22
— Xanii, ndidaa dini tsa xuku jaꞌa kunini ni na kaꞌan da sa tavi da mee da.2 Kuenta tsaku s-tsa sa kaꞌan Pablo daꞌan hebreu san kadivini ka kuu tsa ndidaa tsa. Danduu sadaa Pablo:
3 — Dan kuu da tsa Israel, san xuun da kuu Tarso io distritu Cilicia doko saꞌnu da ñuu Jerusalén ya, san Gamaliela kuu tsa dakuaꞌa ñaꞌan d̶a ndidaa ley xu kininchisa ku ta deꞌe ndo, san xu natavi ntseꞌe da j-ley Ndios kuenta kida ni ndidaa ni vita. 4 San dan xu nanduku da ndidaa ñayii xininchisa ñaꞌan xi Jesús san xu chiꞌi da tsa vekaa, tu tsiee adi ñadeꞌe, 5 san tsa xini sa sa ndaa ku jaꞌa kuu dutu kunaꞌnu xiꞌin ndidaa tsa savaꞌa io ñuu yaꞌa, san dini tsa yaꞌa ndidaa tsa táxi tutu sa na kiꞌin ku teen ñaꞌan xi ndidaa tsa io Damasco. San saꞌan da Damasco sa teen da ndidaa tsa xininchisa ñaꞌan xi Jesús io ñuu yukua, san duꞌua na kuntsaka da tsa ndixi ñuu Jerusalén ndasa na danaꞌma ñaꞌan s-tsa san na chintsadi ñaꞌan s-tsa.b
Pablo nakani tsa nasa kida sa na kininchisa tsa Jesús
(Hch 9.1-19; 26.12-18)
6 Doko duꞌua taꞌan da ichi kuaꞌan da Damasco, kuenta dagua kii kuu, san kikii ni kee en sa sandutsa ntseꞌe ntsaa andivi san dayeꞌe jnu da; 7 san ndugua da, san tsaku da en tsa káꞌan san kachi tsa: Saulo, Saulo, Naku xiko ñaꞌan yo kuntsu? 8 San dan sadaa da: Andu kuu ni Toꞌo? sa kachi tsa: Ntsuꞌu kuu Jesús Nazarent, ia xiko yo. 9 Ndidaa tsa kuaꞌan xiꞌin da xíni tsa sa dayeꞌe, doko ti tsaku s-tsa tachi tsa káꞌan d̶a. 10 San dan sadaa da: Nása kada da Toꞌo? San Jesús kachi ia: Ndukuin san kuaꞌan Damasco san juan kachi toꞌon xo nása kada yo, 11 dan kuaa da kída sa dayeꞌe, san yetuu ñaꞌan nika ndidaa tsa kuaꞌan xiꞌin da kuyii da Damasco.
12 San ñuu Damasco io en tsa nani Ananías en tsayee kida sa nchoxi Ndios xiꞌin xu kininchisa tsa ley san ndidaa ñayii kuu ñuu Israel io ñuu yaꞌa kaꞌan guaꞌa s-tsa, 13 saꞌan tsa sa io da sa in tsa jnu da san kachi tsa: “Xanii, Saulo nana tuu jnu ni vita.” San na túu jnu da ora yukua san xíni ñaꞌan da s-tsa. 14 San kachi tsa d̶a: “J-Ndios ku tadeꞌe ndo ndekaxaꞌan ia jni ndasa na kini ni sa nchoxi ia, san nchoxi ia sa na kini ni Jesús ia kuu ia ndaa, xiꞌin na tsaku jni s-tachi ia. 15 Kuan dini kaꞌan xi nee ñuyii sa xíni ni xiꞌin sa tsáku jni. 16 San vita ndukuin ni san kuendutsa ni san káka ni xi Jesús kuan na dita ia x-kuachi ni.”
Duꞌua nakani Pablo na modo kída sa kuaꞌan tsa sa io ndidaa ñayii ti kuu ñuu Israel
17 San duꞌua taꞌan da kuenta nasaa da Jerusalén ya, saꞌan da templu sa kakataꞌvi da san nanuu en sa nanuu jnu da, 18 san juan xíni da Jesús san kachi ia: Ndukuin san ti kee Jerusalén xan kuan ma en kininchisa sa kaꞌan yo andu kuu ntsu. 19 San sadaa da: Toꞌo, xiniguaꞌa tsa ndidaa tsa sa dan kuu tsa xu chiñaꞌan vekaa xiꞌin xu kaniaꞌa da xi ndidaa tsa xininchisa ñaꞌan jni xiti veꞌe sinagoga; 20 san kii sáꞌni tsa ndidaa tsa Esteban, tsa xu kaꞌan ndaa s-toꞌon ni, ndeꞌe ndeꞌe da ío juan chóntsee da, kuan oni i-ntsaa da d̶oꞌno ndidaa tsa sáꞌni ñaꞌan s-tsa.c 21 Doko Jesús kachi ia d̶a: Kuaꞌan kuan xika tsandaꞌa ñaꞌan ntsu xo, sa io ndidaa ñayii ti kuu ñuu israel.
Pablo kuyii tsa ndaꞌa comandante
22 San inini ndidaa ñayii ntsa toꞌon yaꞌa. Dandu kána tsa ndidaa tsa san kachi tsa:
—¡Dita ni tsa xan ñuyii yaꞌa! ¡ti guaꞌa sa kunchito tsa!
23 San kana ni on tsa san kidi tsa d̶oꞌno tsa san dakaa tsa tiachi ichi andivi, 24 comandante táꞌvichiion tsa sa na nachiꞌi tsa Pablo cuartel san táꞌvichiion tsa sa na kaniaꞌa tsa san na ndukutoꞌon tsa, kuan nchu kini tsa nasa dakuidokuachi ñaꞌan ñayii yaꞌa s-tsa. 25 Doko kuenta xiꞌni ñaꞌan s-tsa sa kaniaꞌa -stsa, Pablo sadaa tsa xi centurión io jukua:
—Kuadi guaꞌa sa kani ni en ñayii kuu romanu, tu vita danaꞌma ñaꞌan ka ni s-tsa.
26 Kuenta tsaku xi centurión toꞌon yaꞌa san saꞌan tsa sa kadaa tsa xi comandante:
—Nasa kada ni s-tsa yaꞌa, kuan kuu tsa romanu kachi tsa.
27 Kíxi comandante san sadaa tsa:
—kachi toꞌon ni d̶a, romanu kuu ni ña?
Pablo sadaa tsa:
—Jon.
28 San comandante sadaa tsa:
—Kuaꞌa ntseꞌe cháꞌvi da sa ndúu da romanu.
Pablo sadaa tsa:
—Doko dan ntsa káku da kuu da romanu.
29 San ndidaa tsa io sa kaniaꞌa xi Pablo ya kee tsa sa kuaꞌan tsa. San ntsandeꞌe comandante yuꞌu tsa sa niꞌi toꞌon tsa sa Pablo kuu tsa romanu, san yuꞌu tsa sa xíꞌni ñaꞌan tsa.
Pablo saꞌan tsa jnu ndidaa tsa kunaꞌnu ku ñuu Israel
30 San nduu yutsa, nchukini ndaa tsa nasa dakuidokuachi ñaꞌan ndidaa judiu, san dayaa tsa cadena nuꞌni Pablo, san kana tsa ndidaa dutu ku jnuu xi xiꞌin ndidaa tsa kunaꞌnu ñuu nadataka tsa. San kineꞌen tsa Pablo, san sáni ñaꞌan tsa jnu ndidaa tsa yaꞌa.