Ti en ka xidokuachi jnu Ndios tu xininchisa ndo
5
Sa xininchisa ndo kida sa Ndios na kinimani ñaꞌan ia kuenta ñayii atuu x-kuachi xi, san taxi ia sa na kookadi ndo sa saꞌa ku Toꞌo ndo Jesucristu, 2 kuan sa saꞌa Jesucristu niꞌi ndo sa taxi Ndios sa saꞌa sa xininchisa ndo, san ma na yuꞌu ndo, san ku-iꞌni ndo sa ñoꞌon ku kuanaa ndo sa koo ndo sa io Ndios xiꞌin sa sandutsa ia. 3 Adii ni sa koo ndo sa io ia ku-iꞌni ndo, na ku-iꞌni ndo ora taꞌan ntseꞌe ndo tuku, kuan sa taꞌan ndo kida sa ndukuntsee ndo, 4 san sa kuyakui ndo kida sa xiniguaꞌa ñaꞌan Ndios ku ndo, san kutuꞌua ndo sa sakuntsatu ndo; 5 san sa sakuntsatu ndo ma taxi sakanuu ku ndo, kuan Ndios táxi ia Espíritu Santu ndasa na kadakaꞌnu ku kuanaa ndo.6 Kuan ti xu kada sa nanitaꞌvi ndo jnu Ndios kuan mee ni ñayii kuiꞌia kuu ndo, juandiku Jesucristu xíꞌi ia kii kachi Ndios sa kuu ia. 7 Kuan vixi io sa kuu en ñayii sa saꞌa enka ñayii. Nisa sa saꞌa en ñayii guaꞌa ntseꞌe; ña gua io en ñayii kachi sa kuu sa saꞌa en ñayii guaꞌa ntseꞌe nchisa. 8 Doko Ndios dadana ñaꞌan ia sa xinimani ñaꞌan nchisa ia ku ndo, san kuani kúu ndo ñayii kuachi, san Jesucristu xíꞌi ia sa saꞌa ndo. 9 San ndadandoo ñaꞌan ia ku ndo sa saꞌa j-niñi Jesucristu, san sa saꞌa Jesucristu ma taꞌan ndo ndidaa sa kuiꞌia nandeꞌe sa taꞌan ndo, kii na dandeꞌe Ndios ñuyii. 10 Kuenta kúu ndo ñayii ti io mani xiꞌin Ndios, mee ia kída sa na ndumani ndo xiꞌin ia sa saꞌa sa xiꞌi D̶aꞌa ia Jesucristu san sa saꞌa Jesucristu nánitaꞌvi ndo kuan na kinimani ñaꞌan Ndios ku ndo. 11 San duꞌua, vita ku-iꞌni ndo sa saꞌa sa kída Ndios, kuan vita io mani ndo xiꞌin ia sa saꞌa ku Toꞌo ndo Jesucristu, kuan Jesucristu kída sa nduu mani ndo xiꞌin Ndios.
Andu kuu Adán san andu kuu Cristu
12 San duꞌua, sa saꞌa en tsie kuyii kuachi ñuyii ya, san kuachi ya neꞌe sa xiꞌi ñayii,a san ndidaa ndo io sa kuu kuan ndidaa ñayii kida kuachi. 13 Antika sa koo jley Ndios san sa io kuachi, doko guaꞌa ni sa vita koo ka ley kuaan san juandiku ndidaa ñayii ti xu ndakakuachi xi kuenta yodotuni ley sa kada. Antika sa koo ley san ndidaa ñayii xu kada kuachi; doko tu ti en xini ley, san ti en xidokuachi. 14 Doko ndidaa ñayii ío ntsa kuenta ío Adán xiꞌin ntsa kuenta ío Moisés, xu tastuni ñaꞌan sa xiꞌi xi ndidaa ñayii xu kada kuachi, san kuani ti kuu kuenta kuachi kída Adán, tsa kuu x-kondati en tsa guaꞌa kixi.
15 Doko kuachi kída Adán ti nduu taꞌan xiꞌin sa guaꞌa taxi Ndios, kuan kuachi kída endini tsie, kída sa kuaꞌa ntseꞌe ñayii xíꞌi, doko sa guaꞌa taj daa Ndios sa saꞌa endini tsie, ia kuu Jesucristu, kuu kuaꞌa ntseꞌe sa guaꞌa sa kuxi kuaꞌa ntseꞌe ñayii. 16 Juandiku kuachi kída Adán ti nduu taꞌan xiꞌin sa kaꞌnu-ini taxi Ndios. Sa saꞌa x-kuachi en ñayii kíxi sa diko-ini ñaꞌan Ndios, doko sa saꞌa Jesucristu, ndidaa ñayii guaꞌa ni ndumani xiꞌin Ndios kuani io ntseꞌe x-kuachi ñayii. 17 Kuan tu sa saꞌa x-kuachi Adán kída sa tástuni ñaꞌan sa xiꞌi xi ñayii, san vita sa saꞌa Jesucristu niꞌi ndo ndidaa ndo ñuyii saa koo ndo, kuan Ndios xinimani ñaꞌan ia ku ndo san xiniguaꞌa ñaꞌan ia, san ti xika ia sa chaꞌvi ndo.
18 San duꞌua, sa saꞌa x-kuachi Adán, ndidaa ndituꞌu ndo xídokuachi; doko sa saꞌa Jesucristu Ndios kachi ia sa io ñuyii ma ndeꞌe ku ndo. 19 Kuan eni tsie kída sa kuyii kuachi ñuyii ya, san ndidaa ñayii xidokuachi, doko sa guaꞌa kída Jesucristu kida sa kuaꞌa ntseꞌe ñayii io sakaꞌnu-ini xi.
20 San Ndios táxi ia ley, kuan ndasa na kuaꞌa ñayii kuenta, na tantu kuachi kida ñayii. San duꞌua ora káya ntseꞌe kuachi, káya ntseꞌe ka j-gracia Ndios kuan. 21 San duꞌua tu kuachi kuaan neꞌe sa tastuni sa xiꞌi ñayii, san duꞌua j-gracia Ndios kuan tastuni sa ma koo x-kuachi ñayii xiꞌin taxi ia ñuyii ma ndeꞌe sa saꞌa Jesucristu ia kuu ku Toꞌo ndo.