Duꞌua taꞌan kuenta saꞌan Pablo ñuu Jerusalén
21
Tuꞌu kaꞌan da xiꞌin ndidaa tsa kuu jnuu xi io Efeso, san eni ichi kuaꞌan da xiꞌin barku ntsa Cos san nduu enka kii kuaꞌan da Rodas, san danduu juan kuaꞌan da ndidaa ntsa Pátara. 2 San naniꞌi da en barku kuaꞌan Fenicia san kusaa da sa kuaꞌan da. 3 San yaꞌia yachi da sa io isla Chipre kendoo ichi ladu ichi san saa da en xuun Siria sa kuu Tiro kuan juan koon sa nchido barku. 4 San kendoo da usa kii jukua ndidaa da san naniꞌi da uu tsa xininchisa ñaꞌan xi Jesús san Espíritu sadaa s-tsa sa na kadaa tsa xi Pablo sa ma kiꞌin tsa Jerusalén. 5 San yaꞌia ndi usa kii, san kee da ndidaa da sa kuaꞌan da xiꞌin ndidaa ku kiani ndo xiꞌin d̶eꞌe tsa xiꞌin ndidaa nuliin ntsa ñuꞌu yichi ñuu yaꞌa san sa kuinxiti da ndidaa da playa san xíkataꞌvi da xi Ndios. 6 San tuꞌu kaꞌan taꞌan da ndidaa da san kusaa da barku, san ndidaa tsa yaꞌa kunuꞌu tsa xeꞌe tsa ndidaa tsa.7 San kee da ndidaa da Tiro xiꞌin barku san saa da Tolemaida; san tuꞌu kaꞌan da xi ndidaa ku kiani ndo, san kendoo da en kii xiꞌin tsa ndidaa tsa. 8 Nduu yutsa kee da ndidaa da san kuaꞌan da ntsaa Cesarea. Saꞌan da xeꞌe Felipea tsa dadana ñaꞌan toꞌon guaꞌa tsa kuu en tsa ku usa. 9 Tsa yaꞌa io kumi d̶aꞌa ndee ii tsa xu kaꞌan nu sa kadaa Ndios sa kaꞌan nu. 10 Sa ku naꞌa io da ndidaa jukua san kixi en profeta nani Agabo kée tsa Judea.b 11 Sáa tsa sa io da ndidaa da san teen tsa cinta sakunuꞌni j-nuyiki Pablo ya san xiꞌni tsa saꞌa tsa xiꞌin ndaꞌa tsa san kachi tsa, jaꞌa kachi Espíritu Santu:
—Tsayee xaꞌan xi kuu cinta yaꞌa duꞌua kiꞌni ñaꞌan ñayii Israel s-tsa Jerusalén kuan, san na chiñaꞌan s-tsa ndaꞌa ndidaa ñayii ti kuu ñuu Israel ndasa na kada ñaꞌan tsa.
12 Kuenta tsaku d̶a ndidaa da xiꞌin ndidaa tsa io jukua toꞌon yaꞌa san sakondaꞌvi da jnu Pablo ya sa ma kiꞌin tsa Jerusalén. 13 Danduu Pablo kachi tsa:
—Naku ndaꞌyu ni ndidaa ni san kida ni sa ta-uꞌu ka xanaa da. Dan ti nayuꞌu da sa kiꞌni ñaꞌan d̶a san nisa sa kaꞌni ñaꞌan d̶a ñuu Jerusalén, tu sa saꞌa ku Toꞌo ndo Jesús kuu.
14 Xíni da ndidaa da sa ti se on tsa sa nakaꞌnu ñaꞌan s-tsa, san kachi da ndidaa da:
—Na kada sa kachi Ndios.
15 Yaꞌia uu kii san danuu da ndidaa san kuaꞌan da Jerusalén. 16 Saꞌan da xiꞌin uu tsa xininchisa ñaꞌan xi Jesús io Cesarea san ntsaka ñaꞌan tsa xeꞌe en tsa nani Mnasón tsa kuu ñuu Chipre san sa naꞌa ntseꞌe kuu tsa tsa xininchisa ñaꞌan xi Jesús, san xeꞌe tsa yaꞌa kendoo da ndidaa da.
Sa koto ñaꞌan Pablo xi Jacabo
17 Saa da Jerusalén san ndidaa ku kiani ndo ku-iꞌni ntseꞌe tsa ndidaa tsa. 18 Ndu enka kii saꞌan da ndidaa da xiꞌin Pablo sa ntsaꞌa da Jacobo san ndidaa tsa ku jnuu xi nataka juan tuku. 19 San tuꞌu kaꞌan taꞌan tsa ndidaa tsa, danduu nakani Pablo ndidaa sa kída Ndios xiꞌin tsa sa saꞌa ndidaa tsa ti kuu judiu. 20 Kuenta tsaku s-tsa ndidaa tsa, kídakaꞌnu tsa Ndios. San sadaa tsa xi Pablo:
—Xini ni ña xani, kuaꞌa ntseꞌe ñayii ñuu Israel xininchisa; doko kachi tsa sa na ndeꞌe sa kininchisa ley 21 Ndidaa ñayii Israel io jaꞌa niꞌi toꞌon tsa, sa kaꞌan ni sa ndidaa ñayii Israel io xika ma kininchisa tsa ley chidotuni Moisés. San sadaa ni tuku sa ma kada circuncidarc tsa d̶aꞌa tsa xiꞌin ma kuenchiion tsa modo senchiion ndo. 22 Nasa kada ndo tuda? Tu naniꞌi toꞌon tsa ndidaa tsa sa io ni jaꞌa. 23 Jaꞌa kada ni guaꞌa ka. Sa io da ya io kumi tsayee kida en tratu xi Ndios. 24 Kuaꞌan ni xiꞌin tsa yaꞌa sa ndadandoo ni meni, san chaꞌvi ni sa na datsa ñaꞌan s-tsa san duꞌua kini tsa ndidaa tsa san meni sa naꞌntsa kuu sa kaꞌan tsa ni, kuan dini kida ni ley. 25 Doko sa saꞌa ndidaa tsa ti kuu ñuu Israel xininchisa, ntsoo tsaa ndo sa ndatoꞌon ndo: Sa ma kaj s-tsa koño sa doko xi idolo, sa ma kaj s-tsa niñi, sa kaj tsa kiti tata xiꞌi niꞌno mee xiꞌin ma koo ñayii xiꞌin ñayii vita tandaꞌa ka xiꞌin tsa.d
Teen tsa ndidaa tsa Pablo xiti templu
26 Danduu Pablo kuaꞌan tsa xiꞌin ndi kumi tsayee yaꞌa ku ndadandoo tsa mee tsa. San nduu enka kii, kuenta tuꞌu ndundoo tsa ndidaa tsa san kuyii tsa templu sa kadaa tsa na kii xinotaꞌan sa ndundoo tsa, san na kii kiꞌin tsa ku doko tsa ndidaa tsa.
27 Kuenta sa io sa xino ndi usa kii, ndidaa judiu io Asia xini ñaꞌan tsa sa io tsa templu, san kesaꞌa tsa kana tsa xi nee ñuu san téen ñaꞌan tsa, 28 san kachi tsa:
—Ndidaa ni tsa kuu ñuu Israel chintsee ñaꞌan ni, tsa yaꞌa kuu tsa dadana ñaꞌan ndidaa xichi sa ti nandeꞌe sa kada ndo sa duꞌua ni neꞌe ndo vaxi, sa taꞌvichiion ley san ti choꞌon ii tsa lugar yaꞌa kuan chiꞌi tsa ñayii ti kuu ñuu Israel templu, san jaꞌa nchu kachi sa ti kuu yeñuꞌu tsa xi veꞌe yaꞌa, 29 Kachi tsa toꞌon yaꞌa kuan xini on tsa Pablo ya xiꞌin Trófimoe en tsa io ñuu nani Efeso san sani-ini tsa sa Pablo ya ntsaka ñaꞌan s-tsa kuaꞌan templu.
30 Nee ñuu ya nadiko xi san kesaꞌa tsa kana tsa san téen tsa Pablo san ñuꞌu ñaꞌan tsa ntsa ndikeꞌe templu san nakadi ni tsa templu. 31 Sa io vii sa kaꞌni ñaꞌan tsa xi Pablo saꞌan en tsa sa kadaa xi x-comandante soldadu romanu sa nee ñuu Jerusalén ti xini nasa taꞌan. 32 San tsa yaꞌa kána tsa ndidaa soldadu tsa xiꞌin ndidaa centurión san kuaꞌan tsa sa io ndidaa ñayii yaꞌa. San xíni tsa comandante ya xiꞌin ndidaa soldadu ya, san ti kaniaꞌa ka tsa xi Pablo. 33 Danduu saa comandante sa teen ñaꞌan tsa, san táꞌvichiion tsa sa nakiꞌni ñaꞌan xiꞌin ubi cadena. San ndukutoꞌon tsa andu kuu tsa xiꞌin nasa kída tsa; 34 doko ndidaa tsa yaꞌa tuku tuku kaꞌan tsa san comandante ti tediki tsa nasa kuu sa kana ndidaa ñayii xuku jukua, juandiku táꞌvichiion tsa sa na kuntsaka ñaꞌan xi Pablo na kiꞌin cuartel. 35 San Ndidaa soldadu kuan xído ñaꞌan tsa xi Pablo san kusaa tsa escalera sa nayii tsa cuartel kuan nduntseꞌe ntseꞌe ndidaa ñayii xuku jukua; 36 San ndidaa ñayii nchiko ñaꞌan kana tsa ndidaa tsa san kachi tsa:
—Na kuu tsa.
Pablo natavi tsa mee tsa jnu ndidaa ñayii io juan
37 San sa io sa yii Pablo xiti cuartel san ndukutoꞌon tsa xi comandante:
—Guaꞌa ni kaꞌan da en toꞌon ña?
san tsa yaꞌa kachi tsa:
—Xini yo kaꞌan yo griegu ña? 38 Adi yoꞌo kuu egipciu naxikokagua xi gobiernu san kuaꞌan tsa desiertu xiꞌin kumi mil ñayii nchido yeka ndii ña?
39 Pablo sadaa tsa:
—Dan kuu da tsa Israel, san xuun da kuu Tarso io distritu Cilicia, en ñuu kaꞌnu. San sakundaꞌvi da sa kuaꞌa-ini ni sa na kaꞌan da xi ñuu ya.
40 San comandante semani tsa danduu Pablo kukuin tsa d̶iki escalera san ndaneꞌe tsa ndaꞌa tsa san nee ñuu kukadi, san kesaꞌa tsa kaꞌan tsa daꞌan hebreu, san sadaa tsa: