Saꞌan Pablo jnu Festo
25
San kuenta kuu uni kii kukoo Festo ya chiion san kée tsa Cesarea, san kuaꞌan tsa Jerusalén. 2 Danduu ndidaa dutu ku jnuu xi xiꞌin ndidaa judiu kunaꞌnu saꞌan tsa sa nandaka tsa Pablo san sakondaꞌvi tsa xi Festo, 3 sa na danuꞌu tsa Pablo Jerusalén. Kuan ndatoꞌon tsa ndidaa tsa sa kaꞌni ñaꞌan tsa ichi na nuꞌu. 4 Doko Festo sadaa tsa sa Pablo yeꞌe tsa vekaa Cesarea, san sani ini tsa sa sa io sa nuꞌu tsa. 5 Duꞌua sadaa tsa:—Na kiꞌin uu nu io xo xan san juan na kachi toꞌon nu tu io en sa kuiꞌia kída nuyaꞌa.
6 San saꞌan tsa una uxi kii, san naxikokagua tsa Cesarea; san nduu enka kii sakuntsaku tsa sa tastuni tsa san táꞌvichiion tsa sa na ku kuaka ñaꞌan xi Pablo. 7 San kuenta saa Pablo, chikorra ñaꞌan ndidaa judiu kée Jerusalén, san kuaꞌa ntseꞌe sa dakuidokuachi ñaꞌan tsa xi Pablo, doko ti io nisa en testigu na kaꞌan ndaa; 8 Pablo kachi tsa:
—Ti xídondagua da j-ley ndidaa ñayii ñuu Israel, nisa ley io templu, san nisa en toꞌon ti dayaꞌia da jnu César.
9 Doko Festo nchu kendoo guaꞌa tsa xiꞌin ndidaa judiu san sadaa tsa xi Pablo:
—Nchu kiꞌin yo Jerusalén san juan na danaꞌma ñaꞌan xo ña?
10 Pablo sadaa tsa:
—Jnu s-tribunal César io da, san jaꞌa nandeꞌe sa kuin da sa danaꞌma ñaꞌan d̶a. Ti kída da nisa en sa kuiꞌia xi ndidaa ñayii Israel san dini xiniguaꞌa ni. 11 Tu kída da en kuachi sa nandeꞌe sa na kuu da, náku yuꞌu da sa kuu da; doko tu adi sa ndaa kuu sa dakuidokuachi ñaꞌan ndidaa tsa yaꞌa d̶a, náku na nachiꞌi ñaꞌan d̶a ndaꞌa tsa ndidaa tsa ndasa na kendoo guaꞌa xiꞌin tsa. Dan nchoj da sa Cesar na danaꞌma ñaꞌan d̶a.
12 San ndatoꞌon Festo xiꞌin ndidaa s-tonisaꞌnu tsa san sadaa tsa xi Pablo:
—Jnu César nchu kiꞌin yo. Kiꞌin yo sa io César tuda.
Pablo in tsa jnu rey Agripa
13 Yaꞌia uu kii san rey Agripa xiꞌin Berenice saa tsa Cesarea ki koto tsa Festo. 14 San keꞌen kii ío tsa san Festo nakani tsa sa táꞌan Pablo, san sadaa tsa:
—Io en tsayee yeꞌe daa vekaa ntsa kuenta io Félix, 15 kuenta saꞌan da Jerusalén saꞌan ndidaa dutu kunaꞌnu xiꞌin ndidaa tsa kunaꞌnu ñuu Israel, san táꞌvichiion tsa sa na kaꞌni ñaꞌan da s-tsa yaꞌa. 16 Sadaa da s-tsa san ndidaa romanu ya ti duꞌua senchiion tsa, sa dakuidokuachi tsa ñayii maska sa semani tsa sa na tavi tsa yaꞌa mee tsa xiꞌin na kini tsa ñayii dakuidokuachi ñaꞌan s-tsa antika sa chintsadi ñaꞌan s-tsa. 17 Juandiku ti kukue tsa sa kij s-tsa ndidaa tsa jaꞌa, san nduu enka kii sakuntsaku da sa kunini da, san táꞌvichiion da san na ku kuaka ñaꞌan s-tsa yaꞌa. 18 Doko kuenta saa ndidaa tsa dakuidokuachi ñaꞌan s-tsa, sani-ini da sa en sa ii ntseꞌe xidokuachi tsa san kada ñaꞌan, 19 sa xidokuachi tsa kuu sa saꞌa sa xininchisa tsa xiꞌin en tsa nani Jesús, en tsa sa xiꞌi, san Pablo ya kachi tsa sa nchito tsa yaꞌa. 20 Ti xini da na modo kini da ndidaa sa ndaa, juandiku ndukutoꞌon da tu nchu kiꞌin tsa Jerusalén san juan na danaꞌma ñaꞌan s-tsa ndidaa jaꞌa. 21 Doko Pablo xíka tsa sa na ndada ndaa Cesar juandiku taꞌvichiion da sa na kentsadi tsa ntsa na kuu tsandaꞌa da tsa.
22 Danduu Agripa sadaa tsa xi Festo:
—Dan nchu kunini ñaꞌan da s-tsa yaꞌa.
San sadaa Festo ya:
—Yutsa kunini ñaꞌan ni.
23 San nduu enka kii saꞌan Agripa xiꞌin Berenice san guaꞌa ntseꞌe ndukutu tsa, san kukadi kuu vii ñayii kuenta kuyii tsa veꞌe xiꞌin ndidaa comandante xiꞌin ndidaa tsa kunaꞌnu ñuu, san danduu táꞌvichiion Festo sa na ku kuaka ñaꞌan xi Pablo. 24 Danduu Festo sadaa tsa:
—Rey Agripa, xiꞌin ndidaa ñayii xuku jaꞌa: Tsayee yaꞌa kuu Pablo, ndidaa ñayii kuu ñuu Israel dakuidokuachi ñaꞌan s-tsa tantu ñuu Jerusalén san duꞌua ni ñuu yaꞌa, xika tsa ndidaa tsa sa ma kunchito ka tsa yaꞌa. 25 Doko ti na niꞌi da nisa en kuachi sa nandeꞌe sa kuu tsa, san mee tsa kachi sa nchu kaꞌan tsa xiꞌin Augusto, juandiku saa xanaa da sa tsandaꞌa ñaꞌan da s-tsa Roma. 26 Doko na modo tsandaꞌa da tsa yaꞌa san atuu dana sa chidotuni da en tutu sa kachi nasa xidokuachi tsa. Juandiku ntsaka da tsa jnu ni ndidaa ni san sakundaꞌvi da jni rey Agripa, sa na danaꞌma ñaꞌan ni san duꞌua na niꞌi kuu chidotuni da en tutu nasa xidokuachi tsa. 27 Kuan tuj da sa kuiꞌia kuaꞌan sa tsandaꞌa da en tsa yeꞌe vekaa san ma kaꞌan da nasa xidokuachi tsa.