Ñayii xinokuachi xi Ndios
3
Xanii, ti xu káchi kaꞌan da jni kuenta kaꞌan xi ñayii io x-espíritu Ndios xi, maska sa kuenta ñayii ti kida sa nchoxi x-espíritu Ndios, na en daꞌyiki dika xíninchisa ñaꞌa xi Jesucristu. 2 Dan kaꞌan da meni toꞌon ti vixi kuan ti kachi tediki ni sa vixi ntseꞌe kuenta en daꞌyiki vita kachi ka kaxi. San ntsa vita vita kukuituni ka xanaa ni ndidaa ni; 3 kuan io ni daa ni kuenta io ndidaa ñayii ñuyii yaꞌa, kuan tuku tuku modo sani-ini ni, san naa ni ndidaa mee ni, juan nchu kachi sa io daa ni kuenta ñayii ñuyii yaꞌa, 4 kuan en tsa kaꞌan, dan nchiko da Pablo san enka tsa naxikoneꞌe dan nchiko da Apolo,a jaꞌa nchu kachi sa ni sani-ini ni daa ni kuenta sani-ini ñayii ñuyii yaꞌa.5 Doko dan xiꞌin Apolo kuu ni da en tsa xinokuachi xi Ndios, ndasa na chintsee ñaꞌan da jni ndidaa ni, ndasa na kininchisa ni Jesucristu. Sa ndiden ndiden kída da nduu da sa táꞌvichiion d̶a. 6 Dan ku da na en tsa chóꞌon tata,b san Apolo kuu tsa kóꞌño;c doko Ndios ku ia dakuáꞌnu ñaꞌan xi. 7 Juandiku nisa tsa choꞌon kuu en tsa xaꞌvi xi san nisa tsa koꞌño kuaan; maska sa sa xaꞌvi xi kuu sa kida Ndios ia kida sa saꞌnu. 8 Tsa choꞌon xiꞌin tsa koꞌño eni sa nchiko tsa, doko ndiden ndiden niꞌi tsa xaꞌvi tsa sa saꞌa chiion kída tsa. 9 Kuan dan nduu da kidachiion da xi Ndios, doko dini kuu ni na en xuꞌun Ndios kidachiion da nduu da.
Adi na en veꞌe kídaguaꞌa ia. 10 Dan kuu na en Maestru albañil tsa nchoxi Ndios sa nadama saꞌa veꞌe, san dagua ka ñayii kidaguaꞌa sata xi. Doko ndiden ndiden nchoxi sa ntsaꞌa tsa namodo kidaguaꞌa tsa, 11 kuan nisa en ka ñayii ma kachi nadama sa sadama saꞌa xi, kuan sadama saꞌa xi kuu Jesucristu. 12 San tu andu na kadaguaꞌa jnu xi sa sadama sa kuu Jesucristu, tu andu na kadaguaꞌa xiꞌin oro, plata, yuu vili, yutu, paja adi ñama, 13 doko jaꞌa guaꞌa ntseꞌe ketuu kii juiciu. Kuan kii yukua kixi ñuꞌu san ñuꞌu kuan kototuni ñaꞌan xi ndidaa chiion kída ya 14 San tu andu na kadaguaꞌa en sa ma kayu, ñayii yukua niꞌi en sa niꞌi kuañaꞌan Ndios. 15 San tu sa kída ñayii yukua na kayu san x-chiion ñayii yukua kuita, san ñayii yukua kexío tsa kuenta kida en ñayii kexio xiti ñuꞌu kanandaꞌa ntseꞌe.
16 Ama ti xini ni sa kuu ni s-templu Ndios san x-espíritu Ndios io jni ndidaa ni ña?d 17 San tu andu na datani xeꞌe Ndios, san Ndios datani ñaꞌan ia xi ñayii duꞌua na kada; kuan ii s-templu Ndios, san templu yukua kuu dini ndidaa ni.
18 Tediki ni jaꞌa. Tu andu sani-ini sa kutuni ntseꞌe xi ñuyii yaꞌa, nandeꞌe sa na kininchisa sa ti xini nisa dana, ndasa Ndios na kuañaꞌan ia sa na kutuni nchisa xi. 19 Kuan sa kuxi Ndios ndidaa sa kutuni xi io ñuyii yaꞌa kuu sa ndukueꞌe. Kuan duꞌua yodotuni s-toꞌon ia: “Ndios kída ia sa na kukodama ndidaa tsa kutuni xi xiꞌin ndidaa sa kaꞌan tsa.”e 20 San kachi tuku: “Ndios xini ia ndidaa sa sani-ini ndidaa tsa kutuni xi san xini ia sa ndidaa jukua kuu sa ti nandeꞌe.”f 21 Juandiku nisa en ñayii ma ku-iꞌni sa nchiko ñaꞌan xi en ñayii. Kuan ndidaa kuu xaꞌan ni ndidaa ni; 22 tu ku Pablo, adi Apolo, adi Pedru, adi ñuyii, adi sa koo ndo ñuyii, adi sa kuu ndo, adi sa io vita, adi sa koo danduu, ndidaa kuu xaꞌan ni, 23 san dini kuu xaꞌan Jesucristu san Jesucristu kuu xaꞌan Ndios.