Romanos 6

Xiꞌi ndo sa kuxi kuachi doko nchito ndo sa saꞌa Jesucristu

Nasa kada ndo tuda? Na kada ndo kuachi kuan na kaya ka sa xinimani ñaꞌan Ndios ku ndo ña? 2 ¡Ñaꞌan! Kuan ntsoo ndidaa ndo sa xiꞌi ndo xi kuachi, san na modo nandoto nituku ndo sa saꞌa xi? 3 Na kaꞌan ni ndidaa ni sa kuenta guaꞌa sendutsa ndo, sendutsa ndo sa saꞌa Jesucristu san duꞌua xiꞌi ndo xiꞌin ia. 4 Kuan kuenta sendutsa ndo san kuyii nduj ndo xiꞌin Jesucristu sa xiꞌi ia, ndasa duꞌua kuenta Jesucristu nandoto ia sa io ndidaa ndii sa saꞌa sa tastuni Ndios, duꞌua ntsooo ndidaa ndo tuku na ndu saa modo io ndo.

5 San tu xiꞌi ndo xiꞌin Jesucristu, san nandoto ndo duꞌua kuenta nandoto ia. 6 Xini ndo sa kuu ndo ñayii kuachi, doko kuenta xiꞌi Jesucristu san i-nchitakaa ia cruz san neꞌe ia ndidaa ku kuachi ndo kuaꞌan san xíꞌi ndo tuku, ndasa ma kada ka ndo kuachi; 7 Kuan kii xiꞌi ndo san kuachi kuaan ti tastuni ñaꞌan ka ku ndo. 8 Tu sa sendutsa ndo kuu sa xiꞌi ndo xiꞌin Jesucristu, na kininchisa ndo sa kunchito ndo xiꞌin ia. 9 Kuan xini ndo sa Jesucristu nándoto ia sa ma kuu ka ia, kuan sa saꞌni ñaꞌan ti tastuni ñaꞌan ka xi ia. 10 Kuan kuenta xiꞌi Jesucristu san endini viaji xíta kuachi san ti tastuni ñaꞌan ka xi ia, san vita nchito ia sa kadakaꞌnu ia Ndios. 11 San duꞌua ni dini ndidaa ni tuku kada ni kuenta sa xiꞌi ni xi kuachi, doko vita nchito xi Ndios sa saꞌa Jesucristu.

12 Ma kuemani ni sa na tastuni ñaꞌan kuachi kuan jni, san nisa ma chodoꞌo ni sa taꞌvichiion sa na kada ni sa kuiꞌia nchoxi xikikoño ni; 13 dini ndidaa ni sa xíꞌi ni xi kuachi, doko vita nándoto ni, juandiku ma kuemani ni sa kada ni sa kuiꞌia nchoxi xikikoño ni. Guaꞌa ka nachoꞌon ni mee ni ndaꞌa Ndios san kada ni sa nchoxi ia. 14 San duꞌua kuachi kuaan ma tastuni ñaꞌan ka jni ndidaa ni, kuan ti tastuni ñaꞌan ka ley jni, maska sa j-gracia Ndios.

Ñayii xinokuachi xi Ndios

15 Nása tuda?Kada ndo kuachi vita kuan ti tastuni ñaꞌan ka ley ku ndo ña? ña ndasa sa tastuni ñaꞌan j-gracia Ndios juandiku duꞌua kada ndo? Ñaꞌan nisa en modo ti guaꞌa. 16 Ña Ama ti xini ni sa ora kidachiion ni jnu en tsa toꞌo san tastuni ñaꞌan tsa jni ña? san duꞌua ni kuu tuku tu tastuni ñaꞌan kuachi kuaan jni, san kuu ni, doko tu xininchisa ni Ndios Ama ma niꞌi ni sa kaꞌnu-ini sa saꞌa x-kuachi ni ña? 17 Doko kuani xu tastuni ñaꞌan kuachi kuaan jni ndidaa ni. San taxaꞌvi xi Ndios kuan xininchisa ni xiꞌin nee xanaa ni s-toꞌon Ndios sa dákuaꞌa ñaꞌan jni; 18 san vita ti tastuni ñaꞌan ka kuachi kuaan jni, ndasa na kuinokuachi ni xi Ndios sa kada ni sa guaꞌa. 19 (Kaꞌan da jni ndidaa xiꞌin meni toꞌon ti vixi sa kukuituni xanaa ni, kuan xini da sa uꞌu sakuituni xanaa ni ndidaa jaꞌa) duꞌua kuenta xu tastuni ñaꞌan kuachi sa kada ni jaꞌa jukua ndidaa en sa kuiꞌia sa duꞌua, duꞌua ni kuemani ni sa na tastuni ñaꞌan Ndios jni sa kada ni sa guaꞌa sa diko, san duꞌua na koo ni modo taꞌan xanaa ia.

20 Kuenta kúu ni ñayii xinokuachi xi kuachi, ti xu koo ni kuenta na taꞌan xanaa Ndios. 21 San nasa níꞌi ni xiꞌin ndidaa jukua, sa niꞌi ni kuu sakanu xiꞌin sa sakuntsaka ñaꞌan sa ndeꞌe jni. 22 Doko vita san ti tastuni ñaꞌan ka kuachi kuan jni, kuan vita xinokuachi ni xi Ndios. San jaꞌa kuu sa guaꞌa, kuan tu nakoo ni kuenta kachi Ndios san jukua kada sa niꞌi ni ñuyii ma ndeꞌe. 23 Kuan xaꞌvi kuachi kuu sa xiꞌi ñayii. Doko sa taj daa Ndios kuu ñuyii ma ndeꞌe sa saꞌa Jesucristu ia kuu ku Toꞌo ndo.