23
Danduu Pablo ntsaꞌa ñaꞌan guaꞌa tsa xi ndidaa tsa nataka jukua san sadaa tsa:—Xanii, dan ntsa kii vita io ndaa da jnu Ndios.
2 San dutu kunaꞌnu nani Ananías taꞌvichiion tsa xi tsa in yachi jnu Pablo ya sa na kuaꞌa tsa en xuꞌu Pablo ya. 3 Danduu Pablo sadaa tsa:
—¡Ndios duꞌua kaniaꞌa ia jni ñayii uu jnu xi! kuan dini intsaku ni sa dakuidokuachi ñaꞌan ni kuenta kachi j-ley ni; san xido ndagua ni j-ley Ndios sa táꞌvichiion ni sa na kaniaꞌa tsa yaꞌa d̶a?
4 Ndidaa tsa xuku jukua sadaa tsa:
—Naku kaꞌan kuiꞌia yo xi dutu kunaꞌnu Ndios?
5 Pablo sadaa tsa:
—Xanii, ti xini da tu dutu kunaꞌnu kuu tsa yaꞌa, ti io nda sa duꞌua káꞌan da s-tsa. Kuan duꞌua yodotuni: “Ma kaꞌan kuiꞌia yo xi tsa tastuni xuun yo.”a
6 Danduu Pablo, xíni tsa sa dagua tsa xuku junta kuu saduceu xiꞌin dagua tsa kuu fariseu, san káꞌan niꞌi tsa san sadaa tsa:
—Xanii, dan kuu da fariseu, d̶aꞌa en fariseu. San xininchisa da sa nandoto ndidaa ndii, juandiku dakuidokuachi ñaꞌan d̶a.
7 San tuꞌu kaꞌan Pablo ya ndidaa jaꞌa, san kesaꞌa ndidaa tsa kuu fariseu ya xiꞌin saduceu ya na toꞌon tsa ndidaa tsa. San taꞌntsadagua ndidaa tsa io junta ya, 8 kuan ndidaa saduceu kachi tsa sa ti nandoto ndii,b nisa ángel ti io san nisa espíritu ti xininchisa tsa ndidaa tsa sa io; doko ndidaa fariseu ya xininchisa tsa sa io ndidaa jaꞌa. 9 Naa toꞌon ntseꞌe tsa ndidaa tsa, san uu tsa dadana ñaꞌan ley tsa io x-partido fariseu ndukuin tsa san kachi tsa:
—Atuu dana sa kuiꞌia kída tsa yaꞌa. Gua en espíritu adi en ángel kaꞌan nchisa s-tsa.
10 San kuenta kesaꞌa tsa yaꞌa ndidaa tsa na toꞌon ntseꞌe ka tsa, comandante yuꞌu tsa sa kaꞌni ñaꞌan ndidaa tsa yaꞌa xi Pablo, juandiku kána tsa soldadu san nakua ñaꞌan tsa Pablo sa na kunantsaka ñaꞌan s-tsa cuartel.
11 San nduu enka niñu Jesús nanuu ia xi Pablo san sadaa ia:
—Kadakaꞌnu xanaa yo Pablo, kuan duꞌua ndaa kaꞌan yo ku toꞌon ntsu Jerusalén ya, duꞌua nandeꞌe sa kaꞌan yo ku toꞌon ntsu Roma kuan tuku.
Ndatoꞌon tsa ndidaa tsa sa kaꞌni tsa Pablo
12 San nduu enka kii, uu ñayii Israel ndatoꞌon tsa sa kaꞌni tsa Pablo san kída tsa en tratu sa ma kaj s-tsa nisa ma koꞌo tsa, ntsa na kaꞌni tsa Pablo. 13 Maska uvidiko tsayee kuu tsa duꞌua kída ya. 14 San tsa yaꞌa saꞌan tsa sa io ndidaa dutu ku jnuu xi xiꞌin sa io tsa nisaꞌnu san sadaa tsa:
—Kida da en tratu sa ma kaj da nisadana xiꞌin ma koꞌo da ntsa na kaꞌni da Pablo. 15 San jaꞌa nchoj da sa na kada ni ndidaa ni, kana nituku ni Pablo kuan ndidaa ni, ndasa na ndukutoꞌon guaꞌa s-tsa nasa kuu sa xidokuachi tsa, san dan ndidaa da koto-ini ñaꞌan da ichi, san kaꞌni da tsa antika sa saa tsa jaꞌa.
16 Doko en d̶aꞌa en x-kuaꞌa Pablo nitoꞌon nu jaꞌa. San saꞌan nu cuartel san sadaa nu xi Pablo. 17 Pablo kana tsa en centurión san sadaa tsa:
—Kuntsaka ni nuyaꞌa jnu comandante, kuan io en sa kadaa nu s-tsa.
18 San tsa yaꞌa ntsaka tsa staꞌan Pablo ya kuaꞌan jnu comandante, san sadaa tsa:
—Tsa yentsadi nani Pablo sakundaꞌvi tsa jnu da sa na kuntsaka da nu kuachi yaꞌa jnu ni, kuan nchukachi toꞌon nu en toꞌon ni.
19 San comandante teen tsa ndaꞌa nu, san kee deen tsa nduu tsa san ndukutoꞌon tsa:
—Ndidaa judiu ndatoꞌon tsa sa kij s-tsa yutsa, san kukondaꞌvi tsa jnu ni ndasa na kuntsaka ni Pablo jnu junta, san nchoj tsa sa na kani-ini ni, sa nchu danaꞌma tsa ndidaa tsa Pablo. 21 Doko ma kininchisa ñaꞌan ni, kuan maska uvidiko tsayee ntsatu sa kaꞌni ñaꞌan s-tsa. San kída tsa tratu sa ma kaj s-tsa ita-stila sa nisa ma koꞌo tsa ntsa na kaꞌni tsa Pablo ya. San ntsatu vii tsa, sa kuemani ni sa nakua ñaꞌan ni Pablo.
22 Danduu comandante danuꞌu tsa nuyee san sadaa tsa jnu: Nisa en ñayii ma nakani yo ndidaa toꞌon yaꞌa xi.
Tsandaꞌa tsa ndidaa tsa Pablo jnu Felix tsa kuu gobernador
23 San comandante kána tsa ubi centurión san sadaa tsa: Nchoj ntsu sa na danuu yo ubi cientu soldadu na kaka kiꞌin, uni diko uxi nu na kuntsaka kiti xiꞌin ubi cientu nu na kuneꞌe lanza, kuan ka éen niñu kiꞌin nu Cesarea. 24 San sadaa tsa sa na danuu en kiti kodo Pablo, san xíka tsa sa nasaa guaꞌa Pablo jnu gobernador Félix. 25 Tsaa tsa en carta sa kachi:
26 “Claudio Lisias, sa kuxi procurador Félix. Kada ntse-ini jni. 27 Ndidaa ñayii Israel nchukaꞌni ñaꞌan tsa s-tsa yaꞌa, san kuenta niꞌi toꞌon da sa tsa yaꞌa kuu tsa Romanu, san dan xiꞌin ndidaa soldadu da ya nakuakantsaa ñaꞌan da s-tsa. 28 Nchukini da nasa dakuidokuachi ñaꞌan s-tsa, san sa ntsaka da tsa jnu x-junta ndidaa tsa yaꞌa. 29 Xíni da sa xidokuachi tsa sa saꞌa j-ley tsa ndidaa tsa, san nisa en kuachi sa kaꞌni ñaꞌan s-tsa adi sa keꞌe tsa vekaa kuu. 30 Doko kuenta nitoꞌon da sa nchukaꞌni ñaꞌan tsa ndidaa tsa, juandiku tsandaꞌa da tsa jnu ni san sadaa da xi ndidaa tsa dakuidokuachi ñaꞌan sa nakiꞌin tsa jnu ni xan san nakaꞌan tsa nasa kuu sa dakuidokuachi ñaꞌan tsa s-tsa yaꞌa.”
31 San ndidaa sa táꞌvichiion xi ndidaa soldadu kída tsa, san niñu yukua ntsaka ñaꞌan tsa kuaꞌan xi Pablo ntsa Antípatris. 32 San nduu enka kii, ndidaa soldadu xika kuaꞌan naxikokagua tsa, san ndidaa nika tsa yodo kiti kuaꞌan xiꞌin Pablo. 33 San saa ndidaa soldadu yodo kiti ñuu Cesarea san nakua ñaꞌan tsa carta xi procurador, san nakua ñaꞌan tsa Pablo tuku. 34 Procurador kaꞌvi tsa carta san ndukutoꞌon tsa ami kuu xuun Pablo ya. Pablo sadaa tsa sa kuu tsa ñuu nani Cilicia, 35 san sadaa Procurador:
—Kunini ñaꞌan ntsu yo ntsa nakixi tsa da kuidokuachi ñaꞌan yo.
San táꞌvichiion tsa sa nakoo Pablo veꞌe kídaguaꞌa Herodes san na kuntsaa ñaꞌan s-tsa.