sa nataka ni ndidaa ni.