Chiion kida ndidaa tsa tsandaꞌa Jesús
4
Nchoxi sa kani-ini ndidaa ñayii, sa dan ndidaa da xinokuachi da xi ia kuu Jesucristu, san táꞌvichiion d̶a sa na kachi toꞌon da ndidaa sa ti en xini xi Ndios. 2 San ndidaa tsa táꞌvichiion xi sa kada en chiion, san nchoxi sa nakada ndaa tsa chiion taꞌvi s-tsa. 3 Kuan dan ti tuni d̶a tu kaꞌan guaꞌa ni ña kaꞌan kuiꞌia ni d̶a, adi dakaa enka ñayii; kuan nisa mee da ma kaꞌan tu sa guaꞌa ña sa kuiꞌia kida da. 4 San kuani ti naꞌa da tu kida da sa kuiꞌia, san adi juan nchu kachi sa io ndoo da. Doko andu kuu sa kaꞌan tu sa guaꞌa ña sa kuiꞌia, kuu Ndios. 5 Juandiku nisa en sa ma ntsaꞌa ni ncha kaa, ntsa na ndixi Jesucristu, kuan ntsa na ndixi ia ketuu ndidaa sa yeguaꞌa xiꞌin ndidaa sa sani-ini ndidaa sa io. San ora yukua kaꞌan guaꞌa ia xi ndiden en.6 Xanii, káꞌan da sa kuu Apolo xiꞌin mee da, san duꞌua kída da kuan xinimani ñaꞌan da jni ndidaa ni, kuan ndasa na kutuꞌua ni sa ma kani-ini ni enka kosa sa ti kuu sa yodotuni s-toꞌon Ndios, san duꞌua ma en ni ku kuu iꞌni sa kutuni ka jni sa kuxi enka ñayii xinokuachi xi Ndios. 7 Ti ntseꞌe ka ni sa kuxi ndidaa ka ñayii, ndidaa sa niꞌi ni adii mee ni ndúku, san tu niꞌi ni, ma ku iꞌni ni sa sa saꞌa mee ni niꞌi ni.
8 San vita ndidaa sa nchoj ni io jni: San sa kuu kuika ni, kuu ni na rey, san sani-ini ni sa ti nandeꞌe ka da ndidaa da jni. Guaꞌa tu rey ku nchisa ni ndidaa ni, san duꞌua ndidaa ndo ku kuu rey. 9 Doko sani-ini da ndidaa da kuenta guaꞌa kuu da apóstol, sa Ndios sani ñaꞌan ia danduu ni ka d̶a ndidaa da. Kuu da naa tsa yeꞌe vekaa sa io sa kaꞌni tsa ndidaa tsa. San dan ni ka ntsaꞌa ñayii, xiꞌin ndidaa ángel kuaan tuku. 10 Ndasa xinimani da Jesucristu ndidaa da, kaꞌan ñayii sa ti tediki da, doko dini ndidaa ni tediki ni sa saꞌa Jesucristu, san dan ndidaa da kuu tsa ti ntsee, san dini ndidaa ni kuu tsa ntsee. San dini ndidaa ni kaꞌan guaꞌa xi, san dan ndidaa da kaꞌan kuiꞌia d̶a. 11 San ntsa vita taꞌan da ndidaa da dóko xiꞌin yichi da ndutsa, nandeꞌe d̶oꞌno da, san takueꞌe da, san ndoꞌo da san nisa ti io ami koo da. 12 San xavi da kidachiion da xiꞌin ndaꞌa da,a san ora kaꞌan kuiꞌia ñayii d̶a ndidaa da, dan kaꞌan guaꞌa da xi ñayii duꞌua kaꞌan; san ora xiko ñaꞌan d̶a, san dan kuyakui da ndidaa da; 13 Ora kaꞌan kuiꞌia ñayii d̶a ndidaa da, san dan ndidaa da kaꞌan da en toꞌon guaꞌa xi ndidaa ñayii duꞌua kaꞌan. Ntsa vita kida ñaꞌan tsa ndidaa tsa na en miꞌin d̶a ndidaa da, kuenta en sa ti nandeꞌe.
14 Ti tsaa da jaꞌa ndasa na kukaꞌan jnu ni ndidaa ni, doko nchu dakuaꞌa ñaꞌan da jni na d̶aꞌa da, kuan xinimani ñaꞌan da jni ndidaa ni. 15 Guaꞌa ni koo uxi mil ñayii dakuaꞌa ñaꞌan jni s-toꞌon Jesucristu, doko ma koo kuaꞌa s-tata ni, kuan dan ni kuu s-tata ni ndidaa ni, kuan kuenta káꞌan da s-toꞌon Jesucristu jni, dini ndidaa ni ndúu ni na d̶aꞌa da. 16 Juandiku kaꞌan da jni ndasa na dandee ñaꞌan ni d̶a.b
17 Juandiku tsandaꞌa da Timoteu, nu kuu na d̶aꞌa da sa saꞌa Jesucristu, nu xinimani ntseꞌe da, nu ti dandoo sa xinokuachi xi Jesucristu. Timoteu ya kada nu sa na nakaꞌan ni na modo ío da xiꞌin Jesucristu, xiꞌin na modo dakuaꞌa ñaꞌan da ndidaa ñuu saꞌan da, xiꞌin modo dukuaꞌa da ndidaa x-congregación Ndios. 18 Doko dagua ni ntseꞌe nchu ku kuu naꞌnu ni san sani-ini ni sa ma kiꞌin ka da ku koto ñaꞌan da jni. 19 Doko tu Ndios na kachi ia san dan kiꞌin ni da ku koto ñaꞌan da jni ndidaa ni, san juan kini da tu nchisa sa ndidaa tsa xan io sa tastuni Ndios kuan s-tsa, ña kaꞌan duꞌua tsa. 20 Kuan ñayii io sa tastuni Ndios kuan xi danaꞌa sa nadama ñayii modo io ñayii san adi kaꞌan duꞌua ñayii. 21 Na modo nchoj ni sa na kiꞌin da ku koto ñaꞌan da jni, nchoj ni sa kiꞌin deen da xiꞌin na nduden da jni, ña nchoj ni sa na kiꞌin yeñuꞌu da?