Duꞌua taꞌan kuenta sáꞌan Pablo ñuu nani Macedonia xiꞌin Grecia
20
San kuenta tuꞌu ndidaa sa taꞌan ya, Pablo kána tsa ndidaa tsa xininchisa ñaꞌan xi Jesús san sadaa tsa, sa na ndukuntsee tsa ndidaa tsa, san dandoo ñaꞌan tsa san kee tsa kuaꞌan tsa Macedonia. 2 San ndinoo tsa ndidaa ñuu san kaꞌan tsa s-toꞌon Ndios xi ndidaa ñayii xininchisa ñaꞌan xi Jesús san sadaa tsa sa na ndukuntsee tsa ndidaa tsa san danduu kuaꞌan tsa Grecia. 3 Danduu juan ío tsa uni yoo, sa io vii tsa sa teen tsa en barku sa nuꞌu tsa Siria doko nitoꞌon Pablo sa ndidaa judiu nchu teen ñaꞌan s-tsa, san naxikokagua tsa Macedonia. 4 San kuaꞌan tsa xiꞌin ndidaa tsa yaꞌa Asia Sópater d̶aꞌa Pirro, tsa kuu ñuu Berea, Aristarco xiꞌin Segundo tsa kuu ñuu Tesalónica Gayo tsa kuu ñuu Derbe, Timoteu, Tíquico xiꞌin Trófimo tsa kuu Asia kuan. 5 Ndidaa tsa yaꞌa ndodonuu kuaꞌan san intsatu tsa ñuu Troas d̶a nduu da. 6 Doko yaꞌia kii viko ita-stila ti sa keꞌe levadura, kee da nduu da ñuu Filipos san nduu oꞌon kii nanitaꞌan da ndidaa da ñuu nani Troas, san usa kii ío da ndidaa da jukua.Duꞌua táꞌan kuenta saꞌan Pablo ñuu nani Troas
7 Diꞌnanuu sábado, nataka da ndidaa da sa taꞌvi da ita-stila, Pablo kaꞌan tsa xi ndidaa tsa xininchisa ntsa dagua niñu, kuan kee tsa kiꞌin tsa nduu enka kii. 8 Kuaꞌa ntseꞌe kandil xiko piso ku uni, sa xuku da ndidaa da. 9 San en nuyee nani Eutico, intsaku ndodo nu ventana san teñaꞌan viaꞌna jnu. San guaꞌa ni sa Pablo ya kaꞌan ni on tsa, nuyaꞌa xidi naa nu, san kikagua nu ntsa piso ku uni san xiꞌi nu san ndaneꞌe ñaꞌan jnu. 10 Danduu Pablo noo tsa san nonontsaa ñaꞌan tsa jnu san kachi tsa:
—-Ma yuꞌu ni ndidaa ni kuan ti xiꞌi nu nchito nu.
11 Danduu kundaa tsa veꞌe nino san taꞌvi tsa ita-stila san saj s-tsa ndidaa tsa, san kaꞌan tsa ntsa yeꞌe, san kee tsa kuaꞌan tsa. 12 San nuyee nchito nu san ku-iꞌni ntseꞌe tsa ndidaa tsa.
Ntsaa ñuu nani Troas kee Pablo san saꞌan tsa ñuu nani Mileto
13 San sakundodonuu da ndidaa da xiꞌin en barku san saa da ntsa ñuu Asón juan nakuaka ñaꞌan da xi Pablo, kuan kachi tsa sa kaka tsa kiꞌin ntsa Asón juandiku intsatu da ndidaa da s-tsa. 14 Kuenta nanitaꞌan da xiꞌin tsa Asón, san nakuaka ñaꞌan da s-tsa san kuaꞌan da ntsa Mitilene ndidaa da. 15 San nduu enka kii saa da isla io jnu ñuu Quío. San nduu uu kii saa da ndidaa da isla Samos, san nduu enka kii saa da Mileto. 16 Kuan Pablo sani-ini tsa sa kiꞌin ndaa ni tsa san ma kiꞌin tsa Efeso ndasa ma kukuin tsa Asia kuan nchu koo tsa kii Pentecostés ñuu Jerusalén.
Kaꞌan Pablo xiꞌin ndidaa tsa kunaꞌnu io Efeso
17 Ntsaa Mileto io Pablo san kána tsa ndidaa tsa kuu jnuu xi io congregación io Éfeso. 18 Kuenta saa tsa yaꞌa san sadaa tsa:
—Dini xiniguaꞌa ni namodo ío da sa io ni ndidaa ni, ntsa diꞌnanuu kii saa da Asia, 19 san ndikii kadi ni xu kuinokuachi da xi Ndios san oni xu kuaku da kuan xu taꞌan ntseꞌe da ndidaa sa xu nchukada ndidaa ñayii Israel d̶a; 20 san ti dándoo da sa kaꞌan da sa guaꞌa jni ndidaa ni san ndikii xu dakuaꞌa ñaꞌan da tu kachi sa jnu kuaꞌa ntseꞌe ñayii ña kachi sa veꞌe, 21 san xu kaꞌan da xi ñayii kuu ñuu Israel xiꞌin ñayii ti kuu ñuu Israel ndasa na nata-uꞌu tsa san na kaka tsa sa kaꞌnu-ini xi Ndios xiꞌin na nakininchisa tsa Jesús. 22 Doko vita kachi Espíritu sa na kiꞌin da Jerusalén, san nisa ti xini da nasa kuu sa taꞌan da juan; 23 sa xini da kuu sa ndiden ñuu saꞌan da kaꞌan Espíritu Santu sa ntsatu vekaa xiꞌin sa taꞌan ntseꞌe da. 24 Doko ti ñoꞌon ka xanaa da xuyii da kuan sa sani-ini da kuu sa daxino da x-chiion daa sa taꞌvi Jesús ia kuu ku Toꞌo ndo d̶a: Sa kaꞌan da s-toꞌon Ndios sa kuu j-gracia ia.
25 Kunini ni ndidaa ni kuenta guaꞌa kaꞌan da s-toꞌon Ndios jni, kuan xini da sa ma kini ñaꞌan ka ni ndidaa ni d̶a. 26 San vita kachi da sa tu dakaa ni na kuita san adi x-kuachi mee da kuu, 27 kuan ti náyuꞌu da sa kaꞌan da ndidaa sa kuu s-toꞌon Ndios jni ndidaa ni. 28 Guaꞌa guaꞌa chodoꞌo ni san koꞌon jnu ni ndidaa ñayii xininchisa ñaꞌan xi Jesús, san kunaꞌa ni sa Espíritu Santu sáni ñaꞌan jni sa na ku kuu ni jnu xi ndasa na koto ni ndidaa ñayii kuu x-congregación ku Toꞌo ndo, ñayii nitaꞌvi sa saꞌa jniñi Jesucristu. 29 Kuan xini da sa ora na kee da kiꞌin da kixi ñayii na ndikuaan sa io ni ndidaa ni san dandaa ñaꞌan tsa jni ndasa ma kininchisa ka ni ndidaa ni; 30 dii ni sa io ni xan kee ñayii naꞌntsa san kesaꞌa tsa dakuaꞌa ñaꞌan tsa sa naꞌntsa ndasa na kunchiko ñaꞌan ñayii xininchisa ñaꞌan xi Jesús s-tsa. 31 Juandiku, ntseꞌe guaꞌa ni, san nakaꞌan ni sa uni kuia, ti dandoo da sa kaꞌan da jni ndikii, san oni xu kuaku da sa saꞌa ni ndidaa ni.
32 San vita vi xanii, nachoꞌon ñaꞌan da jni ndidaa ni ndaꞌa Ndios xiꞌin ndaꞌa s-toꞌon ia sa kaꞌan sa kuu j-gracia ia, sa tastuni sa kada sa na kininchisa ni xiꞌin sa taxi herencia jni xiꞌin ndidaa ka ñayii ndekaxi ia. 33 Ti nchój-ntsaa da nisa plata san nisa oro, san nisa d̶oꞌno en ñayii ti nchoj-ntsa da. 34 Dini ndidaa ni xini ni sa kídachiion da, dana niꞌi da sa nandeꞌe d̶a, xiꞌin ndidaa tsa xu chintsee ñaꞌan d̶a. 35 San duꞌua dádana ñaꞌan da sa na kadachiion ndo, san duꞌua chintsee ndo ñayii kundaꞌvi, san na kunaꞌa ndo s-toꞌon Jesús, sa kachi ia: “Guaꞌa ka sa kuañaꞌan ndo adii sa niꞌi ndo.”
36 San tuꞌu kaꞌan tsa ndidaa toꞌon yaꞌa san sakuinxiti tsa, san xikataꞌvi tsa xiꞌin ndidaa tsa yaꞌa. 37 San danduu ndaꞌyu ntseꞌe tsa yaꞌa ndidaa tsa. San nonontsaa tsa Pablo ya san tsayuꞌu ñaꞌan tsa, 38 san uꞌu ntseꞌe taꞌan tsa sa saꞌa ndidaa toꞌon sadaa Pablo sa ma kini ñaꞌan ka tsa ndidaa tsa s-tsa. San sa dayaꞌia ñaꞌan tsa ntsa jnu barku.