Natavi Pablo mee tsa jnu Felix
24
San yaꞌia oꞌon kii dana saꞌan tsa nani Ananías tsa kuu dutu kunaꞌnu xiꞌin uu tsa nisaꞌnu xiꞌin en tsa nani Tértulo tsa kuu tsa ndakaniꞌno ñaꞌan. Tsa yaꞌa saa tsa ndidaa tsa san da kuidokuachi tsa Pablo ya. 2 Kuenta kana ñaꞌan xi Pablo, Tértulo kesaꞌa tsa dakuidokuachi ñaꞌan tsa san kachi tsa:—Taxaꞌvi ñaꞌan jni ta gobernador kuan kadi vini ka io xuun da sa saꞌa ndidaa sa ndada ndaa ni, 3 ta Félix ntseꞌe guaꞌa ñayii kuu ni, ndidaa ndituꞌu tiempu xiniguaꞌa sa kida ni, nasa kuu mee. 4 Doko ndasa ma ndeꞌe kuaꞌa kaꞌan ndo jaꞌa, xika da jni sa na kunini ñaꞌan ni d̶a en ratu yiki. 5 Tsayee yaꞌa kuu tsa kuenta en kueꞌe kuan ndidaa xichi ndinoo tsa chiyutu tsa ñayii kuu ñuu Israel, san kuu tsa en tsa kuu jnu xi secta nani nazarenu. 6 Nchu kada kuiꞌia tsa templu, juandiku teen ñaꞌan da ndidaa da s-tsa. San nchu dakuidokuachi ñaꞌan da kuenta yodotuni j-ley da. 7 Doko saꞌntsa dagua juerza comandante Lisias san nakuakantsaa ñaꞌan tsa, 8 san taꞌvichiion tsa xi ndidaa tsa da kuidokuachi ñaꞌan sa nakij s-tsa ntsaa sa io ni ya. San tu na ndukutoꞌon ni san kini ni sa sa kaꞌan da kuu sa ndaa.
9 San ndidaa judiu io jukua kaꞌan tsa san kachi tsa sa sa ndaa ku ndidaa sa kachi tsa yaꞌa. 10 San kída procurador kuan en seña sa na kaꞌan Pablo, danduu Pablo sadaa tsa:
—Xini da sa sa naꞌa ntseꞌe kuu ni tsa saꞌntsa kuachi ñuu yaꞌa, juandiku ku-iꞌni da sa kaꞌan da sa tavi da mee da. 11 Tu na ndukutoꞌon ni xi ñayii sa kini ni sa sa ndaa kuu, yaꞌia kuenta uxi-uu kii saꞌan da Jerusalén sa kakataꞌvi da. 12 San tsa dakuidokuachi ñaꞌan d̶a ti naniꞌi ñaꞌan tsa d̶a xiti templu natoꞌon da xiꞌin ñayii, san nisa ti chiyutu da ñayii san nisa veꞌe sinagoga san nisa enka ñuu. 13 Tértulo xan xiꞌin ndidaa tsa xan ti io testigu s-tsa xi ndidaa sa dakuidokuachi ñaꞌan tsa d̶a. 14 Doko vita san nchukachi toꞌon da jni: Sa xinokuachi da xi j-Ndios s-tadeꞌe da sa kuu Ichi danani tsa ndidaa tsa secta, xiꞌin xininchisa da ndidaa sa taꞌvichiion ley xiꞌin sa chidotuni ndidaa x-profeta Ndios. 15 San sani-ini da sa sani-ini tsa tuku sa Ndios ndaneꞌe ia tsa guaꞌa xiꞌin tsa kuiꞌia. 16 Juandiku dan ndukuntsee da sa ndikii nakoo ndoo xanaa da jnu Ndios xiꞌin jnu ñayii.
17 Kuaꞌa ntseꞌe kuia ndínoo xika da, doko naxikokagua da xuun da sa kuañaꞌan da en tuini xi ndidaa ñayii kundaꞌvi, xiꞌin sa doko da en sa doko da xi Ndios. 18 San neni kida da jaꞌa san uu ñayii kuu ñuu Israel io Asia naniꞌi ñaꞌan tsa templu san ndadandoo da mee da ama jaꞌa kuu sa chiyutu da ñayii? 19 Tsa yukua nandeꞌe sa kixi jaꞌa san na dakuidokuachi ñaꞌan tsa d̶a, tu nasa kuu sa náa da xiꞌin tsa. 20 Ña na kachi toꞌon tsa, na kuachi nániꞌin tsa d̶a kuenta ío da jnu junta kída ndidaa tonisaꞌnu, 21 sa kída da kuu sa kuenta ín da jnu tsa, kána da san sadaa da: “Sa dakuidokuachi ñaꞌan ni ku sa xininchisa da sa nandoto ndii.”a
22 Doko Felix xini ntseꞌe tsa ndidaa sa kaꞌan sa kuu ichi saa yaꞌa, san datuꞌu duꞌua ni tsa junta san kachi tsa:
—Ntsaa na kixi comandante Lisias, dana kuu sa kutuni-ini.
23 Danduu táꞌvichiion tsa xi centurión sa na kuntsaa tsa Pablo doko na kuañaꞌan tsa modo sa ndinoo tsa ndidaa ndikeꞌe xiꞌin na kuemani tsa sa nakiꞌin ñayii ku koto ñaꞌan xi Pablo ya.
24 Yaꞌia uu kii, sáꞌan Félix xiꞌin d̶eꞌe tsa Drusila, ña yaꞌa kuu ña ñuu Israel. San taꞌvichiion tsa sa na ku kuaka ñaꞌan xi Pablo, san inini ñaꞌan tsa nasa kuu sa xininchisa ñaꞌan xi Jesús. 25 Doko kuenta Pablo káꞌan tsa sa nandeꞌe sa koo tsa en vida ndaa xiꞌin sa na tastuni tsa mee tsa xiꞌin sa io en juiciu kixi san tsa yaꞌa yuꞌu ntseꞌe tsa san sadaa tsa:
—Kunuꞌu san ora na ku kama ntsu kana ñaꞌan ntsu.